គិតមកទល់ឆ្នាំ ២០១៨ នេះពានរង្វាន់បាល់ទាត់សម្តេចអគ្គមហាសេនាបតីតេជោ ហ៊ុន សែន ឬជាភាសាអង់គ្លេសហៅកាត់ថា Hun Sen Cup បង្កើតឡើងបានរយៈពេល ១២ ឆ្នាំមកហើយ ស្របពេលពានរង្វាន់មួយនេះបង្កើតឡើងដំបូងនៅឆ្នាំ ២០០៧។ ក្រុមព្រះខ័នរាជស្វាយរៀង (ពីមុនឈ្មោះថា ព្រះខ័នរាជ និងប្ដូរទៅជាស្វាយរៀងអែហ្វស៊ី) ជាក្រុមដែលឈ្នះពានរង្វាន់នេះបានច្រើនជាងគេបើធៀបទៅនឹងក្រុមដទៃ ពោលគឺ ៤ សម័យកាលម្នាក់ឯង។
សារព័ត៌មានកម្ពុជាថ្មី សូមជម្រាបជូនពីប្រវត្តិខ្លះៗក្នុងពានរង្វាន់ធំប្រចាំប្រទេសកម្ពុជាមួយនេះ តាំងពីបង្កើតឡើងនៅឆ្នាំដំបូងរហូតមកដល់បច្ចុប្បន្នដូចតទៅ៖
សម្រាប់ឆ្នាំដំបូង ពោល គឺនៅឆ្នាំ ២០០៧ ជើងឯកបានទៅក្រុមខេមរាកីឡា ក្រោយយកឈ្នះក្រុមណាហ្គាខប (ណាហ្គាវើល) ដោយបាល់ប៉េណាំងទីកាត់សេចក្ដី ៤ទល់២ ស្របពេលក្រុមភ្នំពេញក្រោន ឈរចំណាត់ថ្នាក់លេខ៣ ក្រោយឈ្នះក្រុមបៀលប្រាយយូណាយធីត ដោយលទ្ធផល ៤ទល់១។ នៅគ្រានោះបៀលប្រាយយូណាយធីត ឈ្នះពានរង្វាន់ជាក្រុមលេងបានល្អ ឬអាចនិយាយថាជាក្រុម Fair Play តែពានរង្វាន់កីឡាកររកគ្រាប់បាល់បានច្រើនជាងគេបានទៅកីឡាករ គួច សុកុម្ភៈ របស់ក្រុមខេមរាកីឡា។
ចូលដល់ឆ្នាំ ២០០៨ ដែលជាឆ្នាំទី២ ជើងឯកក្នុងពានរង្វាន់នេះបានទៅក្រុមភ្នំពេញក្រោន វិញម្ដងក្រោយយកឈ្នះក្រុមព្រះខ័នរាជ នៅវគ្គផ្ដាច់ព្រ័ត្រ ១ទល់០។ នៅឆ្នាំនោះក្រុមលេខ៣ បានទៅបៀលប្រាយយូណាយធីត បន្ទាប់ពីយកឈ្នះក្រុមជើងឯកឆ្នាំចាស់ខេមរាកីឡា ដោយលទ្ធផល ៣ទល់២ ស្របពេលក្រុមព្រះខ័នរាជ ទទួលបានពានរង្វាន់ក្រុម Fair Play ហើយកីឡាករ សុក ចានរស្មី របស់ព្រះខ័នរាជ ឈ្នះស្បែកជើងមាស និងកីឡាករ អ៊ុក ម៉ិច ឈ្នះពានរង្វាន់អ្នកចាំទីល្អ។
នៅឆ្នាំ ២០០៩ ក្រុមភ្នំពេញក្រោន អាចការពារតំណែងជើងឯកបានសម្រេចក្រោយយកឈ្នះលើក្រុមណាហ្គាខប ដោយលទ្ធផល ១ទល់០ ក្នុងវគ្គផ្ដាច់ព្រ័ត្រ ខណៈក្រុមព្រះខ័នរាជ ធ្លាក់មកឈរចំណាត់ថ្នាក់លេខ៣ ក្រោយយកឈ្នះក្រុមភុជង្គនាគ។ ពានរង្វាន់ Fair Play បានទៅក្រុមភុជង្គនាគ ហើយកីឡាករដែលស៊ុតបញ្ជូនទីបានច្រើនជាងគេគឺ គួច សុកុម្ភៈ របស់ខេមរាកីឡា និងអ្នកចាំទីល្អបានទៅកីឡាករ ហែម ស៊ីម៉ៃ របស់បៀលប្រាយ។
