កំពង់ធំ៖ យុវជនម្នាក់ត្រូវបានជាប់ខ្នោះ ដោយសារតែប្រើល្បិចលួងលោមក្មេងស្រីវ័យ ១៦ ឆ្នាំម្នាក់ កុហកថាឪពុកនាងមករង់ចាំនៅក្នុងបន្ទប់ផ្ទះសំណាក់ ក្រោយពីបាននាំក្មេងស្រីឲ្យចូលក្នុងបន្ទប់ហើយថាឪពុកនាងមកឥឡូវហើយ ស្របពេលដែលក្មេងស្រីគេងនៅលើគ្រែ អាថ្លើមថ្លៃបានយកខ្នើយបិទមុខនាង ហើយចាប់រំលោភបានសម្រេច។
តាមការរៀបរាប់របស់ក្មេងស្រីរងគ្រោះបានឲ្យដឹងថា គ្រួសារនាងនិងជនសង្ស័យធ្វើការនៅកន្លែងជាមួយគ្នា គឺជាកម្មករបេះផ្លែស្វាយចន្ទី នៅឃុំក្រយា ស្រុកសន្ទុក ខេត្តកំពង់ធំ លុះដល់ថ្ងៃកើតហេតុដែលជាថ្ងៃបើកលុយ ឪពុកនាងពឹងពាក់ជនសង្ស័យអោយឌុបកូនស្រីទៅបើកលុយពីថៅកែនៅផ្សារកំពង់ថ្ម ដូចយកពងមាន់មកផ្ញើក្អែក។
នាងបានបន្តថា នៅពេលដែលនាងជិះម៉ូតូមកជាមួយជនសង្ស័យ មកដល់ពាក់កណ្តាលផ្លូវជនសង្ស័យបានឈប់ម៉ូតូកណ្តាលព្រៃបម្រុងចាប់នាងរំលោភ តែនាងបានលោតចុះពីលើម៉ូតូហើយរត់ តែជនសង្ស័យបានអង្វរនាងដោយសន្យាថាមិនធ្វើអោយនាងពិបាកចិត្តទេ កុំភ័យជឿតែបងទៅ នាងក៏ព្រមជិះម៉ូតូមកជាមួយ។ លុះមកបើកលុយរួចមិនព្រមឌុបនាងទៅវិញទេ បានកុហកនាងថាឪពុកនាងរង់ចាំនាងនៅផ្ទះសំណាក់យីហោតារាស៊ី ភូមិត្រស់ ឃុំបល្ល័ង្គ ស្រុកបារាយណ៍ ខេត្តកំពង់ធំ ដើម្បីធ្វើដំណើរទៅស្រុកកំណើតឯខេត្តរតនគីរី។
នារីរងគ្រោះបានអោយដឹងទៀតថា លុះចូលដល់ក្នុងផ្ទះសំណាក់ ជនសង្ស័យបានចាប់នាងរំលោភ ដោយយកខ្នើយបិទមាត់ និងគំរាមសម្លាប់ ទើបនាងបណ្តោយឲ្យជនសង្ស័យសម្រេចកាម លុះព្រឹកឡើងទើបប្តឹងសមត្ថកិច្ចចាប់វាយខ្នោះតែម្តង។
ហេតុការណ៍នេះ បានកើតឡើងកាលពីវេលាម៉ោង ២៣ និង ២០ នាទី ថ្ងៃទី២៧ ខែឧសភា ឆ្នាំ២០១៨ លុះនាងភ្ញាក់ពីព្រលឹមវេលាម៉ោង ០៥ និង ៣០ នាទី ក៏ប្ដឹងឲ្យសមត្ថកិច្ចចាប់ជនសង្ស័យតែម្តង។
ជនរងគ្រោះឈ្មោះ ញ ន ភេទស្រី អាយុ១៦ឆ្នាំ កើតនៅខេត្តរតនគីរី ចំណែកជនសង្ស័យឈ្មោះ សែម ឆៃ ភេទប្រុស អាយុ២៦ឆ្នាំ រស់នៅភូមិកំពង់ទូក ឃុំមានជ័យ ស្រុកសំឡូត ខេត្តបាត់ដំបង ស្នាក់នៅរើសស្វាយចន្ទីនៅចម្ការជាមួយគ្នា៕
Source: Kampuchea Thmey Daily
0 Comments