ក្រុមសម្ដែង"អេពិក" ដែលជាក្រុមលាយចម្រុះដោយសិល្បករ-សិល្បការិនីជាជនពិការគ.ថ្លង់ ស្វិតដៃជើង ត្រៀមចេញVideoចម្រៀងកាយវិការវ៉ុលថ្មី ដែលមានឈ្មោះថា (UP TOWN FUNK) នាពេលខាងមុខឆាប់ៗនេះ។
កញ្ញា អុន សុខលី ប្រធានអង្គការអេពិកអាត ( Epic Arts Cambodia ) បាននិយាយក្នុងសន្និសីទកាសែតនាព្រឹកថ្ងៃទី១៣ ខែកុម្ភៈ ឆ្នាំ២០១៥នេះថា Videoចម្រៀងកាយវិការUP TOWN FUNK ឬទីក្រុងទាន់សម័យជាបទអាមេរិកកាំង ត្រូវបានថតរយៈពេល៤ថ្ងៃនៅក្នុងខេត្តកំពត ដោយរួមការសម្ដែងដោយក្រុមសម្ដែងអេពិក ក្រោមជំនួយឧបត្ថម្ភពីអង្គការUNICEF ហើយគ្រោងចេញផ្សាយនៅដើមសប្ដាហ៍ក្រោយនេះហើយ តាមប្រព័ន្ធYoutube។
ប្រធានអង្គការ Epic Arts Cambodiarរូបនេះបានឲ្យដឹងថា ការថតសម្ដែងចម្រៀងវ៉ុលថ្មីនេះ ចង់បង្ហាញឲ្យឃើញពីសមត្ថភាព និងភាពប៉ិនប្រសប់របស់ក្រុមសម្ដែងអេពិក ដែលពួកគេសុទ្ធតែជាអ្នកពិការ ក៏ដូចជាជំនះទៅនឹងពាក្យថាជនពិការមិនអាចធ្វើអ្វីបាននោះ តែធាតុពិតជនពិការមានសមត្ថភាពអាចធ្វើបានមនុស្សធម្មតាដែរ។
ចំពោះបទភ្លេងដែលក្រុមសម្ដែងអេពិកយកមកថតនេះ ត្រូវបានលោក អ៊ូ ប៊ុនថេង ដែលជាប្រធានផ្នែកប្រតិបត្តិរបស់អង្គការអេពិកប្រាប់ថា គឺយកតាមរបស់គេទាំងស្រុង ដោយសម្ដែង និងត្រាប់កាយវិការតាមមិនឲ្យខុសទេ។ ពាក់ព័ន្ធទៅនឹងសំណួរដែរថា តើការយករបស់គេមកថតនេះ មានការចោទប្រកាន់អំពីការលួចកម្មសិទ្ធិបញ្ញាឬយ៉ាងណានោះ កញ្ញា អុន សុខលី បញ្ជាក់ថា គឺពុំមានបញ្ហាអ្វីឡើយ ដោយសារម្ចាស់ដើមចម្រៀងនេះគេចង់ឲ្យចម្រៀងរបស់គេមានភាពល្បីដែរ។
អង្គការអេពិកអាត ជាអង្គការក្រៅរដ្ឋាភិបាលមួយដែលធ្វើការជាមួយអ្នកពិការ និងអ្នកមិនពិការ ដោយបង្កើតឡើងក្នុងគោលបំណង៣ គឺទី១-ការអប់រំបញ្ចូលគ្នារវាងអប់រំ និងសិល្បៈដល់ជនពិការឲ្យពួកគេមានអាជីពជាអ្នកសម្ដែងសិល្បៈចម្រុះ ដូចជាការសម្ដែងល្ខោន ចម្រៀង គំនូរជាដើម។ ទី២-ដើម្បីបញ្ចូលសិល្បៈទៅក្នុងសហគមន៍ផ្សព្វផ្សាយដល់ប្រជាពលរដ្ឋឲ្យពួកគាត់បានយល់ដឹងពីបញ្ហាសង្គម និងទី៣-ដើម្បីរកប្រាក់ចំណូលតាមរយៈអាជីវកម្មរបស់ក្រុមសិល្បៈជនពិការចម្រុះនេះ ដែលចេញសម្ដែងទាំងនៅក្រៅប្រទេស និងក្នុងប្រទេសតាមតំបន់ផ្សេងៗទូទាំងប្រទេស។
កញ្ញាបានឲ្យដឹងបន្ថែមទៀតថា ការដែលក្រុមសម្ដែងអេពិកមានឧកាសចេញVideoកាយវិការថ្មីនេះ ក៏ដោយសារតែភាពជោគជ័យពីការចេញវ៉ុលលើកទី១Happyរបស់ក្រុមអេពិកនេះ ដោយមានអ្នកគាំទ្ររហូតដល់ជាង១០ម៉ឺននាក់ ខណៈបទដើមរបស់គេចេញ៦ខែ មានអ្នកគាំទ្រចំនួនជាង២១១លាននាក់។ ដោយសារតែបែបនេះហើយទើបអង្គការUNICEF បានលូកដៃជួយឧបត្ថម្ភជាថវិកាសម្រាប់ការផលិតលើកទី២នេះ ដែលគ្រោងចេញផ្សាយនៅដើមសប្ដាហ៍ក្រោយនេះ។
គួរបញ្ជាក់ថា អង្គការអេពិកអាត បានបណ្តុះបណ្តាលជនពិការចម្រុះឲ្យមានអាជីពជាអ្នកសម្ដែង អ្នកចម្រៀង និងសិល្បៈផ្សេងៗបាន២ជំនាន់ហើយ ដែលលើកទី១ បណ្ដុះបាន៨នាក់ និងលើកទី២ ដែលនឹងបញ្ចប់នាដើមខែមីនាខាងមុខនេះ បណ្ដុះបាន៦នាក់ ដែលជាក្រុមដែលកំពុងថតVideoទី២នេះ៕
វិសិទ្ធ
![](https://www.pinterest.com/pin/create/button/?url=https://cambodia-breaking-news.blogspot.com/2015/02/video.html&media=https://blogger.googleusercontent.com/img/b/R29vZ2xl/AVvXsEgidTAwIB8N_JwxV43SvgugM2CsuwIookY2-mFQxPuoYNP-i1J5PUUaGgmxWA_Wbq76rKvkCHiBuP5awVDR32a4e8UApjh4JqjlDOZ3dNTy1orT1Edh2RJwj9nP45ZG8sOqDWGjZ5SFYvI/s320/Pisey-13-02-2015-full-W3-781962.jpg&description=ក្រុមសម្ដែង"អេពិក" ត្រៀមចេញVIDEOចម្រៀងកាយវិការវ៉ុលថ្មី){kind=link}
0 Comments