គ.ជ.ប រៀបចំពិធីចាប់ឆ្នោតកំណត់លេខរៀងគណបក្សនយោបាយនៅលើសន្លឹកឆ្នោត

ភ្នំពេញ ៖ នៅវេលាម៉ោង៩ និង០៥ នាទីព្រឹកថ្ងៃទី២៩ ខែឧសភា ឆ្នាំ២០១៨ នេះ គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំពិធីចាប់ឆ្នោតកំណត់លេខរៀងគណបក្សនយោបាយនៅលើសន្លឹកឆ្នោត ដែលពិធីនេះរៀបចំនៅសាលប្រជុំអគារ S នៃក្រសួងមហាផ្ទៃ ក្រោមអធិបតីភាពលោក ស៊ិក ប៊ុនហុក ប្រធាន គ.ជ.ប សម្ដេចព្រះសង្ឃរាជទាំងពីរគណៈ គឺសម្តេចព្រះសង្ឃរាជ ទេព វង្ស និងសម្តេចព្រះសង្ឃរាជ ប៊ូ គ្រី ហើយក៏មានការចូលរួមពីតំណាងគណបក្សនយោបាយ តំណាងស្ថាប័នជំនាញជប៉ុន jica សង្គមស៊ីវិល អ្នកសារព័ត៌មានជាតិ និងអន្តរជាតិ សរុបប្រមាណជិត២០០នាក់។

តាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោតបានឲ្យដឹងថា បន្ទាប់ពីគណៈកម្មាធិការជាតិរៀបចំការបោះឆ្នោត បានទទួលស្គាល់ជាផ្លូវការនូវការ លើការចុះបញ្ជីបក្សនយោបាយចំនួន២០ សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ដោយយោងតាមប្រការ៤.១៦ នៃបទបញ្ជា និងនីតិវិធី សម្រាប់ការបោះឆ្នោតជ្រើសតាំងតំណាងរាស្ត្រ គ.ជ.ប ត្រូវរៀបចំពិធីចាប់ឆ្នោតកំណត់លំដាប់លេខរៀងគណបក្សនយោបាយនៅលើសន្លឹកឆ្នោតជាសាធារណៈ។

របៀបវារៈនៃការចាប់ឆ្នោតរួមមាន សុន្ទរកថា របស់លោក ស៊ិក ប៊ុនហុក ប្រធាន គ.ជ.ប, ការបង្ហាញសន្លឹកឆ្នោត ស្រោមសំបុត្រដាក់ស្លឹកឆ្នោត សម្រាប់ចាក់ឆ្នោតនិងហិបឆ្នោត, ការចាប់ឆ្នោតកំណត់លំដាប់លេខរៀងគណបក្សនយោបាយនៅលើសន្លឹកឆ្នោត ហើយនៅចុងបញ្ចប់ប្រកាសលទ្ធផលចាប់ឆ្នោតដោយលោក ទេព នីថា អគ្គលេខាធិការ គ.ជ.ប។

គណបក្សនយោបាយចំនួន២០ ដែលត្រូវចាប់ឆ្នោតនោះរួមមាន ១. គណបក្សខ្មែរឈប់ក្រ ដាក់បេក្ខជនឈរនៅ២៥មណ្ឌល។ ២. គណបក្សសម្ព័ន្ធដើម្បីប្រជាធិបតេយ្យ ដាក់បេក្ខជនឈរឈ្មោះនៅ ២៥មណ្ឌល។ ៣. គណបក្សសំបុកឃ្មុំសង្គមប្រជាធិបតេយ្យ ដាក់បេក្ខជនឈរឈ្មោះនៅ ២៥មណ្ឌល។ ៤. គណបក្សប្រជាធិបតេយ្យមូលដ្ឋាន ដាក់បេក្ខជនឈរឈ្មោះនៅ ២៥មណ្ឌល។ ៥. គណបក្សខ្មែរតែមួយ ដាក់បេក្ខជនឈរឈ្មោះនៅ ១៦មណ្ឌល។ ៦. គណបក្សពន្លឺថ្មី ដាក់បេក្ខជនឈរឈ្មោះនៅ១៣មណ្ឌល។ ៧. គណបក្សប្រជាជនកម្ពុជា ដាក់បេក្ខជនឈរឈ្មោះនៅ២៥មណ្ឌល។ ៨. គណបក្សយុវជនកម្ពុជា ដាក់បេក្ខជនឈរឈ្មោះនៅ ១៧មណ្ឌល។ ៩. គណបក្សសញ្ជាតិកម្ពុជា ដាក់បេក្ខជនឈរឈ្មោះនៅ ២៥មណ្ឌល។ ១០. គណបក្សខ្មែររួបរួមជាតិ ដាក់បេក្ខជនឈរឈ្មោះនៅ ២៥មណ្ឌល។ ១១. គណបក្សហ្វ៊ុនស៊ិនប៉ិច ដាក់បេក្ខជនឈរឈ្មោះនៅ ២៥មណ្ឌល។ ១២. គណបក្សធម្មាធិបតេយ្យ ដាក់បេក្ខជនឈរឈ្មោះនៅ ១០មណ្ឌល ១៣. គណបក្សមាតុភូមិយើង ដាក់បេក្ខជនឈរឈ្មោះនៅ ៦មណ្ឌល។ ១៤. គណបក្សខ្មែរក្រោក ដាក់បេក្ខជនឈរឈ្មោះនៅ ៦មណ្ឌល។ ១៥. គណបក្សសាធារណរដ្ឋប្រជាធិបតេយ្យ ដាក់បេក្ខជនឈរឈ្មោះនៅ ១៦មណ្ឌល។ ១៦. គណបក្សខ្មែរអភិវឌ្ឍន៍សេដ្ឋកិច្ច ដាក់បេក្ខជនឈរឈ្មោះនៅ ១២មណ្ឌល។ ១៧. គណបក្សឆន្ទៈខ្មែរ ដាក់បេក្ខជនឱ្យឈរឈ្មោះនៅ ២៥មណ្ឌល។ ១៨. គណបក្សខ្មែរសាធារណរដ្ឋ ដាក់បេក្ខជនឱ្យឈរឈ្មោះនៅ ១០មណ្ឌល។ ១៩. គណបក្សរស្មីខេមរា ដាក់បេក្ខជនឱ្យឈរឈ្មោះនៅ ៧មណ្ឌល។ ២០. គណបក្សជនជាតិដើមប្រជាធិបតេយ្យកម្ពុជា ដាក់បេក្ខជនឱ្យឈរឈ្មោះនៅ ១១មណ្ឌល៕