កណ្តាល ៖ កម្លាំងនគរបាលប្រឆាំងបទល្មើសគ្រឿងញៀនស្រុកស្អាង និងប៉ុស្តិ៍រដ្ឋបាល ក្រោមការដឹកនាំបញ្ជាផ្ទាល់ពីលោកវរសេនីយ៍ឯក សេង សុជាតិ អធិការនគរបាលស្រុក ដោយមានការចូលរួមផ្តល់ព័ត៌មានពីប្រជាពលរដ្ឋល្អ សំបុកចែកចាយគ្រឿងញៀនពីរទីតាំងត្រូវបានវាយបំបែកក្នុងថ្ងៃតែមួយ និងឃាត់ខ្លួនមុខសញ្ញាជួញដូរបានចំនួន ៣ នាក់ ដកហូតបានថ្នាំញៀនចំនួន ៣១ កញ្ចប់។
លោកវរសេនីយ៍បានបញ្ជាក់ថា ទីតាំងទី១ នៅថ្ងៃចន្ទ ១៤កើត ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៨ ខែឧសភា ឆ្នាំ២០១៨ វេលាម៉ោង ១៤ និង ០០ នាទី ចំណុចផ្ទះរបស់ឈ្មោះ អែម ប្រុស ហៅ ម៉ៅ ស្ថិតក្នុងភូមិព្រែកតាឡៃ ឃុំព្រែកអំបិល ស្រុកស្អាង ខេត្តកណ្តាល កម្លាំងជំនាញ និងប៉ុស្តិ៍រដ្ឋបាលព្រែកអំបិល បានឃាត់ខ្លួនជនសង្ស័យចំនួន ០២ នាក់ ១/ឈ្មោះ អែម ប្រុស ហៅម៉ៅ ភេទប្រុស អាយុ២៥ឆ្នាំ ជនជាតិខ្មែរ មុខរបរ បើកឡាន ទីលំនៅបច្ចុប្បន្ន ភូមិព្រែកតាឡៃ ឃុំព្រែកតាឡៃ ស្រុកស្អាង ខេត្តកណ្តាល។ ២/ឈ្មោះ មាស សុនណារ៉ាក់ ហៅភ្នំ ភេទប្រុស អាយុ២៧ឆ្នាំ ជនជាតិខ្មែរ មុខរបរកសិករ ទីលំនៅបច្ចុប្បន្ន ភូមិព្រែកតាឡៃ ឃុំព្រែកអំបិល ស្រុកស្អាង ខេត្តកណ្តាល។ វត្ថុតាងចាប់យករួមមាន ម្សៅក្រាមពណ៌សថ្លា សង្ស័យថាជាសារធាតុញៀន (ម៉ាទឹកកក) ចំនួន ២៣ កញ្ចប់ ក្នុងនោះធំ ០១ កញ្ចប់, តូច ២២ កញ្ចប់។
នៅថ្ងៃខែឆ្នាំវេលាម៉ោងកើតហេតុ ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀននៅចំណុចកើតហេតុខាងលើ ភ្លាមនោះកម្លាំងផ្នែកប្រឆាំងបទល្មើសគ្រឿងញៀន សហការជាមួយកម្លាំងប៉ុស្តិ៍នគរបាលព្រែកអំបិល និងក្រុមប្រឹក្សាឃុំ លោកមេភូមិ បានចុះដល់ចំណុចកើតហេតុធ្វើការត្រួតពិនិត្យឆែកឆេរបន្ទប់របស់ជនសង្ស័យឈ្មោះ អែម ប្រុស ហៅ ម៉ៅ បានរកឃើញម្សៅក្រាមពណ៌សថ្លា សង្ស័យជាសារធាតុញៀន (ម៉ាទឹកកក) ចំនួន ២៣ កញ្ចប់ (ធំ ០១ កញ្ចប់ ,តូច ២២ កញ្ចប់) នៅក្នុងបន្ទប់ក្រោមផ្ទះ រួចឃាត់ខ្លួនជនសង្ស័យរួមនឹងវត្ថុតាងដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ អែម ប្រុស ហៅ ម៉ៅ បានសារភាពថា ឈ្មោះ សាន វណ្ណី ហៅ អំបិល បានអោយគ្រឿងញៀន (ម៉ាទឹកកក) ចំនួន ២៣ កញ្ចប់ (ធំ ០១ កញ្ចប់ ,តូច ២២ កញ្ចប់) មកខ្លួន (អែម ប្រុស) លក់ក្នុងមួយកញ្ចប់តូច ៥០,០០០៛ (ប្រាំម៉ឺនរៀល) និងមួយកញ្ចប់ធំតម្លៃ ២០០,០០០៛ (ម្ភៃម៉ឺនរៀល) លក់អស់គ្រឿងញៀន (ម៉ាទឹកកក) លុយចំណេញចែកគ្នា។ ទន្ទឹមនឹងនោះ ឈ្មោះ អែម ប្រុស ហៅម៉ៅ បានសារភាពទៀតថា ឈ្មោះ មាស សុនណារ៉ាក់ ហៅភ្នំ បានយកគ្រឿងញៀន (ម៉ាទឹកកក) ចំនួនមួយកញ្ចប់តូចពីខ្លួន (អែម ប្រុស) ដើម្បីយកទៅលក់អោយគេមិនស្គាល់ឈ្មោះ បានតម្លៃ ៥០,០០០៛។
លោកអធិការស្រុកស្អាងបានអោយដឹងទៀតថា ករណីជួញដូរដោយខុសច្បាប់នូវសារធាតុញៀន (ម៉ាទឹកកក) មួយទីតាំងទៀត ដែលត្រូវបានបង្ក្រាបនៅថ្ងៃទី២៨ ខែឧសភា ឆ្នាំ ២០១៨ នេះដែរ តែវេលាម៉ោង ២៣ និង ៣០ នាទី ចំណុចផ្ទះរបស់ឈ្មោះ ឌុល ឡា ភេទប្រុស ស្ថិតក្នុងភូមិ លេខ១ ឃុំស្វាយរលំ ស្រុកស្អាង ខេត្តកណ្តាល។ សមត្ថកិច្ចបានចាប់ខ្លួនជនសង្ស័យម្នាក់ឈ្មោះ ផូ ចិត្រា ភេទប្រុស អាយុ២០ឆ្នាំ ជនជាតិខ្មែរ មុខរបរជាងដែក ទីលំនៅបច្ចុប្បន្ន ភូមិលេខ១ ឃុំស្វាយរំ ស្រុកស្អាង ខេត្តកណ្តាល។ វត្ថុតាងចាប់យករួមមាន ម្សៅក្រាមពណ៌សថ្លាសង្ស័យជាសារធាតុញៀន (ម៉ាទឹកកក) ចំនួន ៨ កញ្ចប់តូច។
លោកអធិការបន្តថា នៅវេលាម៉ោងកើតហេតុ ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀននៅចំណុចកើតហេតុខាងលើ ភ្លាមនោះលោកអនុសេនីយ៍ឯក ឡោ សុខៃ បានដឹកនាំកម្លាំងប៉ុស្តិ៍នគរបាលរដ្ឋបាលស្វាយរលំ ដល់កន្លែងកើតហេតុ បានធ្វើការឃាត់ខ្លួនឈ្មោះ ផូ ចិត្រា និងរកឃើញម្សៅក្រាមពណ៌សថ្លាសង្ស័យជាសារធាតុញៀន (ម៉ាទឹកកក) ចំនួន ៨ កញ្ចប់តូច នៅក្បែរខ្លួនឈ្មោះ ផូ ចិត្រា។ នៅចំពោះមុខសមត្ថកិច្ចនគរបាល ឈ្មោះ ផូ ចិត្រា បានសារភាពថា គ្រឿងញៀន (ម៉ាទឹកកក) ចំនួន ០១ កញ្ចប់ ជារបស់ខ្លួន និងចំនួន ០៧ កញ្ចប់ទៀត គឺជារបស់ឈ្មោះ ឌុល ឡា (គេចខ្លួន) បានប្រគល់មកខ្លួន (ផូ ចិត្រា)៕
Source: Kampuchea Thmey Daily
0 Comments