ភ្នំពេញ៖ ចៅក្រមសាលាដំបូងរាជធានីភ្នំពេញ កាលពីព្រឹកថ្ងៃទី២៩ ខែឧសភា ឆ្នាំ២០១៨ បានសម្រេចចេញដីកាឃុំខ្លួនស្ត្រីអ្នកកត់កន្ទុយលេខពីរនាក់ ដាក់ពន្ធនាគារជាបណ្ដោះអាសន្ន ក្រោមការចោទប្រកាន់ពីបទបើកលេងល្បែងស៊ីសងខុសច្បាប់។ ស្ដ្រីសង្ស័យទាំងពីរនាក់ ម្នាក់ឈ្មោះ បុទុម ស្រីណុច អាយុ២៥ឆ្នាំ មុខរបរមេកន្ទុយលេខ និងម្នាក់ទៀតឈ្មោះ ហ្គេច ជូ អាយុ៣០ឆ្នាំ មុខរបរជាមេកន្ទុយលេខដូចគ្នា។
គួរបញ្ជាក់ថា កាលពីរសៀលថ្ងៃទី២៤ ឧសភា ២០១៨ សមត្ថកិច្ចនគរបាលផ្នែកព្រហ្មទណ្ឌខណ្ឌឫស្សីកែវ បានឆ្មក់ចូលបង្ក្រាបទីតាំងបើកលេងកន្ទុយលេខពីរកន្លែងផ្សេងគ្នា ក្នុងសង្កាត់ទួលសង្កែ ខណ្ឌឫស្សីកែវ។ ពេលចុះបង្ក្រាបសមត្ថកិច្ចបានធ្វើការឃាត់ខ្លួនស្ត្រីពីរនាក់ ដែលអះអាងថាជាមេកន្ទុយលេខដូចមានឈ្មោះខាងលើនេះ និងបានចាប់យកវត្ថុតាងរួមមាន ក្រដាសសម្រាប់កត់ឆ្នោតវៀតណាម (កន្ទុយលេខ) មួយចំនួនធំ, ប៊ិច ៣ដើម,ម៉ាស៊ីនគិតលេខ ១គ្រឿង និងប្រាក់ចំនួន ១០៤,៣០០ រៀល។
ក្រោយពេលឃាត់ខ្លួនស្ត្រីមេកន្ទុយលេខពីរនាក់ខាងលើ សមត្ថកិច្ចនគរបាលផ្នែកព្រហ្មទណ្ឌខណ្ឌឫស្សីកែវ បានកសាងសំណុំរឿងបញ្ជូនស្ត្រីពីរនាក់នោះទៅកាន់សាលាដំបូងរាជធានីភ្នំពេញ នៅព្រឹកថ្ងៃទី២៧ ឧសភា ដើម្បីចាត់ការតាមនីតិវិធី។ តំណាងអយ្យការបានធ្វើការសាកសួរស្ត្រីជាប់សង្ស័យមេឆ្នោតកន្ទុយលេខពីរនាក់នោះ ២ ថ្ងៃ ទើបបានសម្រេចធ្វើការចោទប្រកាន់ជាផ្លូវការ និងចាត់បញ្ជូនទៅខាងចៅក្រមស៊ើបសួរសម្រេចឃុំខ្លួន ឬមិនឃុំខ្លួនអាស្រ័យលើឆន្ទានុសិទ្ធិរបស់ចៅក្រម។
ប្រភពព័ត៌មានពីសាលាដំបូងបានអោយដឹងថា មូលហេតុដែលចៅក្រមតុលាការសម្រេចចេញដីកាឃុំខ្លួនអ្នកកត់កន្ទុយលេខទាំង ២ នាក់ ដោយសារតែភាពបរាជ័យនៃអ្នករត់ការដែលខ្វែងគំនិតគ្នា ទើបធ្វើអោយបែកធ្លាយព័ត៌មានដឹងដល់អ្នកកាសែតមិនអាចបិទបាំងបាន ក៏សម្រេចចោទប្រកាន់ហើយឃុំខ្លួនជនជាប់ចោទតែម្ដងទៅ។
គួរអោយអាណិតអ្នកកត់កន្ទុយលេខតូចតាចហ្នឹងដែរ រកស៊ីខុសច្បាប់តិចតួចគេចាប់ដាក់គុក ព្រាត់ប្ដី ព្រាត់កូន ត្រង់មេកន្ទុយលេខធំៗស៊ីសងម៉ាស្រុករំដួលអត់មានសមត្ថកិច្ចណាហ៊ានក្បែររបងផ្ទះផង គួរអោយខ្ពើម៕
Source: Kampuchea Thmey Daily
0 Comments