ដល់ឆ្នាំ ២០១០ ក្រុមក្រសួងការពារជាតិ បានឈ្នះជើងឯកពានរង្វាន់នេះម្ដង ក្រោយយកឈ្នះក្រុមជើងឆ្នាំចាស់ភ្នំពេញក្រោន នៅវគ្គផ្ដាច់ព្រ័ត្រ ដោយលទ្ធផល ៣ទល់២ ហើយក្រុមព្រះខ័នរាជ បន្តឈរលេខ៣ ដដែលក្រោយឈ្នះក្រុមណាហ្គាខប ៣ទល់២។ ឆ្នាំនោះពានរង្វាន់ Fair Play បានទៅក្រុមព្រះខ័នរាជ ហើយកីឡាករ គូច សុកុម្ភៈ និងកីឡាករ ស្រី វាសនា ឈ្នះស្បែកជើងមាស ក្រោយរកគ្រាប់បាល់បានស្មើគ្នា និងកីឡាករ ប៉េង ប៊ុនឆាយ ឈ្នះពានរង្វាន់អ្នកចាំទីឆ្នើម។
នៅឆ្នាំ ២០១១ ជើងឯកបានក្រុមព្រះខ័នរាជ ម្ដងក្រោយយកឈ្នះក្រុមបៀលប្រាយ នៅវគ្គផ្ដាច់ព្រ័ត្រដោយលទ្ធផល ២ទល់០ ស្របពេលក្រុមណាហ្គាខប ឈរចំណាត់ថ្នាក់លេខ៣ បន្ទាប់ពីឈ្នះក្រុមជើងឯកឆ្នាំចាស់ក្រសួងការពារជាតិ ដោយលទ្ធផល ១ទល់០។ ពានរង្វាន់ Fair Play បានទៅក្រុមក្រសួងការពារជាតិ ហើយកីឡាករ ឃូន ឡាបូរ៉ាវី របស់ព្រះខ័នរាជ ឈ្នះស្បែកជើងមាស និងអ្នកចាំទី អ៊ុក ម៉ិច ឈ្នះពានរង្វាន់អ្នកចាំទីល្អជាងគេជាលើកទី២។
ចូលដល់ឆ្នាំ ២០១២ ក្រុមព្រះខ័នរាជ បានបន្តការពារជើងឯកបានសម្រេចក្រោយឈ្នះលើក្រុមណាហ្គាខប ដោយលទ្ធផល ២ទល់១ ក្នុងម៉ោងបន្ថែម ១៥ នាទីចំនួន២ដង។ ក្រុមអគ្គស្នងការដ្ឋាននគរបាលជាតិ បានឈ្នះចំណាត់ថ្នាក់លេខ៣ ហើយក្រុមឆ្លាមសមុទ្រ ជាប់លេខ៤។ ណាហ្គាខប ដែលជាក្រុមជើងឯកឈ្នះពានរង្វាន់ Fair Play ហើយកីឡាករ ឃូន ឡាបូរ៉ាវី របស់ព្រះខ័នរាជ ឈ្នះស្បែកជើងមាស ស្របពេលអ្នកចាំទី ស សុភា របស់ព្រះខ័នរាជ ឈ្នះពានអ្នកចាំទីឆ្នើម។
ចំណែកឆ្នាំ ២០១៣ វិញក្រុមណាហ្គាខប ស្គាល់រស់ជាតិជើងឯកវិញ ម្ដងក្រោយខកខានត្រឹមវគ្គផ្ដាច់ព្រ័ត្រ ៣ លើកមក។ ណាហ្គាខប បានយកឈ្នះក្រុមក្រសួងការពារជាតិ ដោយលទ្ធផល ៥ទល់៣ ក្នុងវគ្គម៉ោងបន្ថែម១៥ នាទីចំនួន២ដង នៅវគ្គផ្ដាច់ព្រ័ត្រ ស្របពេលភ្នំពេញក្រោន ឈរចំណាត់ថ្នាក់លេខ៣ ក្រោយឈ្នះគីរីវង់សុខសែនជ័យ ៣ទល់១។ ភ្នំពេញក្រោន ក៏ឈ្នះពានរង្វាន់ Fair Play ហើយកីឡាករ ចាន់ វឌ្ឍនាកា របស់ចំការកៅស៊ូបឹងកេត ឈ្នះស្បែកជើងមាស ស្របពេលអ្នកចាំទី ផន រតនា របស់ណាហ្គាខប ឈ្នះពានរង្វាន់អ្នកចាំទីឆ្នើម។
ក្នុងឆ្នាំ ២០១៤ ក្រុមអគ្គស្នងកាដ្ឋាននគរបាលជាតិ ឈ្នះជើងឯកក្នុងប្រវត្តិសាស្ត្ររបស់ក្លិបក្រោយបំបាកក្រុមបៀលប្រាយ នៅវគ្គផ្ដាច់ព្រ័ត្រ ដោយលទ្ធផល ២ទល់០ ខណៈក្រុមចំការកៅស៊ូបឹងកេត ឈ្នះជើងឯករង ក្រោយឈ្នះក្រុមជើងឯកឆ្នាំចាស់ណាហ្គាវើល។ ពានរង្វាន់ Fair Play បានទៅក្រុមចំការកៅស៊ូបឹងកេត ហើយកីឡាករ ឃួន ឡាបូរ៉ាវី របស់ក្រុមនេះឈ្នះស្បែកជើងមាស ស្របពេលអ្នកចាំទី វ័យក្មេង ប្រាក់ ភារុណ របស់ក្រុមអគ្គស្នងការដ្ឋាននគរបាលជាតិ ឈ្នះពានរង្វាន់អ្នកចាំទីល្អ។
