Ad Code

សហព័ន្ធ​បាញ់​កាំភ្លើង​ ជ្រើសតាំង​សមាជិក​ប្រតិបត្តិ​២​រូប​បន្ថែម​ទៀត​

បាញ់​កាំភ្លើង ៖ សហព័ន្ធ​កីឡា​បាញ់​កាំភ្លើង​កម្ពុជា បាន​ធ្វើ​មហាសន្និបាត​វិសាមញ្ញ​មួយ ដើម្បី​ជ្រើស​តាំង​សមាជិក​គណៈកម្មាធិការ​ប្រតិបត្តិ​ថ្មី​ពីរ​រូប​បន្ថែម​ទៀត កាលពី​ល្ងាច​ថ្ងៃ​ទី​១៤ ខែ​មករា នៅ​ទី​ស្នាក់​ការ​គណៈកម្មាធិការ​ជាតិ​អូឡាំពិក​កម្ពុជា។


មហាសន្និបាត​វិសាមញ្ញ​សហព័ន្ធ​កីឡា​បាញ់​កាំភ្លើង​នេះ​បាន​ប្រព្រឹត្តទៅ​ដោយមាន​ការចូលរួម​ពី​លោក ​វ៉ា​ត់ ចំរើន ​អគ្គលេខាធិការ​គណៈកម្មាធិការ​ជាតិ​អូឡាំពិក​កម្ពុជា លោក​ឧត្ដមសេនីយ៍​ឯក​ មៀ​ច សុផាន់​ណា ប្រធាន​សហព័ន្ធ​កីឡា​បាញ់​កាំភ្លើង​កម្ពុជា អនុប្រធាន និង​សមាជិក​ប្រតិបត្តិ។​


លោក មៀ​ច សុផាន់​ណា ប្រធាន​សហព័ន្ធ​បាន​មានប្រសាសន៍ថា មហាសន្និបាត​វិសាមញ្ញ​នេះ បាន​បោះឆ្នោត​ជ្រើសរើស​អគ្គលេខាធិការ​ថ្មី ជំនួស​អគ្គលេខាធិការ​ចាស់​ដែល​ជាប់​បំពេញ​កម្មសិក្សា​នៅ​ក្រៅ​ប្រទេស​រយៈពេល​វែង និង​ជ្រើសរើស​អនុប្រធាន​សហព័ន្ធ​បន្ថែម​មួយ​រូប​ទៀត។​


ការ​អនុម័ត ដែល​ធ្វើ​តាមរយៈ​ការ​លើកដៃ​នោះ លោក សា​មឺ​ឌី ស៊ីវ​ឌ្ឍ​នា ដែល​ជា​អនុ​រដ្ឋលេខាធិការ​ក្រសួង​អប់រំ​យុវជន ​និង​កីឡា ត្រូវ​បាន​ទទួល​ការ​គាំទ្រ​ជា​អនុប្រធាន​សហព័ន្ធ លោក​ហូ សិទ្ធិគុណ ត្រូវ​បាន​ទទួល​ការ​គាំទ្រ​ជា​អគ្គលេខាធិការ​ជំនួស​លោក ​ប៊ួ​យ សុ​ភ័​ណ្ឌ ដែល​បាន​ចេញ​ទៅ​សិក្សា​នៅ​ក្រៅ​ប្រទេស​រយៈពេល​វែង។​


ជាមួយនឹង​ការ​ជ្រើស​បន្ថែម​នូវ​សមាសភាព​ក្បាលម៉ាស៊ីន​បន្ថែម​នោះ អង្គ​មហាសន្និបាត​បាន​ជជែក​គ្នា​ពី​គម្រោង​រៀបចំ​ការប្រកួត​បាញ់​កាំភ្លើង​ថ្នាក់​ជាតិ​ជា​លើកដំបូង​ដែល​គ្រោង​នឹង​ធ្វើ​នៅ​ក្នុង​ខែ​កុម្ភៈ​ខាងមុខនេះ។​


