ព្រះសីហនុ ៖ តូបលក់ដូរតូច-ធំចំនួន១០នៃផ្សារពាណិជ្ជកម្មខេត្តព្រះសីហនុបានរងការខូចខាតខណៈពេលរថយន្តមួយគ្រឿងដែលគេអះអាងថា មនុស្សជិះនៅក្នុងរថយន្តសុទ្ធសឹងមានស្ថានភាពស្រវឹងជោគជាំនោះ បានបើកបុកទាំងកំរោល កាលពីវេលាម៉ោងប្រមាណ០៣ទៀបភ្លឺ ថ្ងៃទី១៣ ខែកុម្ភៈ ឆ្នាំ២០១៥។ ប៉ុន្តែសំណាងល្អនៅក្នុងហេតុការណ៍ដ៏គួរឲ្យភ្ញាក់ផ្អើលនេះមិនបណ្ដាលឲ្យមានមនុស្សណាម្នាក់រងរបួសនោះទេ។ ក្រុមអ្នកប្រមឹកដែលជិះនៅក្នុងរថយន្ត ក្រោយពេលកើតហេតុភ្លាមៗ គេឃើញបើកទ្វាររថយន្តរួចរត់គេចខ្លួនបាត់ស្រមោលក្នុងពេលនោះផងដែរ។
ពាក់ព័ន្ធទៅនឹងហេតុការណ៍ខាងលើនេះ បើតាមប្រភពសន្តិសុខយាមផ្សារកើតហេតុបានប្រាប់ឲ្យដឹងថា មុនពេលកើតហេតុគេឃើញរថយន្តបង្កហេតុខាងលើនេះបានបើកយ៉ាងលឿនមកពីអតីតមហោស្រពចាស់គឺបើកសំដៅមកផ្សារពាណិជ្ជកម្ម លុះបើកមកដល់ចំណុចផ្លូវបំបែកជា៣ ក៏ស្រាប់តែរថយន្តនោះមិនបានកាច់ចង្កូតបទទៅផ្លូវណាមួយនោះទេ គឺបែរជាបើកតម្រង់ចូលផ្សារពាណិជ្ជកម្មតែម្តង ដោយបានបុករះបណ្ដាលឲ្យតូច-ធំចំនួនប្រមាណ១០តូប រួមនឹងសម្ភារៈនៅក្នុងតូបរងការខូចខាតយ៉ាងធ្ងន់ធ្ងររហូតបើកទៅមុខលែងរួចទើបឈប់។ ក្រោយបុករួចគេបានឃើញយុវជនចំនួន២នាក់បើកទ្វាររថយន្តចេញមកក្រៅរថយន្តក្នុងស្ថានភាពស្រវឹងជោគជាំ បន្ទាប់មកក៏បានដើរចេញបាត់ទៅបន្សល់ទុករថយន្តនៅកន្លែងកើតហេតុ។
សមត្ថកិច្ចចរាចរណ៍បានប្រាប់ឲ្យដឹងថា រថយន្តបង្កហេតុម៉ាកតូយូតាហាយព្រិត ពណ៌ស្ករពាក់ស្លាកលេខភ្នំពេញ2Q៣៤១៥ បើកបរដោយយុវជនម្នាក់និងអ្នករួមដំណើរម្នាក់(មិនស្គាល់ឈ្មោះ)បានរត់គេចខ្លួន។ លុះក្រោយមកខណៈពេលសមត្ថកិច្ចប៉ូលិសចរាចរណ៍ចាប់ផ្តើមយករថយន្តចេញពីកន្លែងកើតហេតុក្នុងគោលដៅនាំយកទៅរក្សាទុកដើម្បីធ្វើការដោះស្រាយតាមផ្លូវច្បាប់ ក៏ស្រាប់តែលេចមុខយុវជន២នាក់ ដោយម្នាក់ស្ថិតនៅក្នុងស្ថានភាពស្រវឹងជោគជាំបានមកស្រែកឡូឡាគំរាមសមត្ថកិច្ចប៉ូលិសហាមមិនឲ្យយករថយន្តពួកគេចេញទៅណានោះឡើយ ព្រមទាំងធ្វើការធ្វើការហាមប្រាមដល់អ្នកកាសែត ទូរទស្សន៍ មិនឲ្យទៅក្បែរថតរូបយកព័ត៌មានផងដែរ។ បើទោះជាមានការគំរាមកំហែងពីសំណាក់ជនប្រមឹកទាំងពីរដែលអះអាងថា ជាម្ចាស់រថយន្តបង្កហេតុនោះយ៉ាងណាក៏ដោយ ក៏សមត្ថកិច្ចប៉ូលិសនៅតែបន្តអនុវត្តន៍ច្បាប់ដោយនាំយករថយន្តបង្កទៅរក្សាទុកនៅការិយាល័យប៉ូលិសចរាចរណ៍ផ្លូវគោកដើម្បីធ្វើការដោះស្រាយ។ ចំណែកជនប្រមឹកទាំងពីរនាក់ខណៈពេលសមត្ថកិច្ចប៉ូលិសកំពុងនាំយករថយន្តបង្កហេតុទៅរក្សាទុកហើយធ្វើអ្វីប៉ូលិសមិនបានពួកគេក៏បានស្រែកស្តីឌឺដងថា ពួកឯងយកទៅ ចាំអញទៅយកមកវិញមិនទុកឲ្យលើសរយៈពេល១ថ្ងៃនោះទេ ហើយបញ្ហានេះបើអញថាហើយធ្វើមិនបាន អញនឹងកោសក់មួយចំហៀង ព្រោះអញមានខ្សែសុទ្ធសឹងអ្នកធំៗ៕
កោះពស់
0 Comments