ភ្នំពេញ ៖ កម្មករ-កម្មការិនីរោងចក្រកាត់ដេរ (យីហោ) ធាន យាន បានរត់ជាន់ជើងគ្នាទាំងព្រឹក ដោយសារការឆេះកម្ទេចក្រណាត់ក្នុងរោងចក្រ ដែលសមត្ថកិច្ចសន្និដ្ឋានថា បង្កឡើងដោយសារតែឡកម្ដៅយកចំហាយសម្រាប់អ៊ុតខោអាវនៅក្បែរនោះខ្ទាតកម្ទេចភ្លើងទៅប៉ះគំនរក្រណាត់។
រោងចក្រកាត់ដេរ (យីហោ) ធាន យាន ដែលបង្កការឆេះកម្ទេចក្រណាត់ធ្វើឲ្យកម្មករ-កម្មការិនីមានការភ្ញាក់ផ្អើលរត់ជាន់ជើងគ្នាទាំងព្រឹកនោះ គឺមានទីតាំងស្ថិតនៅតាមបណ្តោយផ្លូវ២១៧ ភូមិខ្វាលិច សង្កាត់ដង្កោ ខណ្ឌដង្កោ រាជធានីភ្នំពេញ កាលពីវេលាម៉ោង៨និង៤០នាទីព្រឹកថ្ងៃទី១៣ ខែកុម្ភៈ ឆ្នាំ២០១៥។
កម្មករដែលបម្រើការក្នុងរោងចក្រខាងលើប្រាប់ឲ្យដឹងថា មុនពេលកើតហេតុ ក្រុមពួកគាត់មានគ្នាបីទៅបួននាក់ បានកំពុងធ្វើការនៅក្បែរនោះ លុះមួយសន្ទុះក្រោយមកស្រាប់តែកម្ទេចភ្លើងហុយចេញពីបំពង់ផ្សែងឡកម្ដៅ ដែលដុតសម្រាប់យកកម្ដៅអ៊ុតខោអាវនោះហុយទៅប៉ះនឹងកម្ទេចគំនរក្រណាត់នៅជិតនោះ បណ្ដាលឲ្យឆាបឆេះ បង្កការភ្ញាក់ផ្អើលដល់កម្មករ-កម្មការិនីដែលកំពុងធ្វើការក្នុងរោងចក្ររត់ជាន់ជើងគ្នារកទីកន្លែងសុវត្ថិភាព។
កម្មកររោងចក្រប្រាប់បន្តថា ដោយឃើញបែបនេះពួកគេបានរាយការណ៍ប្រាប់ថៅកែ និងបុគ្គលិករោងចក្រនាំគ្នាទាយទុយោទឹក ក៏ដូចជាបំពង់ពន្លត់អគ្គីភ័យជួយបាញ់ពន្លត់អស់ជាច្រើនបំពង់ទើបអណ្ដាតភ្លើងរលត់ទៅវិញទាំងស្រុង ដោយមិនអាចរាលដាលដល់ផ្ទៃរោងចក្រទាំងមូលនោះទេ។
កម្មកររោងចក្រខាងលើប្រាប់បន្តទៀតថា នៅក្នុងគ្រោះអគ្គីភ័យឆាបឆេះគំនរក្រណាត់ នៅក្នុងរោងចក្រ យីហោ ធាន យាន នេះ ក៏មានការភ្ញាក់ផ្អើលដល់រថយន្តពន្លត់អគ្គីភ័យប្រចាំ ខណ្ឌដង្កោចុះអន្តរាគមន៍ចំនួន០២គ្រឿងផងដែរ ប៉ុន្តែមិនបានបាញ់ទឹកនោះទេ គឺដោយសារពួកគេទាយទុយោទឹក ក៏ដូចជាបំពង់ពន្លត់អគ្គីភ័យបាញ់ពន្លត់អណ្ដាតភ្លើងរលត់ទៅវិញទាំងស្រុងក្នុងរយៈពេលប៉ុន្មាននាទីក្រោយមក។
នៅក្នុងហេតុការណ៍គ្រោះអគ្គីភ័យនេះផងដែរ សមត្ថកិច្ចដែលចុះដល់កន្លែងកើតហេតុប្រាប់ឲ្យដឹងថា បង្កឡើងដោយសារការធ្វេសប្រហែងរបស់រោងចក្រ គឺផ្ទុកគំនរក្រណាត់នៅជិតឡកម្ដៅ ទើបបានជាហុយកំទេចភ្លើងបណ្ដាលឆាបឆេះយ៉ាងនេះ។ ករណីនេះសំណាងហើយដែលមិនឆាបឆេះរោងចក្រទាំងមូលនោះ ប្រសិនបើអណ្ដាតភ្លើងឆេះផ្ទៃរោងចក្រទាំងមូល តើត្រូវខាតបង់ទ្រព្យសម្បត្តិអស់លុយកាក់ចំនួនប៉ុន្មាន? ប្រការទាំងនេះថៅកែរោងចក្រត្រូវគិតឲ្យមែនទែន គួររៀបចំកន្លែងទុកដាក់របស់របរក្នុងរោងចក្រឲ្យមានសុវត្ថិភាពល្អ ចៀសវាងកើតមានហេតុការណ៍គ្រោះអគ្គីភ័យដូចខាងលើបន្តទៀត៕
រ៉ាវុទ្ធ
![](https://www.pinterest.com/pin/create/button/?url=https://cambodia-breaking-news.blogspot.com/2015/02/update_12.html&media=https://blogger.googleusercontent.com/img/b/R29vZ2xl/AVvXsEjj9n_j42t4ZRBfBOmmwlQ52_uQpo9e_V2l1LBywMf6arTi0Ydcnv60C9mWPlgNJYDZnShwrdwF_hxzB_iTZx_jP-O_iTrCJiDrgzuYKtBpcOuvD7I7zu8cgoZeHKeJZ7OQ2w-m0TJi7xo/s320/Pisey-13-02-2015-full-S-779437.jpg&description=ឆេះកម្ទេចក្រណាត់ក្នុងរោងចក្រកាត់ដេរ"ធានយាន" ផ្អើលកម្មកររត់ជាន់ជើងគ្នា(Update)){kind=link}
0 Comments