លោក​ឧត្ដមសេនីយ៍​ឯក​ មៀ​ច សុផាន់​ណា បាន​បញ្ជាក់​ឲ្យដឹងទៀតថា សហព័ន្ធ​បាន​ទទួល​កាំភ្លើង​ពី​រោងចក្រ CZ របស់​ប្រទេស​ឆែក គឺ​កាំភ្លើងខ្លី​ទាន់សម័យ​ចំនួន​៥​ដើម និង​កាំភ្លើង​វែង​២​ដើម​សម្រាប់​ប្រកួត។​


ប្រធាន​សហព័ន្ធ​រូប​នេះ​ក៏បាន​បញ្ជាក់​ឲ្យ​ដឹង​ដែរ​ថា មូល​ហេតុ​ដែល​សហព័ន្ធ​បាញ់​កាំភ្លើង​មិន​ទាន់​ដំណើរការ គឺ​ដោយសារ​អ្វីៗ​ត្រូវ​គិត​ទៅដល់​ផ្លូវច្បាប់ ត្រូវ​គិត​ពី​បញ្ហា​សុវត្ថិភាព និង​សន្តិសុខ​សង្គម។ សម្រាប់​ការប្រកួត​ថ្នាក់​ជាតិ​សាកល្បង​នា​ខែ​កុម្ភៈ​ខាងមុខនេះ​ គឺ​ធ្វើ​ក្នុង​ក្របខ័ណ្ឌ​កម្លាំង​ប្រដាប់​អាវុធ​ ព្រោះ​មិនទាន់​អាច​ឲ្យ​អ្នកចូលរួម​ប្រកួត ជា​មនុស្ស​ដែល​សហព័ន្ធ​មិនទាន់​ស្គាល់​អត្តសញ្ញាណ​បាន​នោះ​ឡើយ។​


លោក វ៉ា​ត់ ចំរើន ដែល​ជា​អនុប្រធាន​សហព័ន្ធ​បាញ់កាំភ្លើង​ដែរនោះ​បាន​បញ្ជាក់ថា កីឡា​បាញ់​កាំភ្លើង ជា​ប្រភេទ​កីឡា​អូឡាំពិក ដូចនេះ​លោក​បាន​សំណូមពរ​ឲ្យ​សហព័ន្ធ​រៀបចំ​កន្លែង​ហ្វឹកហាត់​មួយ​ជាបន្ទាន់ ទោះជា​ហាត់​នៅ​ក្រៅ​បន្ទប់​ក៏ដោយ​ ដើម្បី​ឲ្យ​គណៈកម្មាធិការ​ជាតិ​អូឡាំពិក​កម្ពុជា​សំណូមពរ​ទៅ​សហព័ន្ធ​អន្តរជាតិ​ឲ្យ​មក​ជួយ​បង្ហាត់​ដល់​កីឡាករ​របស់​កម្ពុជា។


លោក​អគ្គលេខាធិការ ក៏​ជំរុញ​ឲ្យ​សហព័ន្ធ​ប្រញាប់ប្រញាល់​រៀបចំ​លិខិតស្នាម​ទៅ​សហព័ន្ធ​តំបន់ ទ្វីប និង​អន្តរជាតិ ដើម្បី​ឲ្យ​គេ​ទទួលស្គាល់​យើង​ជា​សមាជិក​របស់​គេ​ងាយស្រួល​យើង​បាន​ទទួល​ជំនួយ​ពី​សហព័ន្ធ​ទាំងនោះ ក្នុង​ឋានៈ​ជា​សមាជិក​ស្របច្បាប់​របស់​គេ។


គួរ​បញ្ជាក់​ថា មកដល់ពេលនេះ​សហព័ន្ធ​កីឡា​បាញ់​កាំភ្លើង មាន​សមាជិក​ប្រតិបត្តិ​សរុប​ចំនួន​១៧​រូប និង​មាន​ទីប្រឹក្សា​បច្ចេកទេស​ជា​ជនជាតិ​បរទេស​ចំនួន​០២​រូប​៕​


Pisey-2016-01-15-full-E51


Pisey-2016-01-15-full-E55



សហព័ន្ធ​បាញ់​កាំភ្លើង​ ជ្រើសតាំង​សមាជិក​ប្រតិបត្តិ​២​រូប​បន្ថែម​ទៀត​

Post a Comment

0 Comments

Close Menu