កងទ័ព​ ៖ ​សកម្មប្រយុទ្ធ​ហ្គា​ហ្សា​បាញ់​កាំភ្លើងត្បាល់​រាប់​សិប​គ្រាប់​ដាក់​ភាគ​ខាងត្បូង​ប្រទេស​អ៊ីស្រាអែល

នៅ​ថ្ងៃ​អង្គារ ក្រុម​សកម្មប្រយុទ្ធ​ប៉ា​ឡេ​ស្ទី​ន​នៅ​តំបន់​ហ្គា​ហ្សា​ស្ទ្រី​ប ​បាន​បាញ់​គ្រាប់កាំភ្លើង​ត្បាល់​ដាក់​ភាគខាងត្បូង​ប្រទេស​អ៊ីស្រាអែល​ ខណៈដែល​ភាព​តានតឹង​ក្នុង​តំបន់​ព្រំដែន​បាន​ផ្ទុះឡើង​កាន់តែខ្លាំង​។​

សេចក្តីថ្លែងការណ៍​មួយ​ពី​កងទ័ព​អ៊ីស្រាអែល​បាន​និយាយថា “​គ្រាប់កាំភ្លើង​ត្បាល់​ចំនួន​២៥​គ្រាប់​ត្រូវបាន​បាញ់​ឆ្ពោះទៅកាន់​ទីតាំង​ជាច្រើន​នៅក្នុង​ទឹកដី​អ៊ីស្រាអែល​”​។​

កងទ័ព​បាន​និយាយថា “​ការបាញ់​ភាគច្រើន​ត្រូវបាន​ស្ទាក់ចាប់​ដោយ​ប្រព័ន្ធ​ការពារ​អាកាស Iron Dome របស់​កងទ័ព​អ៊ីស្រាអែល​”​។​

ប៉ូលិស​បាន​និយាយថា “​គ្រាប់កាំភ្លើង​ត្បាល់​មួយចំនួន​បាន​ធ្លា​ក់នៅ​តំបន់​វាល​ចំហ​ខាងក្នុង​ប្រទេស​អ៊ីស្រាអែល​ប៉ុន្តែ​គ្មាន​អ្នករបួស​នោះទេ​”​។​

កាលពី​ថ្ងៃ​ចន្ទ ជនជាតិ​ប៉ា​ឡេ​ស្ទី​ន​ម្នាក់​ដែល​ទៅជិត​ដល់​របង​ព្រំដែន​ក្នុង​អ្វីដែល​កងទ័ព​អ៊ីស្រាអែល​និយាយថា​មាន​គោលបំណង​បើក​ការវាយប្រហារ​នោះ​គឺ​ត្រូវបាន​សម្លាប់​ដោយ​រថក្រោះ​។​

មួយថ្ងៃ​មុន​នោះ រថក្រោះ​មួយគ្រឿង​បានកំណត់​គោលដៅ​លើ​ចំណុច​អង្កេត​របស់​ពួក​ឥស្លាម​ជី​ហាដ​ដើម្បី​ជាការ​ឆ្លើយតប​ទៅនឹង​គ្រឿងផ្ទុះ​មួយ​ដែល​ត្រូវបាន​បង្កៃ​នៅ​របង​ព្រំដែន​។​

សមាជិក​ក្រុម​សកម្មប្រយុទ្ធ​ចំនួន​៣​នាក់​ត្រូវបាន​សម្លាប់​ហើយ​ប្រព័ន្ធ​ផ្សព្វផ្សាយ​អ៊ីស្រាអែល​បាន​និយាយ​នៅ​ថ្ងៃ​អង្គា​រថា ការបាញ់​នេះ​គឺជា​ការឆ្លើយតប​របស់​ពួក​ឥស្លាម​ជី​ហាដ​ចំពោះ​ការវាយប្រហារ​។​

ប្រជាជន​ប៉ា​ឡេ​ស្ទី​ន​យ៉ាងតិច​១២១​នាក់​ត្រូវបាន​សម្លាប់​ក្នុងអំឡុងពេល​នៃ​ភាពចលាចល​ជាច្រើន​សប្តាហ៍​ចាប់តាំងពី​ថ្ងៃទី​៣០​ខែមីនា​មក​នៅពេលដែល​ពួក​ប៉ា​ឡេ​ស្ទី​ន​ចាប់ផ្តើម​អំពាវនាវ​ឲ្យ​ត្រូវបាន​អនុញ្ញាត​ត្រឡប់​ទៅ​ស្រុកកំណើត​ជា​ប្រវត្តិសាស្ត្រ​របស់​ពួកគេ​វិញ​នៅក្នុង​ប្រទេស​អ៊ីស្រាអែល​។​

មនុស្ស​ភាគច្រើន​ត្រូវបាន​សម្លាប់​ក្នុងអំឡុង​ការតវ៉ា​នៅតាម​បណ្តោយ​ព្រំដែន​រួមទាំង​មនុស្ស​យ៉ាងតិច​៦១​នាក់​នៅ​ថ្ងៃទី​១៤​ខែឧសភា​ផងដែរ​។​

អ្នក​ផ្សេងទៀត​ត្រូវបាន​សម្លាប់​ក្នុងការ​វាយប្រហារ​ពី​អាកាស​៕ AFP

​

[caption id="attachment_917937" align="aligncenter" width="700"]  [/caption]

Source: Kampuchea Thmey Daily