បាត់ដំបង ៖ ផ្លូវរថភ្លើងដឹកអ្នកដំណើរពីស្ថានីយបាត់ដំបង-ពោធិ៍សាត់ និងពីស្ថានីយពោធិ៍សាត់-បាត់ដំបង ត្រូវបានសម្ពោធដាក់ឲ្យប្រើប្រាស់ជាបណ្ដោះអាសន្ន កាលពីថ្ងៃអង្គារ ទី២៩ ខែឧសភា ឆ្នាំ២០១៨ ក្រោមវត្តមានលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន។
ពិធីសម្ពោធដាក់ឲ្យប្រើប្រាស់ជាបណ្តោះអាសន្ន នូវផ្លូវរថភ្លើងដឹកអ្នកដំណើរពីស្ថានីយបាត់ដំបង-ពោធិ៍សាត់ និងពីស្ថានីយពោធិ៍សាត់-បាត់ដំបងនេះ ប្រព្រឹត្តឡើងដោយមានការចូលរួមពីមន្ត្រីរាជការ និងប្រជាពលរដ្ឋជាច្រើនរូបផងដែរ។ ផ្លូវរថភ្លើងពីស្ថានីយបាត់ដំបង-ពោធិ៍សាត់ ត្រូវបានសម្ពោធដាក់ឲ្យប្រើប្រាស់ជាបណ្ដោះអាសន្ននេះមានប្រវែងសរុប ១០៧ គីឡូម៉ែត្រ ដែលក្នុងនោះប្រវែង ៧៥ គីឡូម៉ែត្រ ស្ថិតក្នុងខេត្តបាត់ដំបង និងប្រវែង ៣២ គីឡូម៉ែត្រ ស្ថិតក្នុងខេត្តពោធិ៍សាត់។
ចំពោះស្ថានីយដែលត្រូវឆ្លងកាត់មានចំនួន ១៦ ស្ថានីយ ដូចជា បាត់ដំបង អូរដំបង អូរស្រឡៅ រាំងកេសី ស្វាយជាតិ ភ្នំធិបតី គោកត្រុំ កោះចារ មោងឫស្សី ព្រៃស្វាយ កាឡោមពុក ស្វាយដូនកែវ បឹងខ្នារ ត្រពាំងជង ស្នាមព្រះ និងពោធិ៍សាត់ ក្នុងនោះខេត្តបាត់ដំបងមាន ១១ ស្ថានីយ និងខេត្តពោធិ៍សាត់មាន ៥ ស្ថានីយ។
សូមបញ្ជាក់អោយដឹងថា ផ្លូវដែកភាគខាងជើងរាជធានីភ្នំពេញ ចាប់ពីរាជធានីភ្នំពេញ រហូតដល់ក្រុងប៉ោយប៉ែត ព្រំដែនថៃ មានប្រវែងសរុប ៣៨៦ គីឡូម៉ែត្រ ត្រូវបានសាងសង់ឡើងអំឡុងឆ្នាំ ១៩២៩ ដល់ឆ្នាំ ១៩៤២ ក្នុងសម័យអាណានិគមបារាំង។ ក៏ប៉ុន្តែផ្លូវដែកនេះត្រូវផ្អាកលែងដំណើរការ ដោយសារតែសង្គ្រាមអំឡុងឆ្នាំ ១៩៧០ និងបន្តដល់សម័យខ្មែរក្រហម។
ក្រោយការរំដោះចេញពីរបបខ្មែរក្រហម មានការជួសជុលស្តារឡើងវិញ ហើយដាក់ឲ្យដំណើរការរថភ្លើង ភ្នំពេញ-ប៉ោយប៉ែត និង ភ្នំពេញ-ខេត្តព្រះសីហនុ តែមិនដំណើរការដោយរលូនទេ។ យ៉ាងណាក៏ដោយ ក្នុងដំណាក់កាលការស្តារឡើងវិញនូវកំណាត់ផ្លូវដែកពីភ្នំពេញ រហូតដល់ក្រុងប៉ោយប៉ែត ខេត្តបន្ទាយមានជ័យ នៅពេលនេះបានចំណាយថវិកាប្រមាណ ៩៦,៦ លានដុល្លារអាមេរិក។ ក្នុងនោះទឹកប្រាក់ប្រមាណ ១៣ លានដុល្លារ ជាជំនួយរបស់ធនាគារអភិវឌ្ឍន៍អាស៊ី ADB ហើយក្រៅពីនោះជាថវិការបស់រាជរដ្ឋាភិបាលកម្ពុជា៕
Source: Kampuchea Thmey Daily
0 Comments