បន្ទាយមានជ័យ ៖ នៅព្រឹកថ្ងៃទី២៩ ខែឧសភា ឆ្នាំ២០១៨នេះ លោ លី សារី អភិបាលរងខេត្ត និងជាប្រធានសាខាកាកបាទក្រហមកម្ពុជា ខេត្តបន្ទាយមានជ័យ និងក្រុមការងារជាច្រើននាក់ទៀត បាននាំយកអំណោយរបស់មនុស្សធម៌កាកបាទក្រហមកម្ពុជាខេត្ត ទៅចែកជូនជនរងគ្រោះរលំផ្ទះសម្បែងដោយខ្យល់កន្ត្រាក់ចំនួន ៥៨ គ្រួសារ ដែលរងគ្រោះដោយសារខ្យល់កន្ត្រាក់ កាលពីថ្ងៃទី១៩ ឧសភា ២០១៨ កន្លងមកនេះ នៅចំណុចក្នុងទួលពង្រ និងឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ។
លោក លី សារី បានមានប្រសាសន៍ថា ថ្មីនេះនៅស្រុកម៉ាឡៃមានភ្លៀង និងខ្យល់កន្ត្រាក់បោកមកចំផ្ទះប្រជាពលរដ្ឋ ៥៨ គ្រួសារ ផ្ទះខ្លះរលំស្ទើររាបដល់ដី ខ្លះរបើកស័ង្កសី ធ្វើឲ្យប្រជាពលរដ្ឋខ្លះគ្មានទីជម្រក និងខ្វះស្បៀងបរិភោគទៀតផង ទើបលោកយកអំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្រាប់ឆ្លើយតបសង្គ្រោះបន្ទាន់ដល់គ្រប់គ្រួសាររងគ្រោះដោយគ្រោះមហន្តរាយផ្សេងៗដូចជា ជួយដល់ប្រជាពលរដ្ឋមានការខ្វះខាតក្នុងគ្រាមានអាសន្ន ផលវិបាកនៃគ្រោះមហន្តរាយ អ្នកផ្ទុកមេរោគអេដស៍ ជនពិការ កុមារកំព្រា ចាស់ជរាឥតទីពឹងជាដើម។ ក្រុមការងារកាកបាទក្រហមកម្ពុជា ស្រុក និងខេត្ត បន្តចុះជួយចែកអំណោយជូនដល់គ្រួសារជនរងគ្រោះដោយខ្យល់កន្ត្រាក់ ដែលបានរងគ្រោះនោះ មិនទុកចោលឲ្យប្រជាពលរដ្ឋណាម្នាក់អត់បាយស្លាប់ឡើយ។
លោ លី សារី បានធ្វើការផ្ដាំផ្ញើដល់គ្រួសារជនរងគ្រោះ ដែលរលំផ្ទះសម្បែងដោយខ្យល់កន្ត្រាក់ចំនួន ៥៨ គ្រួសារ ដែលបានទទួលអំណោយពីមនុស្សធម៌កាកបាទក្រហមកម្ពុជាខេត្តទាំងអស់ ត្រូវចេះថែរក្សាខ្លួនជាមនុស្សល្អ ពលរដ្ឋល្អ ត្រូវប្រព្រឹត្តិតែអំពើល្អ សុចរិត និងជៀសឲ្យឆ្ងាយពីគ្រឿងញៀនជាដើម។ ក្នុងនោះលោកបានចូលរួមសោកស្តាយជាពន់ពេក ដែលប្រជាពលរដ្ឋជួបប្រទះរឿងអកុសលដោយគ្រោះធម្មជាតិទាំងអស់នេះផងដែរ។
អំណោយមនុស្សធម៌ដែលបានយកមកប្រគល់ជូននាពេលនេះ ក្នុងមួយគ្រួសារទទួលបាន អង្ករ ២៥គីឡូក្រាម, ត្រីខ ១០កំប៉ុង, ទឹកត្រី ៣ដប, ទឹកស៊ីអ៊ីវ ៣ដប, ប្រេងឆា ១ដប,ភួយ១,កន្សែង១,ក្រម៉ា១,សាប៊ូម្សៅ ១គីឡូក្រាម, មី ១កេស ៕
Source: Kampuchea Thmey Daily
0 Comments