ភ្នំពេញ ៖ អាវុធហត្ថរាជធានីបានចាត់បញ្ជូនអ្នកពាក់ព័ន្ធគ្រឿងញៀនទៅសាកសួរនៅសាលាដំបូងកាលពីព្រឹកថ្ងៃទី១៣ ខែកុម្ភៈ បន្ទាប់ពីកម្លាំងអាវុធហត្ថខណ្ឌពោធិ៍សែនជ័យ សហការជាមួយការិយាល័យស្រាវជ្រាវប្រឆាំងគ្រឿងញៀន បានធ្វើការឆែកឆេរកន្លែងម៉ាស្សាកោសជប់យីហោ៧៨៩ មួយកន្លែង ស្ថិតនៅភូមិក្បាលដំរី សង្កាត់កាកាប ខណ្ឌពោធិ៍សែនជ័យ ឃាត់ខ្លួនមនុស្សប្រុស-ស្រីចំនួន១១នាក់ កាលពីថ្ងៃទី១១ ខែកុម្ភៈ ឆ្នាំ២០១៥ តាមបទបញ្ជារបស់លោកឧត្តមសេនីយ៍ទោ រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានី។ ក្នុងការចាប់ខ្លួនជនសង្ស័យបានចំនួន១១នាក់ ប្រុស៥ និងស្រី៦នោះ សមត្ថកិច្ចដកហូតបានថ្នាំក្រាមពណ៌សចំនួន២៤កញ្ចប់តូច; ៦កញ្ចប់ធំស្មើរាប់រយកញ្ចប់តូច ព្រមទាំងថ្នាំពណ៌ក្រហម១កញ្ចប់តូច; ទូរស័ព្ទដៃចំនួន៨គ្រឿង រថយន្ត១គ្រឿង និងម៉ូតូ២គ្រឿង។ មន្ត្រីអាវុធហត្ថការិយាល័យស្រាវជ្រាវប្រឆាំងគ្រឿងញៀនរាជធានីបានបញ្ជាក់កាលពីព្រឹកថ្ងៃទី១៣ ខែកុម្ភៈថា ជនសង្ស័យទី១-ឈ្មោះ ពេជ្រ សុដានី ភេទស្រី អាយុ៤៧ឆ្នាំ ម្ចាស់ហាង ទី២-ឈ្មោះ ធី ភេទស្រី អាយុ២២ឆ្នាំ ទី៣-ឈ្មោះ ហេង ស្រស់ អាយុ២៥ឆ្នាំ ទី៤-ឈ្មោះ ហេង សុធី ភេទប្រុស អាយុ៤១ឆ្នាំ ទី៥-ឈ្មោះ ពេជ្រ និវ័ន ភេទប្រុស អាយុ៣០ឆ្នាំ ទី៦-ឈ្មោះ ម៉ែន អេនជី ភេទស្រី អាយុ២១ឆ្នាំ ទី៧-ឈ្មោះ កុយ វ៉ន់ ភេទប្រុស អាយុ១៩ឆ្នាំ ទី៨-ឈ្មោះ អឿន សុភា ភេទស្រី អាយុ២៧ឆ្នាំ ទី៩-ឈ្មោះ សៅ វិទូ ភេទប្រុស អាយុ២៣ឆ្នាំ ទី១០-ឈ្មោះ មឿន តយ ភេទស្រី អាយុ២៥ឆ្នាំ និងទី១១-ឈ្មោះ ឆេង ម៉េងហ៊ន ភេទប្រុស អាយុ២៩ឆ្នាំ។ ឥឡូវនេះការិយាល័យស្រាវជ្រាវប្រឆាំងគ្រឿងញៀនអាវុធហត្ថរាជធានីបានចាត់បញ្ជូនជនសង្ស័យទាំងទៅសាលាដំបូងដើម្បីចាត់តាមច្បាប់ការបន្តនៅថ្ងៃទី១៣ ខែកុម្ភៈ ឆ្នាំ២០១៥៕
វិមាន
0 Comments