ទីក្រុងអានសាន៖ លោក ហ៊ុន ម៉ាណែត សមាជិកគណៈកម្មាធិការកណ្តាល និងជាប្រធានក្រុមការងាររៀបចំអង្គការចាត់តាំងយុវជនគណបក្សប្រជាជននៅក្រៅប្រទេស កាលពីរសៀលថ្ងៃទី២៧ ខែឧសភា ឆ្នាំ២០១៨ បានធ្វើជាអធិបតីភាពក្នុងពិធីប្រកាសបញ្ចូលសមាជិកគណបក្សថ្មីចំនួន ៥៦៨ នាក់ ដែលជាពលករ និស្សិត និងអាណិកជនខ្មែរ កំពុងរស់នៅ ធ្វើការ និងសិក្សា នៅសាធារណរដ្ឋកូរ៉េ។
ថ្លែងទៅកាន់អ្នកចូលរួម លោក ហ៊ុន ម៉ាណែត បានថ្លែងអំណរគុណដល់បងប្អូនប្រជាពលរដ្ឋខ្មែរនៅកូរ៉េ ដែលបានស្ម័គ្រចិត្តចូលរួមជីវភាពនយោបាយជាមួយគណបក្សប្រជាជនកម្ពុជា ដែលតែងតែរួមសុខរួមទុក្ខជាមួយបងប្អូនយើងគ្រប់កាលៈទេសៈ គ្រប់ទីកន្លែង និងបានកសាងប្រទេសពីគំនរផេះផង់នៃវិនាសកម្ម ទៅជាប្រទេសមានសន្តិភាព ស្ថិរភាព ការអភិវឌ្ឍ កំណើនសេដ្ឋកិច្ច ឱកាសការងារទាំងក្នុង និងក្រៅប្រទេស។
ជាក់ស្តែង តាមការផ្តួចផ្តើមរបស់សម្តេចតេជោ ហ៊ុន សែន គិតចាប់ពីឆ្នាំ ២០០៧ ដល់ឆ្នាំ ២០១៨ មានពលករខ្មែរចំនួនប្រមាណ ៦ ម៉ឺននាក់ បានចេញទៅធ្វើការនៅសាធារណរដ្ឋកូរ៉េ ក្រោមប្រព័ន្ធអនុញ្ញាតមុខរបរ ដែលជាមធ្យមពលករម្នាក់អាចទទួលបានប្រាក់ខែពី ១០០០ ទៅ ១២០០ ដុល្លារអាមេរិកក្នុងមួយខែ និងបានផ្ញើថវិកាជូនក្រុមគ្រួសារនៅក្នុងប្រទេសប្រមាណជា ៣០០ លានដុល្លារអាមេរិកក្នុងមួយឆ្នាំ។
នៅក្នុងឱកាសនេះផងដែរ លោក ហ៊ុន ម៉ាណែត បានផ្តាំផ្ញើដល់សមាជិកថ្មីទាំងអស់ឲ្យចេះរួបរួមសាមគ្គីគ្នា ជួយគ្នាលើកកិត្តិយស កេរ្តិ៍ឈ្មោះជាតិខ្មែរយើង។ លោកបានសង្កត់ធ្ងន់ថា គណបក្សប្រជាជនកម្ពុជា ដែលដឹកនាំរដ្ឋាភិបាលនឹងបន្តបង្កើនការផ្តល់សេវាគាំទ្រ ការពារសិទ្ធិ ផលប្រយោជន៍ និងសេចក្តីថ្លៃថ្នូររបស់បងប្អូនប្រជាពលរដ្ឋ និស្សិត និងពលករខ្មែរនៅកូរ៉េ និងប្តេជ្ញាខិតខំចរចាជាមួយភាគីកូរ៉េរក្សាចំនួនកូតាឲ្យបានច្រើនសម្រាប់ជាឱកាសការងារបន្ថែមដល់បងប្អូនខ្មែរយើង។
ជាការឆ្លើយតប សមាជិកថ្មីនៃគណបក្សប្រជាជននៅកូរ៉េ បានប្តេជ្ញាចិត្តគាំទ្របុព្វហេតុគណបក្សប្រជាជនកម្ពុជា និងបានត្រៀមខ្លួនដើម្បីទៅបោះឆ្នោត ឬជម្រាបជូនឪពុកម្តាយ ក្រុមគ្រួសារ ឲ្យទៅបោះឆ្នោត និងបោះឆ្នោតជូនគណបក្សប្រជាជនគ្រប់ៗគ្នា៕
Source: Kampuchea Thmey Daily
0 Comments