ភ្នំពេញ ៖ តារាសំដែងដែលនិយមបង្ហាញនៅភាពសិចស៊ីមិនខ្លាចការរិះគន់កញ្ញា ដួង ស្រីពេជ្រ បាននិយាយប្រាប់«កម្ពុជាថ្មី»ឲ្យដឹងថា សម្រាប់រយៈពេល៧ខែ ឆ្នាំ២០១៥នេះ សន្ទុះការងារសិល្បៈរបស់នាងឡើងស្រឺតៗតែម្ដង ពោល មានខ្សែភាពយន្តភាគ និងខ្សែភាពយន្តខ្នាតធំចំនួន១០រឿង ដែលនាងបានថតសំដែងរួចមកហើយ ព្រមទាំងមានរឿងមួយចំនួនទៀតកំពុងចុះកុងត្រាជាមួយម្ចាស់ផលិតកម្មផងដែរ។
ដួង ស្រីពេជ្រ និយាយបន្តថា ចំពោះខ្សែភាពយន្តទាំង១០រឿង ដែលនាងបានថតសំដែងនោះរួមមានរឿង«មាសសុទ្ធ» «អមតៈបេះដូង» «បុប្ផា៤ទង» «ចិត្តស្អប់បង្កប់ស្នេហ៍» «ខ្មោចទឹក» «ព្រលឹងហ្វេសប៊ុក» «អាណានាំខ្មោចចូលភូមិ» «ហ្វេសប៊ុកផ្ដាច់វិញ្ញាណ» «ក្រមុំសៅកែ» និងរឿង«អាមោកលក់មុំា»។
នាងបញ្ជាក់ថា ក្នុងរយៈពេលជាងកន្លះឆ្នាំនេះ នាងស្ទើរតែរកពេលសម្រាកគ្មាន ដោយមួយថ្ងៃៗរវល់នឹងការងារថតកុន ដែលពេលខ្លះថតតាំងពីព្រឹកដល់យប់ ពីយប់ដល់ភ្លឺ ក៏មានដែរ ព្រមទាំងដើរម៉ូដ ថតស្ប៉តពាណិជ្ជកម្ម និងចូលរួមនៅក្នុងកម្មវិធីផ្សេងៗរបស់ស្ថានីយទូរទស្សន៍មួយចំនួនជាដើម។
តារាសំដែងដែលកំពុងតែឡើងកូដដ៏ស្រស់សោភារូបនេះនិយាយបន្ថែមថា កត្តាសំខាន់ដែលធ្វើអាជីពសិល្បៈរបស់នាងទទួលបាននៅភាពជោគជ័យនោះ ក៏ដោយសារតែការតស៊ូព្យាយាម ការគោរពពេលវេលា មិនប្រកាន់ការងារតូច ឬធំ បូករួមនឹងទេពកោសល្យសិល្បៈរបស់នាង ទើបអ្វីៗមានភាពរលូនរហូតមកដល់ពេលនេះ។
បន្ទាប់ពីអាជីពសិល្បៈទទួលបាននៅផ្លែផ្កាដែលអាចរកប្រាក់កម្រៃបានរាប់ពាន់ដុល្លារក្នុងមួយខែៗនោះ កញ្ញា ដួង ស្រីពេជ្រ ក៏បានឆ្លើយតបនឹងសំណួររបស់«កម្ពុជាថ្មី» ទាក់ទងទៅនឹងរឿងរ៉ាវមនោសញ្ចេតនាផ្ទាល់ខ្លួនថា រហូតមកដល់ពេលនេះ ចំណងស្នេហ៍រវាងនាងជាមួយនឹងអ្នកសំបូរទ្រព្យម្នាក់បានបែកបាក់ចែកផ្លូវគ្នាជាយូរមកហើយ។ ចំពោះរឿងនេះដែរ នាងមិនដែលគិតនោះទេពីព្រោះនាំតែអំពល់ចិត្ត ហើយក៏មិនទាន់ទទួលយកអ្នកថ្មីដើម្បីមកស្អំថែបេះដូងនោះដែរ៕
ដួង ស្រីពេជ្រ វិលក្បុងនឹងអាជីពកាច់រាងនៅមុខកាមេរ៉ា
0 Comments