កំពង់ធំ៖ ក្មេងស្រីម្នាក់ រត់ឆ្លងផ្លូវមិនបានមើលឆ្វេងស្តាំ បណ្ដាលឲ្យរថយន្តកែច្នៃបុកស្លាប់យ៉ាងអាណោចអាធ័ម លើកំណាត់ផ្លូវជាតិលេខ០៦ ភូមិគរ ឃុំចំណារលើ ស្រុកស្ទោង ខេត្តកំពង់ធំ។
តាមប្រភពព័ត៌មានបានបញ្ជាក់ឲ្យដឹងថា មុនពេលកើតហេតុ មានរថយន្តកែច្នៃមួយគ្រឿង បានបើកយ៉ាងលឿនលើកំណាត់ផ្លូវចំណុចកើតហេតុ ស្របពេលនោះក្មេងស្រីឆ្លងថ្នល់មិនប្រយ័ត្ន ក៏ត្រូវបានគោយន្តកែច្នៃបើកបុកយ៉ាងពេញទំហឹង បណ្តាលឲ្យស្លាប់ភ្លាមៗ កាលពីវេលាម៉ោង ១៧ និង ៣០ នាទី ថ្ងៃទី២៨ ខែឧសភា ឆ្នាំ២០១៨។
អ្នកបើកគោយន្ដកែច្នៃត្រូវបានគេស្គាល់ឈ្មោះ ជៀក កឿ ភេទប្រុស អាយុ២៨ឆ្នាំ បច្ចុប្បន្នរស់នៅភូមិគរ ឃុំចំណារលើ ស្រុកស្ទោង ខេត្តកំពង់ធំ បន្ទាប់ពីមានហេតុការណ៍កើតឡើង តៃកុងគោយន្តបានរត់គេចខ្លួនតែម្តង។ ចំណែកក្មេងស្រីរងគ្រោះឈ្មោះ គន ស្រីពេជ្រ ភេទស្រី អាយុ០៧ឆ្នាំ រស់នៅភូមិឃុំកើតហេតុខាងលើ។
បន្ទាប់ពីមានករណីគ្រោះថ្នាក់ចរាចរណ៍ សមត្ថកិច្ចនៃអធិការស្រុកស្ទោង បានចុះធ្វើការវាស់វែងទីតាំងកើតហេតុ និងបានធ្វើកំណត់ហេតុ និងបានប្រគល់សាកសពអោយឪពុកម្ដាយចាត់ធ្វើបុណ្យតាមប្រពៃណី។ ចំណែកវត្ថុតាងបាននាំយកមករក្សាទុកនៅអធិការដ្ឋាននគរបាលស្រុកស្ទោង៕
Source: Kampuchea Thmey Daily
0 Comments