ភ្នំពេញ ៖ ជនជាប់ចោទនៅក្នុងសំណុំរឿងក្ដីលួចលក់អចលនទ្រព្យរាប់ពាន់ហិកតារបស់ក្រុមហ៊ុនវិនិយោគបរទេសដ៏ធំមួយនៅខេត្តកំពង់ស្ពឺ ត្រូវបានសាលាឧទ្ធរណ៍សម្រេចដោះលែងអោយនៅក្រៅឃុំកាលពីពេលថ្មីៗនេះ ដែលការដោះលែងនោះ ធ្វើអោយម្ចាស់ទុនវិនិយោគមានមន្ទិលសង្ស័យនៅក្នុងដំណើរការរកយុត្តិធម៌នៅក្នុងរឿងក្ដីតាមផ្លូវតុលាការ។
ជនជាប់ចោទ ដែលសាលាឧទ្ធរណ៍សម្រេចដោះលែងអោយនៅក្រៅឃុំនេះ ឈ្មោះ នួន ច័ន្ទមករា ភេទស្រី អាយុ៣៥ឆ្នាំ មានលំនៅដ្ឋានលេខ ៩៨សេ ផ្លូវលេខ ៦០៨ សង្កាត់បឹងកក់២ ខណ្ឌទួលគោក។
ដោយមានការព្រួយបារម្ភពីករណីផ្ដល់យុត្តិធម៌តាមផ្លូវតុលាការ ក្រោយពីសាលាឧទ្ធរណ៍សម្រេចដោះលែងឈ្មោះនួន ច័ន្ទមករា អោយនៅក្រៅឃុំ ក្រុមហ៊ុនដែលតាដាប់បែលយូត្រេឌីង ដែលជាក្រុមហ៊ុនរងគ្រោះ បានចេញសេចក្ដីជូនដំណឹងជាសាធារណៈស្ដីអំពីសេចក្ដីសម្រេចបណ្ដេញចេញបុគ្គលឈ្មោះ នួន ច័ន្ទមករា ពីម្ចាស់ភាគហ៊ុនដែលមានតែឈ្មោះរបស់ក្រុមហ៊ុនដែលតាដាប់បែលយូត្រេឌីង។
តាមសេចក្ដីសម្រេចជូនដំណឹងរបស់លោក បណ្ឌិតរ៉ៃន័រ ម៉ារា វុលនី ភេទប្រុស ជនជាតិអាល្លឺម៉ង់ ឆ្នាំកំណើត ២៦មីនា ឆ្នាំ ១៩៤៦ មានទីលំនៅ ភូមិសាមគ្គី៤ ឃុំត្រែងត្រយឹង ស្រុកភ្នំស្រួចខេត្តកំពង់ស្ពឺ ជាប្រធានក្រុមហ៊ុន និងជាប្រធានក្រុមប្រឹក្សាភិបាលក្រុមហ៊ុនដែលតាដាប់បែលយូត្រឺឌីង ជាម្ចាស់ទុនវិនិយោគផ្ទាល់កាន់កាប់ភាគហ៊ុន៤៩ភាគរយ សូមធ្វើការជូនដំណឹងជាសាធារណៈថា បុគ្គលឈ្មោះនួន ច័ន្ទមករា ភេទស្រី ឆ្នាំកំណើត ០១ មករា ឆ្នាំ១៩៨១ ជនជាតិខ្មែរ មានលំនៅដ្ឋានលេខ៩៨សេ ផ្លូវលេខ៦០៨ សង្កាត់បឹងកក់២ ខណ្ឌទួលគោក ចាប់ពីពេលនេះទៅលែងជាម្ចាស់ភាគហ៊ុនដែលមានតែឈ្មោះរបស់ក្រុមហ៊ុនដែលតាដាប់បែលយូត្រេឌីង តទៅទៀតហើយ។
ពាក់ព័ន្ធបញ្ហានេះ យើងសូមជម្រាបជូនជាផ្លូវការដល់សាធារណជន និងស្ថាប័នពាក់ព័ន្ធទាំងអស់តាមរយៈបណ្ដាញផ្សព្វផ្សាយអោយបានជ្រាបនិងដឹងឮថា ក្រុមហ៊ុនដែលតាដាប់បែលយូត្រេឌីង បានចុះបញ្ជីជាក្រុមហ៊ុនឯកជនទទួលខុសត្រូវមានកម្រិតតាំងពីឆ្នាំ ២០០៤នៅក្រសួងពាណិជ្ជកម្ម។ នៅឆ្នាំ២០១៣ បុគ្គលឈ្មោះនួន ច័ន្ទមករា បានក្លាយជាម្ចាស់ភាគហ៊ុនដែលមានតែឈ្មោះ មិនមានទុនវិនិយោគនៅក្នុងក្រុមហ៊ុនឡើយ ដោយកាន់កាប់ភាគហ៊ុន៣៤ភាគរយតាមរយៈការផ្ទេភាគហ៊ុនពីម្ចាស់ភាគហ៊ុន២នាក់ទៀតដែលកាន់កាប់ភាគហ៊ុនកន្លងមក។ ក្នុងឆ្នាំ២០១៥ បុគ្គលនួន ច័ន្ទមករា បានប្រព្រឹត្តល្មើសដែលបង្កអោយមានការខាតបង់ដ៏ធ្ងន់ធ្ងរដល់ក្រុមហ៊ុនដោយការលួចយកឯកសារច្បាប់ដើមទាំងអស់របស់ក្រុមហ៊ុន រួមមានវិញ្ញាបនបត្រចុះបញ្ជីក្រុមហ៊ុន ត្រាក្រុមហ៊ុនលក្ខន្តិកៈក្រុមហ៊ុន កិច្ចសន្យាអាជីវកម្មរបស់ក្រុមហ៊ុន ប្លង់ដី ទាំងប័ណ្ណទុន រឹងគ្រប់ប្រភេទ ច្រើនកន្លែងរបស់ក្រុមហ៊ុន។ បន្ទាប់មកបុគ្គលនួន ច័ន្ទមករា បានក្លែងឯកសារដើម្បីលក់ដីរបស់ក្រុមហ៊ុនដោយខុសច្បាប់ ដែលដីទាំងនោះក្រុមហ៊ុនទទួលបានជាយូរមកហើយ មុនពេលដែលបុគ្គលនេះមានការពាក់ព័ន្ធជាមួយក្រុមហ៊ុនក្នុងនាមជាម្ចាស់ភាគហ៊ុនដែលមានតែឈ្មោះម្នាក់។ បុគ្គលនេះបានក្លែងឯកសារដោយការបង្កើតជាលិខិតកំណត់ហេតុប្រជុំ និងលិខិតប្រគល់សិទ្ធិ ដោយចែងថាក្រុមហ៊ុនបានប្រគល់សិទ្ធិអោយខ្លួនលក់ដីរបស់ក្រុមហ៊ុនចំនួនជាង ១ ០០០ហិកតា ដែលមានទីតាំងស្ថិតនៅភូមិទឹកល្អក់ ឃុំដំបូករូង ស្រុកភ្នំស្រួច ខេត្តកំពង់ស្ពឺ ដែលឯកសារទាំងនោះត្រូវបានធ្វើកោសល្យវិច័យដោយក្រសួងមានសមត្ថកិច្ចរួចហើយ ដោយរកឃើញថា ជាឯកសារដែលមានភាពមិនប្រក្រតី។
ដោយសារអំពើល្មើសនេះ ចាប់តាំងពីថ្ងៃទី៣១ ធ្នូ ឆ្នាំ២០១៦ បុគ្គលឈ្មោះនួន ច័ន្ទមករា ត្រូវបានតុលាការសម្រេចចាប់ឃុំខ្លួនរហូតដល់ចុងខែតុលា ឆ្នាំ២០១៧។ រហូតដល់ថ្ងៃទី ៣១តុលា ឆ្នាំ ២០១៧ សាលាឧទ្ធរណ៍បានសម្រេចដោះលែងអោយនៅក្រៅឃុំបណ្ដោះអាសន្នដោយដាក់អោយស្ថិតក្រោមការត្រួតពិនិត្យតាមផ្លូវតុលាការ ហាមឃាត់មិនអោយចេញក្រៅប្រទេស និងត្រូវបង្ហាញខ្លួនតាមការកំណត់របស់តុលាការ និងកំពុងរង់ចាំការកាត់ទោសនាពេលឆាប់ៗខាងមុខនេះ។
ដោយសារអំពើល្មើសច្បាប់និងចេតនាទុច្ចរិតរបស់បុគ្គលនួន ច័ន្ទមករា យើងខ្ញុំសូមធ្វើការជូនដំណឹងនិងអំពាវនាវដល់សាធារណជនអោយបានជ្រាបថា បើសិនបុគ្គលនួន ច័ន្ទមករា ព្យាយាមប្រព្រឹត្តល្មើសច្បាប់ក្នុងគោលបំណងអ្វីក៏ដោយដែលពាក់ព័ន្ធនឹងទ្រព្យសម្បត្តិរបស់ក្រុមហ៊ុន ឈ្មោះក្រុមហ៊ុន និងឯកសារទាំងឡាយរបស់ក្រុមហ៊ុន សារធារណជនមិនត្រូវចូលរួមសហការជួយជ្រោមជ្រែងបុគ្គលនេះអោយប្រព្រឹត្តខុសច្បាប់តទៅទៀតឡើយ ព្រោះបុគ្គលនេះត្រូវបានបណ្ដេញចោលពីក្រុមហ៊ុន លែងជាម្ចាស់ភាគហ៊ុនដែលមានតែឈ្មោះចាប់ពីពេលនេះតទៅ៕
Source: Kampuchea Thmey Daily
0 Comments