បាត់ដំបង ៖ រថយន្តFusoមួយគ្រឿង រួមទាំងភេសជ្ជៈខារ៉ាបាវចំនួន២០០កេះ ត្រូវបានសមត្ថកិច្ចនៃការិយាល័យនគរបាលប្រឆាំងបទល្មើសសេដ្ឋកិច្ច សហការជាមួយកម្លាំងព្រហ្មទណ្ឌកម្រិតស្រាល
នៃស្នងការដ្ឋាននគរបាលខេត្តបាត់ដំបង ធ្វើការឃាត់ត្រង់ចំណុចក្បែរផ្លូវរថភ្លើង ស្ថិតក្នុងភូមិទួលតាឯក សង្កាត់ទួលតាឯក ក្រុងបាត់ដំបង កាលពីថ្ងៃទី១២ ខែកុម្ភៈ ឆ្នាំ២០១៥ វេលាម៉ោង១១ថ្ងៃត្រង់ បន្ទាប់ពីមានពាក្យបណ្ដឹងរបស់ក្រុមហ៊ុននាំចូលផ្តាច់មុខនូវប្រភេទភេសជ្ជៈខារ៉ាបាវនេះរួចមក។
លោកវរសេនីយ៍ឯក ម៉ៅ រង្សី នាយការិយាល័យនគរបាលប្រឆាំងបទល្មើសសេដ្ឋកិច្ចបានមានប្រសាសន៍ថា ក្រោយពីទទួលបាននូវពាក្យបណ្ដឹងរបស់ក្រុមហ៊ុននាំចូលផ្ដាច់មុខអំពីទំនិញភេសជ្ជៈខារ៉ាបាវដែលបានលើកឡើងថា មានឈ្មួញមួយចំនួនបានលបលួចនាំចូលនូវទំនិញ
ប្រភេទនេះដោយបានបំពាននឹងច្បាប់កម្មសិទ្ធិបញ្ញារួចមក លោកបានចាត់កម្លាំងរបស់លោក ដោយមានការចូលរួមសហការពីកម្លាំងការិយាល័យព្រហ្មទណ្ឌកម្រិតស្រាលបានចេញប្រតិបត្តិការល្បាតគ្រប់ច្រកល្ហកក្នុងក្រុងបាត់ដំបង ក៏បានប្រទះឃើញមានរថយន្តមួយគ្រឿងម៉ាកFusoពាក់ស្លាកលេខបាត់ដំបង3A0885 ដោយមានផ្ទុកទំនិញពេញរថយន្ត ក្នុងនោះក៏មានភេសជ្ជៈខារ៉ាបាវជាច្រើនកេះផងដែរ ដែលបានឈប់សុំចតនៅក្បែរផ្លូវរថភ្លើងត្រង់ចំណុចខាងលើ លោកក៏បានសុំគោលការណ៍ទៅនាយកដ្ឋាននគរបាលប្រឆាំងបទល្មើសសេដ្ឋកិច្ច ដើម្បីឲ្យកម្លាំងរបស់លោកធ្វើការឃាត់ទាំងរថយន្ត និងមនុស្សចំនួនពីរនាក់ដើម្បីនាំយកមកសាកសួរនៅការិយាល័យជំនាញនៃស្នងការដ្ឋាននគរបាលខេត្ត។ តាមការសារភាពរបស់អ្នកបើកបររថយន្តឈ្មោះ ខន សុខុម ហៅសំអូន ភេទប្រុស អាយុ
៣២ឆ្នាំ រួមនឹងព្រូឡានឈ្មោះ លឹម ប៊ុនធឿន ភេទប្រុស អាយុ៣៤ឆ្នាំ អ្នកទាំងពីររស់នៅភូមិខ្នាចរមាសឃុំរូងជ្រៃ ស្រុកថ្មគោល ដែលមានមុខរបរស៊ីឈ្នួលបើករថយន្តឲ្យឈ្មោះ ឈី រស់នៅភូមិនរា
ឃុំនរា ស្រុកសង្កែ បាននិយាយថា រូបគេទាំងពីរនាក់ត្រូវបានថៅកែឲ្យបើករថយន្តទៅដឹកទំនិញមួយចំនួន រួមទាំងភេសជ្ជៈខារ៉ាបាវចំនួន២០០កេះផងពីចំណុចឃ្លាំងស្តុកឡោ ម៉េងហ៊ួត ដែលមានទីតាំងនៅក្បែរផ្ទះប្អូនប្រាក់ លីហ៊ួន តាមបណ្តោយផ្លូវជាសុផារ៉ា រាជធានីភ្នំពេញយកមកប្រគល់ឲ្យឈ្មោះ អ៊ឹម សេង ជាអាជីវករលក់ទំនិញនៅភូមិទួលតាឯក ហើយក៏ត្រូវសមត្ថកិច្ចជំនាញឃាត់តែម្តង។
ចំពោះភេសជ្ជៈខារ៉ាបាវនេះមានច្បាប់ ឬមិនមានច្បាប់នោះគឺរូបគេទាំងពីរនាក់ពុំបានដឹងទេ ព្រោះគេគឺជាអ្នកស៊ីឈ្នួលបើករថយន្តឲ្យគេតែប៉ុណ្ណោះ។ ដោយយោងតាមពាក្យបណ្ដឹងរបស់ក្រុមហ៊ុនដែលទំនិញទាំងនេះមានការពាក់ព័ន្ធលើកម្មសិទ្ធិបញ្ញាផងនោះ លោកនាយការិយាល័យ ម៉ៅ រង្សី បានធ្វើការឃាត់រថយន្តមួយគ្រឿងនេះ រួមទាំងភេសជ្ជៈខារ៉ាបាវចំនួន២០០កេះជាបណ្ដោះអាសន្នដើម្បីចាត់ការបន្តទៅតាមផ្លូវច្បាប់៕
សោ និយមរ័ត្ន
0 Comments