ប្រទេស​ប៉ា​រ៉ា​ហ្គា​យ​ នឹង​មាន​ប្រធានាធិបតី​ជា​ស្ត្រី​លើកដំបូង

ប្រទេស​ប៉ា​រ៉ា​ហ្គា​យ ​នឹងមាន​ប្រធានាធិបតី​ជា​ស្រី្ត​លើកដំបូង​នៅក្នុង​ប្រវត្តិសាស្ត្រ​របស់ខ្លួន​បើទោះបីជា​បណ្តោះអាសន្ន​ក៏ដោយ ​បន្ទាប់ពី​មេដឹកនាំ​ផុត​អាណត្តិ​លោក Horacio Cartes បាន​លាឈប់​មុនពេល​កំណត់​កាលពី​ថ្ងៃ​ចន្ទ​។​

លោកស្រី​អនុ​ប្រធានាធិបតី Alicia Pucheta អាយុ​៦៨​ឆ្នាំ​នឹងត្រូវ​បំពេញ​អាណត្តិ​របស់លោក Cartes បន្ទាប់ពី​លោក​បាន​លាលែង​ពី​តំណែង​ដើម្បី​ក្លាយទៅជា​សមាជិក​ព្រឹទ្ធសភា​មួយរូប​។​

នៅ​ថ្ងៃទី​១៥​ខែសីហា អ្នក​អភិរក្សនិយម​លោក Mario Abdo Benitez ដែល​បាន​ជាប់ឆ្នោត​កាលពី​ថ្ងៃទី​២២​ខែមេសា​នឹង​ចាប់ផ្តើម​អាណត្តិ​៥​ឆ្នាំ​របស់គាត់​ក្នុងនាម​ជា​ប្រធានាធិបតី​នៃ​ប្រទេស​ដែល​ក្រីក្រ​បំផុត​មួយ​ក្នុង​តំបន់​អាមេរិក​ឡាទីន​។​

សភា​នឹង​បញ្ជាក់​ពី​ការលាលែង​តំណែង​របស់លោក Cartes ហើយ​ប្រកាស​លោកស្រី Pucheta ជា​ប្រធានាធិបតី​ស្តីទី​នៅ​ថ្ងៃ​ពុធ​។​

ក្នុងនាម​ជា​អ្នក​ប្រឆាំងនឹង​ច្បាប់​នៃ​ការ​រំលូតកូន​, លោកស្រី Pucheta គឺ​មកពី​គណបក្ស​ស្ដាំនិយម Colorado ដែល​បាន​កាន់អំណាច​នៅក្នុង​ទីក្រុង Asuncion ជាច្រើន​ទសវត្ស​មកហើយ​។​

ប្រទេស​ប៉ា​រ៉ា​ហ្គា​យ​មាន​ស្ត្រី​ត្រឹមតែ​៨​នាក់​ប៉ុណ្ណោះ​ក្នុងចំណោម​សមាជិក​ព្រឹទ្ធសភា​៤៥​រូប​របស់ខ្លួន​និង​១១​នាក់​ក្នុងចំណោម​មនុស្ស​៨០​នាក់​នៃ​សភា​ជាន់​ទាប​។​
​
ការលាលែង​ពី​តំណែង​របស់លោក Cartes ត្រូវបាន​គេ​រំពឹងទុក​ចាប់តាំងពី​គាត់​ត្រូវបាន​ជ្រើសតាំង​ឲ្យ​ទៅ​ព្រឹទ្ធសភា​នៅក្នុង​ការបោះឆ្នោត​កាលពី​ខែមេសា​មកម្ល៉េះ​។ សមាជិក​ព្រឹទ្ធសភា​ថ្មី​នឹងត្រូវ​ស្បថ​ចូលកាន់​តំណែង​នៅ​ថ្ងៃទី​៣០​ខែមិថុនា​។​

ប្រទេស​ប៉ា​រ៉ា​ហ្គា​យ​បាន​រីករាយ​នឹង​កំណើនសេដ្ឋកិច្ច​ដ៏​ល្អ​អំឡុងពេល​ការ​កាន់តំណែង​រយៈពេល​ប្រាំ​ឆ្នាំ​របស់លោក Cartes ប៉ុន្តែ​បាន​បរាជ័យ​ក្នុងការ​លុបបំបាត់​ភាពក្រីក្រ អំពើពុករលួយ​និង​ការជួញដូរ​គ្រឿងញៀន​។​

វា​នៅតែ​ជា​ទឹកដី​នៃ​ភាព​ខ្វែងគំនិត​គ្នា​បន្ទាប់ពី​របប​ផ្តាច់ការ​ឆ្នាំ ១៩៥៤-១៩៨៩​របស់លោក​ឧត្ដមសេនីយ៍ Alfredo Stroessner៕ AFP

​

Source: Kampuchea Thmey Daily