ភ្នំពេញ ៖ សមាជិក សមាជិកា ភាគច្រើនមកពីអតីតគណបក្សសង្គ្រោះជាតិ និងគណបក្សពីរផ្សេងទៀតចំនួន ១២០៦ នាក់ បានសម្រេចចិត្តមករួមរស់ជាមួយគណបក្សប្រជាជនកម្ពុជា ស្រុកកញ្ជ្រៀច ខេត្តព្រៃវែង។
ពិធីទទួលស្គាល់ និងសំណេះសំណាលជាមួយបងប្អូនទាំង ១២០៦ នាក់នេះ បានធ្វើឡើងនៅថ្ងៃទី២៧ ខែឧសភា នៅចំណុចឃុំថ្មរពូន ស្រុកកញ្ជ្រៀច ខេត្តព្រៃវែង ក្រោមអធិបតីភាពលោកនាយឧត្តមសេនីយ៍ ដាំ វុទ្ធី អនុប្រធានក្រុមការងារគណបក្សប្រជាជនកម្ពុជា ចុះជួយស្រុកកញ្ជ្រៀច និងជាតំណាងដ៏ខ្ពង់ខ្ពស់លោកនាយឧត្តមសេនីយ៍ នេត សាវឿន។
យោងតាមប្រភពព័ត៌មានពីលោក ដួង សុខខេង អនុប្រធានក្រុមការងារគណបក្សប្រជាជនកម្ពុជា ចុះជួយឃុំថ្មរពូន បានមានប្រសាសន៍ថា ថ្ងៃនេះក្រុមការងារគណបក្សប្រជាជនកម្ពុជា ចុះជួយស្រុកកញ្ជ្រៀច ខេត្តព្រៃវែង បានរៀបចំពិធីសំណេះសំណាលជាមួយបងប្អូនសមាជិក សមាជិកា មកពីអតីតគណបក្សសង្គ្រោះជាតិ គណបក្សហ៊្វុនស៊ិប៉ិច និង គណបក្សសម្ព័នដើម្បីប្រជាធិបតេយ្យ សរុបចំនួន ១២០៦ នាក់ មកពីឃុំចំនួន ៨ ក្នុងស្រុកកញ្ជ្រៀច ខេត្តព្រៃវែង។
ជួបជាមួយបងប្អូនទាំង ១២០៦ នាក់ លោក ដាំ វុទ្ធី តំណាងដ៏ខ្ពង់ខ្ពស់លោកនាយឧត្តមសេនីយ៍ នេត សាវឿន បានសំដែងនូវក្តីរំភើបរីករាយ ព្រោះតែបានទទួលសមាជិកថ្មីចំនួន ១២០៦ នាក់ ដែលសុទ្ធសឹងមកពីអតីតបក្សប្រឆាំងតែម្តង។ លោកប្រធានគណៈអធិបតីបានបង្ហាញនូវទឹកចិត្តរីករាយ ព្រោះតែបងប្អូនសមាជិកថ្មីទាំង ១២០៦ នាក់ បានចាកចេញពីអតីតដែលពួកគាត់ធ្លាប់គាំទ្រ ប៉ុន្តែទីបំផុតពួកគាត់បានដឹងច្បាស់ពីទង្វើមេបក្សរបស់គាត់ គឺជាជនក្បត់ជាតិ ក្បត់ប្រជាជន ទើបពួកគាត់សម្រេចចិត្តចាកចេញពីបក្សពួកគាត់មករួមរស់ជាមួយគណបក្សប្រជាជនកម្ពុជាវិញ។
ក្នុងពិធីសំណេះសំណាលនោះដែរ លោក ដាំ វុទ្ធី បានពាំនាំនូវការសាកសួរសុខទុក្ខរបស់បងប្អូនសមាជិកថ្មីទាំង ១២០៦ នាក់ ពីសំណាក់លោកនាយឧត្តមសេនីយ៍ នេត សាវឿន ទៀតផង ហើយក្នុងនោះ លោក ដាំ វុទ្ទី បានសំណូមពរដល់បងប្អូនប្រជាពលរដ្ឋក្នុងស្រុកកញ្ជ្រៀច ខេត្តព្រៃវែង ត្រូវរូតរះទៅចូលរួមបោះឆ្នោតសកល ដែលប្រព្រឹត្តិធ្វើឡើងនៅថ្ងៃទី២៩ ខែកក្កដា ឆ្នាំ ២០១៨ ខាងមុខ និងគូសឲ្យចំគណបក្សប្រជាជនកម្ពុជារបស់យើង ដើម្បីឲ្យគណបក្សប្រជាជនកម្ពុជា បានទទួលជ័យជំនះលើសលប់លើបក្សដ៏ទៃ និងសំខាន់ជាងនេះ គណបក្សប្រជាជនកម្ពុជា បានដឹកនាំប្រទេសជាតិយើងឲ្យរីកចម្រើនខ្លាំងជាងនេះ។ ក្នុងពិធីនេះដែរ លោក ដាំ វុទ្ធី បាននាំយកវត្ថុអនុស្សាវរីយ៍ជាច្រើនជូនដល់សមាជិក សមាជិកាថ្មីទាំង ១២០៦ នាក់ និងបញ្ចប់ទៅដោយក្តីរីករាយ និងស្និទ្ធស្នាលបំផុត៕ 
Source: Kampuchea Thmey Daily
0 Comments