សៀមរាប ៖ ផ្ទុះអំពើហិង្សាដេញកាប់គ្នាពេញមុខមន្ទីរពេទ្យគន្ធបុប្ផាផ្នែកអាគាខាងក្រោយ ពីសំណាក់អ្នករត់រ៉ឺម៉ក បណ្ដាលមកពីដណ្ដើមម៉ូយគ្នា និងបានធ្វើឲ្យប្រជាពលរដ្ឋមានការភិតភ័យ ខណៈពេលដែលជំលោះដោយហិង្សាដេញកាប់ប្រតាយប្រតប់គ្នា មានទាំងអាវុធជាប់នឹងដៃហេតុការណ៍នេះបានកើតឡើងកាលពីវេលាម៉ោង៨និង៣០នាទីព្រឹក ថ្ងៃទី១៣ ខែកុម្ភៈ ឆ្នាំ២០១៥។
តាមប្រភពព័ត៌មាននៅកន្លែងកើតហេតុបានឲ្យដឹងថា នៅច្រកអាគាររបស់មន្ទីរពេទ្យគន្ធបុប្ផា សកម្មភាពការដណ្ដើមម៉ូយគ្នាជាអានាធិបតេយ្យ ថែមទាំងបង្កជំលោះគ្នាជាញឹកញាប់ ជាក់ស្តែងការផ្ទុះអំពើហិង្សារបស់អ្នករត់រ៉ឺម៉ក ក៏ដោយសារតែការដាក់វេន ដណ្ដើមម៉ូយគ្នា និងបានប្រកែកគ្នារវាងគូភាគីដែលត្រូវបានគេស្គាល់ឈ្មោះ ថុល ដែលបានតាំងខ្លួនជាអ្នករៀបចំវេនដឹកអ្នកជំងឺត្រឡប់ទៅផ្ទះ បានប្រយុទ្ធគ្នាយ៉ាងស៊ីសាច់ហុតឈាមឈានដល់ការប្រើអាវុធមានពូថៅដៃមួយ ដេញកាប់ទៅលើលោក កែវ អ៊ីម រស់នៅភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប ក្នុងនោះសកម្មភាពប្រដាល់ក្រៅសង្វៀនបានប្រយុទ្ធគ្នាចំនួន២លើកទើបមានការបំបែក។
ក្រោយពីកើតហេតុលោក កែវ អ៊ីម បានទៅដាក់ពាក្យបណ្ដឹងនៅប៉ុស្តិ៍រដ្ឋបាលសង្កាត់គោកចក ក្នុងនោះមហាជនទូទៅបានសំណូមពរដល់អធិការក្រុងសៀមរាបជួយរៀបចំការពារសណ្ដាប់ធ្នាប់នៅចំនុចអាគារច្រកចេញអ្នកជំងឺរបស់មន្ទីរពេទ្យគន្ធបុប្ផា ដោយសារតែចំណុចនេះមានរឿងជំលោះមិនចេះចប់មិនចេះហើយ ព្រមទាំងជេរបញ្ជោរគ្នាស្ទើររាល់ថ្ងៃ ពេលខ្លះឈានដល់ការវាយតបគ្នាទៀត និងសូមឲ្យថែរក្សាភាពស្ងប់ស្ងាត់ ព្រោះទីនេះជាមន្ទីរពេទ្យ៕
ប៊ុន រដ្ឋា
0 Comments