ភ្នំពេញ៖ ការដ្ឋានស្ថាបនាប្រឡាយស្ទឹងមានជ័យ ដំណាក់កាលទី១ មកដល់ពេលនេះ បានឈានដល់ចាក់បេតុងស៊ីផាយបាន ៩៥% នៃគម្រោងហើយ ហើយការអនុវត្តជំហានទី២ គ្រោងនឹងអនុវត្តបន្តនៅពេលឆាប់ៗខាងមុខនេះ ដើម្បីអោយតំបន់នេះលែងទទួលបានលិចលង់ដោយជំនន់ទឹកភ្លៀងទៀត និងធ្វើអោយតំបន់នេះប្រែក្លាយជាតំបន់រៀបរយផងដែរ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានអោយដឹងនៅព្រឹកថ្ងៃទី២៩ ឧសភា នេះថា ការដ្ឋានស្ថាបនាប្រឡាយស្ទឹងមានជ័យ មានប្រវែង ១៤៩៨ ម៉ែត្រ ដោយចាក់បេតុងបុកស៊ីផាយ ទទឹង៨ម៉ែត្រ។ លោកបញ្ជាក់ថា លើគម្រោងនេះយើងបានបែងចែកជា ៤ ដំណាក់កាល ដោយដំណាក់កាលទី១ មានប្រវែង ៣២៦ ម៉ែត្រ សងខាងប្រឡាយសរុបប្រវែង ៦៥២ ម៉ែត្រ ហើយក្នុងដំណាក់កាលទី១នេះ ក្រុមការងារបានសម្រេចការងាររបស់ខ្លួនបាន ៩៥% ហើយ។ ក្រៅពីចាក់បេតុងស៊ីផាយហើយនោះ ការចាក់ដីបំពេញដើម្បីផ្តល់កម្មសិទ្ធិជូនប្រជាពលរដ្ឋ ក្រុមការងារក៏បានចាក់ជូនខ្លះហើយដែរ។ ចំណែកការកាយភក់ចេញពីបាតប្រឡាយ គឺយើងអនុវត្តការងារសម្រេចបាន ១០០ ភាគរយហើយដែរ។
គួរបញ្ជាក់ថា ប្រឡាយស្ទឹងមានជ័យ ដែលរដ្ឋបាលរាជធានីភ្នំពេញ គ្រោងនឹងធ្វើការអភិវឌ្ឍនេះឆ្លងកាត់ខណ្ឌចំនួន ២ នោះគឺខណ្ឌមានជ័យ និងខណ្ឌសែនសុខ ដែលមានប្រជាពលរដ្ឋរស់នៅ និងរងផលប៉ះពាល់ប្រឡាយនេះចំនួន ៥៦២ គ្រួសារ ហើយប្រជាពលរដ្ឋទាំងអស់នេះ នឹងទទួលបានដីទំហំ ៤x៦ ម៉ែត្រ ជាកម្មសិទ្ធិស្របច្បាប់នៅហ្នឹងកន្លែងតែម្តង។
ប្រឡាយស្ទឹងមានជ័យ នឹងត្រូវសាងសង់ឡើងដោយបុកបេតុងស៊ីផាយ ដូចនៅប្រឡាយបាក់ទូកដែរ ដោយត្រូវធ្វើផ្លូវ ៦ ម៉ែត្រជាប្រភេទផ្លូវបេតុង រៀបចំតបណ្តាញទឹកភ្លើងអគ្គិសនីចូលផ្ទះប្រជាពលរដ្ឋដាក់បង្គោលភ្លើងសាធារណៈនៅលើផ្លូវនេះថែមទៀត។ ប្រឡាយស្ទឹងមានជ័យ បានដើរតួយ៉ាងសំខាន់ក្នុងការនាំទឹកទម្លាក់ចូលទៅបឹងទំពុន។ ជាគម្រោងតួប្រឡាយស្ទឹងមានជ័យ មានទំហំ៨ម៉ែត្រ ចិញ្ចើម ២ ម៉ែត្រ សាងសង់ផ្លូវបេតុងទទឹង ៦ ម៉ែត្រ ផ្លូវមុខផ្ទះ ៥ ម៉ែត្រ ដីនៅសល់មុខផ្ទះ ១ ម៉ែត្រកន្លះ និងក្រោយផ្ទះកន្លះម៉ែត្រ៕
Source: Kampuchea Thmey Daily
0 Comments