ភ្នំពេញ ៖ នៅល្ងាចថ្ងៃទី២៧ ខែកក្កដា ឆ្នាំ២០១៥នេះតារាសំដែងទឹកភ្នែកកញ្ញាលី ច័ន្ទសីហាបានវិលត្រឡប់ពីសំដែងសិល្បៈដើម្បីទ្រទ្រង់វប្បធម៌ខ្មែរនៅប្រទេសជប៉ុនមកដល់ទឹកដីកំណើតវិញហើយដោយបានវេចស្ពាយមកជាមួយនៅការគាំទ្រនិងទទួលបានកាដូពីបងប្អូនខ្មែររស់នៅទីនោះយ៉ាងច្រើនសន្ធឹកសន្ធាប់ផងដែរ។
តារាសំដែងនិងចម្រៀងកញ្ញាលី ច័ន្ទសីហាបាននិយាយប្រកបដោយទឹកមុខស្រស់ស្រាយសប្បាយរីករាយថា ក្នុងរយៈពេលនៃការស្នាក់នៅច្រៀងនិងសំដែងដើម្បីផ្សព្វផ្សាយទម្រង់វប្បធម៌សិល្បៈខ្មែរនៅលើទឹកដីប្រទេសជប៉ុនរយៈពេល១២ថ្ងៃមកនេះគឺទទួលបាននូវការគាំទ្រយ៉ាងខ្លាំងពីប្រជាជនជប៉ុន ជាពិសេសបងប្អូនពុកម៉ែខ្មែរយើងដែលរស់នៅទីនោះដោយពួកគាត់ជូនកាដូដល់នាងគ្រប់ៗគ្នានិងបានធ្វើពិធីខួបកំណើតឲ្យនាងថែមទៀតផង។
លី ច័ន្ទសីហាបន្តថា ចំពោះការចេញទៅសំដែងសិល្បៈលើកទីមួយនៅប្រទេសជប៉ុននេះគឺរួមដំណើរជាមួយតារាសិល្បៈលោករតនៈ ពិសិដ្ឋ ហើយបន្ទាប់ពីជោគជ័យខ្លាំងនោះខាងស្ពន់ស័រដែលបានធានានាងទៅក៏បានសុំឲ្យនាងបន្តស្នាក់នៅច្រៀងពីរយៈពេលកន្លះខែទៅមួយខែទៀតដែរតែត្រូវបាននាងបដិសេធដោយសារតែនាងមានការនឹករលឹកស្រុកកំណើត ជាពិសេសនោះគឺចាំបាច់ត្រូវមកមើលការខុសត្រូវហាងសំអាងការរបស់នាងដែលត្រូវទិញសម្លៀកបំពាក់ និងគ្រឿងអលង្ការថ្មីៗទាន់សម័យចូលបន្ថែមផងនោះ។
ដោយឡែកទាក់ទងនឹងការលេចឮថា ក្នុងអំឡុងពេលស្នាក់នៅច្រៀង រាំនៅលើទឹកដីប្រទេសជប៉ុនមានបុរសៗរស់នៅទីនោះពេញចិត្តពេញថ្លើមនោះតារាសំដែងដែលមានឈ្មោះល្បីតាំងពីកុមារតាមរយៈរឿង«មរណៈមាតា»កញ្ញាលី ច័ន្ទសីហាបាននិយាយដោយបង្ហាញមកជាមួយនៅស្នាមញញឹមស័ក្តិសមនឹងចង្កាស្រួចរំលេចដោយទម្រង់មុខមានមន្តស្នេហ៍របស់នាងថា «ចា!បងតាមការពិតពួកគាត់ស្រឡាញ់រាប់អាននិងចូលចិត្តនាងក្នុងនាមជាអ្នកសិល្បៈខ្មែរម្នាក់តែប៉ុណ្ណោះ ពោលមិនមានអ្វីលើសពីនេះនោះឡើយ»៕
តារាសំដែងទឹកភ្នែកកញ្ញាលីច័ន្ទសីហាស្ពាយការគាំទ្រមកស្រុកវិញ
0 Comments