ភ្នំពេញ ៖ រដ្ឋាករទឹកស្វយ័តក្រុងភ្នំពេញ នារសៀលថ្ងៃទី១៤ ខែមករា ឆ្នាំ២០១៦ ដឹកនាំដោយលោក ស៊ីម ស៊ីថា អគ្គនាយក នៃអគ្គនាយកដ្ឋានរដ្ឋាករទឹកស្វយ័តក្រុងភ្នំពេញ បានចុះសំណេះសំណាលនិងផ្តល់សេវាទឹកស្អាតជូនប្រជាពលរដ្ឋដែលរស់នៅក្នុងសហគមន៍សែនសប្បាយ ស្ថិតនៅភូមិសែនសុខ សង្កាត់ឃ្មួញ ខណ្ឌសែនសុខ រាជធានីភ្នំពេញ។
តាមរបាយការណ៍បានឲ្យដឹងថា សហគមន៍នេះមានប្រជាពលរដ្ឋរស់នៅចំនួន៨០គ្រួសារ ក្នុងនោះមេគ្រួសារជាស្ត្រីមេម៉ាយចំនួន១៥គ្រួសារ និងមេគ្រួសារជាជនពិការចំនួន១គ្រួសារ។
លោក ស៊ីម ស៊ីថា ថ្លែងថា ការផ្តល់សេវាទឹកស្អាតជូនប្រជាពលរដ្ឋសហគមន៍សែនសប្បាយនាពេលនេះ គឺជាគោលនយោបាយរបស់រាជរដ្ឋាភិបាល ក៏ដូចជាសាលាក្រុងភ្នំពេញ ដែលយកចិត្តទុកដាក់ចំពោះប្រជាពលរដ្ឋក្រីក្រ និងជួបការលំបាករស់នៅតាមសហគមន៍។
លោកបញ្ជាក់ថា ប្រជាពលរដ្ឋរស់នៅក្នុងសហគមន៍នេះជាប្រជាពលរដ្ឋក្រីក្រ ត្រូវការចាំបាច់នូវការឧបត្ថម្ភទុនពីរាជរដ្ឋាភិបាល និងអាជ្ញាធរ ហើយនេះជាសមាគមទី១៣៩ ដែលរដ្ឋាករទឹកស្វយ័តក្រុងភ្នំពេញបានធ្វើការឧបត្ថម្ភទុនជូនប្រជាពលរដ្ឋចាប់តាំងពីឆ្នាំ២០០៥មក។
លោកបានឲ្យដឹងផងដែរថា ការឧបត្ថម្ភទុនជូនគ្រួសារនៅក្នុងសហគមន៍សែនសប្បាយនេះ គឺត្រូវបែងចែកតាមគ្រួសារនីមួយៗ រួមមាន ចំនួន១៦គ្រួសារទទួលបានការឧបត្ថម្ភទុនប្រមាណ៧០% គ្រាដែល៦៤គ្រួសារទៀត ទទួលបាន៥០%។
លោកបញ្ជាក់ថា ការឧបត្ថម្ភទុននោះ គឺធ្វើឡើងតាមរយៈការ ត.បណ្តាញទឹកស្អាត និងដាក់កុងទ័រមិនយកតម្លៃសេវា និងឲ្យបង់រំលោះសម្ភារៈថែមទៀត។ លោកអគ្គនាយកបានអះអាងថា ការផ្តល់សេវានាពេលនេះ គឺជាការជួយកាត់បន្ថយការចំណាយរបស់ពួកគាត់ និងកាត់បន្ថយការប្រើប្រាស់ទឹកដែលគ្មានអនាម័យ ព្រោះថា កន្លងមកប្រជាពលរដ្ឋបានប្រើប្រាស់ទឹកដែលទិញពីក្រុមឈ្មួញដែលគេគិតថា មានតម្លៃថ្លៃ ហើយមិនសូវធានាអនាម័យនោះឡើយ។
លោកក៏បានសុំការអធ្យាស្រ័យពីប្រជាពលរដ្ឋផងដែរ ព្រោះថា នៅដំណាក់កាលដំបូងនេះសម្ពាធទឹកនៅខ្សោយបន្តិច ព្រោះសហគមន៍នេះនៅឆ្ងាយពីទីក្រុង។ ប៉ុន្តែនៅពេលរោងចក្រថ្មីសាងសង់រួចរាល់នៅឆ្នាំ២០១៧នោះ ប្រជាពលរដ្ឋនឹងលែងមានការលំបាកទៀតហើយ។
ប្រជាសហគមន៍ទាំងអស់បានសម្តែងការអបអរសាទរ និងសប្បាយរីករាយយ៉ាងខ្លាំងចំពោះលោកប្រធានរដ្ឋាករទឹកស្វយ័តភ្នំពេញដែលលោកបានយកចិត្តទុកដាក់មកលើសហគមន៍ក្រីក្ររបស់ពួកគាត់៕
រដ្ឋាករទឹកស្វយ័តក្រុងភ្នំពេញ ផ្តល់សេវាទឹកស្អាតជូនប្រជាពលរដ្ឋសហគមន៍សែនសប្បាយ
0 Comments