ភ្នំពេញ ៖ គណៈបញ្ជាការឯកភាពខណ្ឌដង្កោ ដឹកនាំដោយលោក ចេង មុនីរ៉ា អភិបាលរងខណ្ឌដង្កោ កាលពីយប់ថ្ងៃទី១២ ខែកុម្ភៈ ឆ្នាំ២០១៥ បានដឹកនាំកម្លាំងចម្រុះ មានទាំងប៉ូលិស ប៉េអិម កម្លាំងសណ្ដាប់ធ្នាប់សាលាខណ្ឌប្រមាណជាង៥០នាក់បន្តចុះដាក់គោលដៅត្រួតពិនិត្យអាវុធជាតិផ្ទុះដើម្បីរក្សាការពារសុខសុវត្ថិភាពក្នុងសង្គម។
ការដាក់គោលដៅត្រួតពិនិត្យអាវុធជាតិផ្ទុះ បកស្កុតខ្មៅរថយន្ត ក៏ដូចជាត្រួតពិនិត្យយានយន្តនេះ ប្រព្រឹត្តឡើងនៅតាមបណ្តោយផ្លូវ២១៧ មុខសាលាខណ្ឌដង្កោ ស្ថិតក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។
លោក ចេង មុនីរ៉ា អភិបាលរងខណ្ឌដង្កោប្រាប់ឲ្យដឹងថា ការដាក់គោលដៅត្រួតពិនិត្យអាវុធជាតិផ្ទុះ ក៏ដូចជា បកស្កុតខ្មៅរថយន្ត និងត្រួតពិនិត្យយានជំនិះនាពេលនេះ គឺដើម្បីរក្សាការពារសុខ សុវត្ថិភាពក្នុងសង្គម រួមមាន កម្លាំងសរុប៥២នាក់ ក្នុងនោះប៉ូលិស២៣នាក់ កម្លាំងអាវុធហត្ថ០៨នាក់ សណ្ដាប់ធ្នាប់សាលា២១នាក់។
លោកប្រាប់បន្តថា ប្រតិបត្តិការចុះដាក់គោលដៅនេះប្រព្រឹត្តិឡើងចាប់ពីវេលាម៉ោង១៩ រហូតដល់វេលាម៉ោង២០ទើបបញ្ចប់ ដោយត្រួតពិនិត្យបានម៉ូតូសរុប៩៦គ្រឿង អប់រំមនុស្សបាន០៧នាក់ រថយន្ត៣៧គ្រឿង បកប្លាស្ទិកខ្មៅរថយន្ត០១គ្រឿង ម៉ូតូគ្មានកញ្ចក់មើលក្រោយ០៧គ្រឿង គ្មានមួកសុវត្ថិភាព១៨នាក់។
លោកអភិបាលរងខណ្ឌដង្កោប្រាប់បញ្ជាក់ឲ្យដឹងថា ប្រតិបត្តិការចុះដាក់គោលដៅត្រួតពិនិត្យអាវុធជាតិផ្ទុះ ក៏ដូចជាបកប្លាស្ទិកខ្មៅរថយន្ត និងត្រួតពិនិត្យយានជំនិះនេះ គឺគណៈបញ្ជាការឯកភាពខណ្ឌដង្កោតែងតែធ្វើឡើងជាប្រចាំដើម្បីរក្សាសន្តិសុខ សុវត្ថិភាពជូនសង្គមជាតិ៕
រ៉ាវុទ្ធ
0 Comments