ភ្នំពេញ ៖ ផ្សារសហគមន៍អណ្ដូងថ្មី ដែលជាផ្សារសហគមន៍ក្នុងភូមិអណ្ដូង សង្កាត់គោករកា ខណ្ឌ ព្រែកព្នៅ រាជធានីភ្នំពេញ ដែលជាទីផ្សារបម្រើផលប្រយោជន៍ក្នុងសហគមន៍ទាំង៦។
លោក យាន នៅ ប្រធានគ្រប់គ្រងផ្សារអណ្ដូងថ្មីបានឲ្យដឹងថា ក្នុងផ្សារនេះ ជាអំណោយ របស់អង្គការ មណ្ឌលផ្លាស់ប្ដូរ និងអភិវឌ្ឍន៍ PCL បានធ្វើការផ្តល់ជូនក្នុងសហគមន៍ក្រីក្រ កកើតឡើងក្នុងឆ្នាំ២០១៣ មានរយៈពេល២ឆ្នាំមកហើយ ដោយក្នុងផ្សារមានតូបចំនួន៤២តូប ប៉ុន្តែបច្ចុប្បន្ន នូវសល់តែតូបលក់៣០តូបប៉ុណ្ណោះ ជាប្រភេទតូបលក់សំលៀកបំពាក់ គ្រឿងទេសន៍តូបលក់បន្លែ គ្រប់មុខ តូបលក់ត្រីសាច់។
តាមការអធិប្បាយរបស់អ្នកអាជីវករលក់សាច់ជ្រូកម្នាក់ឈ្មោះ សំបូរ ក្នុងផ្សារអណ្ដូងថ្មីនោះ ថា ក្នុងមួយថ្ងៃអាចលក់សាច់ជ្រូកបានចំនួន៤០គីឡូដែលយកមកពីភ្នំពេញ លក់ក្នុងមួយគីឡូថ្លៃ ១៨.០០០រៀលប្រហាក់ប្រហែលនឹងភ្នំពេញដែរ ហើយថ្ងៃបុណ្យទានអាចលក់បានចំនួន៥០គីឡូ ដោយការចាប់ផ្តើមលក់តាំងពីម៉ោង៧ព្រឹក រហូតដល់ម៉ោង៧យប់។
លោក សំបូរ បន្តថា ទីផ្សារសហគមន៍ តូបលក់មិនសូវដាច់ ដោយសារគ្មានអ្នកទិញបានបង់ថ្លៃទឹកថ្លៃភ្លើងក្នុងមួយថ្ងៃ១.០០០រៀលទៀត។ លោកបន្តថា តាមតូបធំយកតម្លៃ១.០០០រៀល ក្នុងមួយថ្ងៃ ដោយឡែកអ្នកលក់ដាក់កញ្ច្រែងតាមថ្នល់មិនបានបង់ប្រាក់នោះទេ ហើយប្រាក់ប្រមូលទាំងនោះ គឺយកទៅបង់ថ្លៃទឹកថ្លៃភ្លើងក្នុងសហគមន៍តែម្តង។
លោកបញ្ជាក់ទៀតថា បញ្ហាសំរាមកំពុងជាកង្វល់ក្នុងសហគមន៍ដោយសារតែក្រុមហ៊ុន ស៊ីនទ្រី មិនបានប្រមូលសំរាមឲ្យបានទៀងទាត់ ដោយក្នុងមួយអាទិត្យប្រមូលបានតែ២ដង ហើយមិន ទៀងទាត់ទៀត។ សំណូមពរឲ្យមានការប្រមូលសំរាមក្នុងមួយអាទិត្យឲ្យបាន៣ដង ទើបបានទាន់ពេលវេលា។ ម្យ៉ាងទៀតលើបញ្ហាបង្គោលភ្លើងគ្មានភ្លើងបំភ្លឺ ដោយសារតែអង្គការ PCL ដាក់តែបង្គោលភ្លើង តែគ្មានការតបណ្ដាញភ្លើងឲ្យប្រើប្រាស់នោះទេ៕
កញ្ញាវ៉ាត
0 Comments