នៅឆ្នាំ ២០១៥ កន្លងទៅជើងឯកបានមកក្រុមស្វាយរៀងអែហ្វស៊ី ក្រោយយកឈ្នះលើក្រុមណាហ្គាវើល ដោយលទ្ធផល ២ទល់១ នៅវគ្គផ្ដាច់ព្រ័ត្រលើទីលានកីឡដ្ឋានខេត្តស្វាយរៀង។ ចំណែកក្រុមលេខ៣ គឺត្រាយអាស៊ីភ្នំពេញ (ខេមបូឌានថាយហ្គឺរ) និងក្រុមជើងឯកឆ្នាំចាស់អគ្គស្នងការដ្ឋាននគរបាលជាតិ។ កីឡាករដែលទាត់បញ្ជូលទីបានច្រើនគឺ ប្រាក់ មុន្នីឧត្តម របស់ស្វាយរៀងអែហ្វស៊ី ហើយអ្នកចាំទីល្អបានទៅកីឡាករ អាំ សុវណ្ណរ៉ាត់ របស់ក្រុមម្ចាស់ស្រុកផងដែរ។
ចំណែកចុងក្រោយនៅឆ្នាំ ២០១៦ ចុងក្រោយជើងឯកបានទៅក្រុមក្រសួងការពារជាតិ ហើយក្រុមព្រះខ័នរាជស្វាយរៀង ជាក្រុមជើងឯករង ខណៈភ្នំពេញក្រោយ ជាក្រុមចំណាត់ថ្នាក់លេខ៣។ កីឡាករ សូង វីរៈ របស់ក្លិបខេមបូឌានថាយហ្គឺរ ទទួលបានពានរង្វាន់ស្បែកជើងមាស ក្រោយរកគ្រាប់បាល់បាន២៥គ្រាប់ម្នាក់ឯង ខណៈស្រោមដៃមាសបានទៅអ្នកចាំទី អ៊ុំ សេរីរ័ត្ន របស់ក្រសួងការពារជាតិ ក្រោយជួយក្រុមឱ្យបានឈ្នះជើងឯក។ ក្រុមភ្នំពេញក្រោន ទទួលបានពានរង្វាន់ Fiar Play។
ចុងក្រោយនៅឆ្នាំ២០១៧ នេះពានរង្វាន់សម្តេចតេជោ ក្រុមព្រះខ័នរាជស្វាយរៀង ជាម្ចាស់ជើងឯក ខណៈក្រុមណាហ្គាវើល ជាជើងឯករង ហើយក្រុមថ្មីថ្មោងអគ្គីសនីកម្ពុជា ឈរចំណាត់ថ្នាក់លេខ៣។ក្រុម Fair Play បានទៅក្រុមបឹងកេត, អាជ្ញាកណ្ដាលល្អ បានទៅលោក ជី សាមឌី, ស៊ុន ដារ៉ាវុធ, ជី សុភាព, សៀង សុភក្រ, អ្នកចាំទីល្អ បានទៅ អោម ឧត្តម (ព្រះខ័នរាជស្វាយរៀង), កីឡាករល្អ បានទៅ ប្រាក់ មុន្នីឧត្តម (ព្រះខ័នរាជស្វាយរៀង), អ្នកស៊ុតចូលទីច្រើនជាងគេ បានទៅ ឃួន ឡាបូរ៉ាវី (បឹងកេត),គ្រូបង្វឹកល្អ បានទៅលោក សំ វ៉ាន់ដេត (ព្រះខ័នរាជស្វាយរៀង)។
ចំណែកឆ្នាំ ២០១៨ នេះប្លែកជារាល់ឆ្នាំ ដោយតម្រូវឱ្យក្រុមចូលរួមបែងចែកជា ២ វគ្គ គឺវគ្គថ្នាក់ខេត្ត និងវគ្គថ្នាក់ជាតិ ដែលមានក្រុមចូលរួម ៣៤ ក្រុម ដោយដំណើរការប្រកួតចាប់ពីថ្ងៃទី៧ ខែមីនា រហូតដល់ថ្ងៃទី៦ ខែតុលា ឆ្នាំ២០១៨ ទើបស្វែងរកក្រុមជើងឯកប្រចាំឆ្នាំ។ ពេលនេះការប្រកួតទើបតែបញ្ចប់វគ្គជម្រុះថ្នាក់ខេត្ត ខណៈការប្រកួតវគ្គជម្រុះថ្នាក់ជាតិនឹងធ្វើឡើងនៅខែកក្កដា ខាងមុខ៕
Source: Kampuchea Thmey Daily
0 Comments