កំពង់ឆ្នាំង ៖ កាលពីថ្ងៃទី២៤ ខែមករា ឆ្នាំ២០១៥ វេលាម៉ោង១២និង២៣នាទី អ្នកយកព័ត៌មានយើង បានចុះទៅដល់កន្លែងឈូសឆាយដីនៅចំណុចហុងទឹកភូមិតានៃ ឃុំជៀប ស្រុកទឹកផុស ខេត្តកំពង់ឆ្នាំង ដោយប្រើគ្រឿងចក្រប៊ុល D60 ឈូសឆាយដីព្រៃយ៉ាងអានាធិបតេយ្យ និងគ្មានច្បាប់អនុញ្ញាតិពីអាជ្ញាធរមូលដ្ឋាន។ ការឈូសឆាយខាងលើគឺឈូសរំលោភដីព្រៃ ដោយគេស្គាល់ថា អ្នកឈូសឆាយមានឈ្មោះ ស ប៊ុនធឿន(ហៅរ៉ាន់) ជាមេការ អតីតទាហានបន្ទាយលង្វែកចូលសោធននិវត្ត។ សេចក្ដីរាយការណ៍ពីប្រជាពលរដ្ឋនៅតំបន់នោះបានឲ្យដឹងថា ការឈូសឆាយខាងលើនេះ មានឈ្មោះ ឌុច វ៉ាត ជាអនុភូមិតានៃជាអ្នកនៅពីក្រោយខ្នងសកម្មភាពការឈូសឆាយខាងលើនេះ និង ឈ្មោះ សួន សារ៉ាត់ ដោយទទួលបានលាភសក្ការៈពីម្ចាស់គ្រឿងចក្រក្នុងមួយម៉ោង១ម៉ឺនរៀលក្នុងម្នាក់ៗ។ ការឈូសឆាយនេះ គ្រឿងចក្រប៊ុល d60 ខាងលើដែលឈូសឆាយគ្មានច្បាប់អនុញ្ញាតិត្រូវបានប្រភពបន្តឲ្យដឹងថា ពួកគេទទួលបានកម្រៃ២៦ទៅ២៧ម៉ឺនរៀលក្នុង១ម៉ោង។ ពុំនោះទៀតសាតក្នុងការឈូសឆាយរបស់គ្រឿងចក្រនោះ គឺមានការចាំជួយមើលផ្លូវពីលោក ឌុច វ៉ាត ជាអនុភូមិតានៃ និងលោក សួន សារ៉ាត ដើម្បីរាយការណ៍ឲ្យគ្រឿងចក្រចេញពីកន្លែងឈូសឆាយពេលមានសមត្ថកិច្ចទៅដល់ដើម្បីធ្វើការត្រួតពិនិត្យ ហើយយកលេសថា ឈូសឆាយពង្រាបដីក្បាលស្រែ។ មិនតែប៉ុណ្ណោះ ការឈូសឆាយនេះធ្វើឲ្យមានការប៉ះពាល់ដល់ព្រំដីរបស់ប្រជាពលរដ្ឋជិតខាងមានការថ្នាំងថ្នាក់ក្តៅក្រហាយ។ អ្នកនៅជាប់ព្រំដីខាងលើបាននិយាយថា គ្រាន់តែពង្រាបក្បាលដីស្រែ យកត្រាក់ទ័រកង់កៅស៊ូក៏អាចរុញពង្រាបបានដែរ មិនចាំបាច់ដល់ថ្នាក់គ្រឿងចក្រកង់ច្រវាក់ D60 ទៅឈូសឡើយ។
មេឃុំជៀប លោក គង់ គីម បានប្រាប់អ្នកយកព័ត៌មានយើងឲ្យដឹងថា សកម្មភាពការឈូសឆាយខាងលើនេះ បានចូលមកឈូសឆាយជាថ្មី កាលពីថ្ងៃទី២២ ខែមករា ឆ្នាំ២០១៥ ដោយក្រុមឈូសឆាយនេះ លោកមិនបានទទួលព័ត៌មានពីម្ចាស់គ្រឿងចក្រ ឬមានការសុំច្បាប់អនុញ្ញាតិត្រឹមត្រូវឡើយ។ ទោះយ៉ាងណាក៏ដោយមជ្ឈដ្ឋានទូទៅបានដាក់បន្ទុក និងសង្ស័យថា អាជ្ញាធរដែនដី និង សមត្ថកិច្ចជំនាញ ប្រហែលជាធ្វើពុតដេកលក់ ហើយទទួលបានលាភសក្ការៈសើមមាត់សើមកហើយមើលទៅ ទើបសកម្មភាពឈូសឆាយនេះអាចបន្តបានជាហូរហែដូច្នេះ។ មិនតែប៉ុណ្ណោះ មិនត្រឹមតែចំណុចខាងលើនេះទេ នៅមានកន្លែងជាច្រើនទៀតក្នុងស្រុកទឹកផុសដែលមានសកម្មភាពឈូសឆាយរាប់រយហិកតាគ្មានច្បាប់ដូចគ្នានេះផងដែរ៕
ថ្លាង ទូច
0 Comments