ភ្នំពេញ ៖ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម ត្រូវបានក្រុមបណ្ឌិតសភាចារ្យ នៃរាជបណ្ឌិត្យសភាកម្ពុជា សម្រេចផ្តល់គោរមងារជា «កិត្តិបណ្ឌិតផ្នែកគ្រប់គ្រងធនធានទឹក» ជូន ដែលនឹងត្រូវរៀបចំប្រគល់សញ្ញាប័ត្រថ្នាក់កិត្តិបណ្ឌិតជូនលោកជាផ្លូវការក្នុងពេលឆាប់ៗនេះ។
លោក សុខ ទូច ប្រធានរាជបណ្ឌិត្យសភាកម្ពុជា ត្រូវបានសារព័ត៌មានក្នុងស្រុកដកស្រងសម្តី កាលពីថ្ងៃទី២៧ ខែឧសភា ឆ្នាំ២០១៨ ថា ដោយឃើញគុណបំណាច់ និងការខិតខំស្វះស្វែងដោះស្រាយបញ្ហាទឹកជូនប្រជាកសិករ ក្រុមបណ្ឌិតសភាចារ្យ នៃរាជបណ្ឌិត្យសភាកម្ពុជា បានសម្រេចផ្តល់គោរមងារជា «កិត្តិបណ្ឌិតផ្នែកគ្រប់គ្រងធនធានទឹក» ជូនលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម។
លោក សុខ ទូច ប្រធានរាជបណ្ឌិត្យសភាកម្ពុជា បន្តថា លោក លឹម គានហោ សមនឹងទទួលបានគោរពងារ និងសញ្ញាបត្រថ្នាក់កិត្តិបណ្ឌិតផ្នែកគ្រប់គ្រងធនធានទឹក ពីព្រោះរដ្ឋមន្ត្រីរូបនេះបានធ្វើការងារជាច្រើនទៅលើវិស័យធនធានទឹក សម្រាប់ប្រទេសកម្ពុជា។ ប្រធានរាជបណ្ឌិត្យសភាកម្ពុជា បញ្ជាក់យ៉ាងដូច្នេះថា «ឲ្យតែមានបញ្ហាទឹក គឺគាត់ស្វះស្វែងដោះស្រាយហើយ។ ដោយឃើញគុណបំណាច់ហ្នឹងហើយ បានជារាជបណ្ឌិត្យសភាកម្ពុជា ប្រជុំហើយបោះឆ្នោតផ្តល់គោរមងារជូនគាត់»៕
Source: Kampuchea Thmey Daily
0 Comments