សៀមរាប៖ ត្រីមេពូជ និងកូនត្រី រួមជាមួយប្រភេទសត្វទឹកកម្រដូចជា កន្ធាយ អណ្តើក ជាដើម នឹងត្រូវលែងចូលក្នុងកសិណនៃប្រាសាទអង្គរវត្ត ក្នុងទិវាមច្ឆាជាតិ ថ្ងៃទី០១ ខែកក្កដា ឆ្នាំ ២០១៨ ខាងមុខនេះ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
ថ្លែងនៅក្នុងបទបង្ហាញនៃកិច្ចប្រជុំពិភាក្សាកិច្ចការរៀបចំទិវាមច្ឆាជាតិ នាថ្ងៃទី២៨ ខែឧសភានេះ នៅឯស្នងការដ្ឋាននគរបាលខេត្តសៀមរាប តំណាងរដ្ឋបាលជលផលបានលើកឡើងថា កូនត្រី និងត្រីមេពូជដែលជាប្រភេទត្រីកម្រ និងសត្វទឹកកម្រដទៃទៀត ដូចជា កន្ធាយ អណ្តើក បង្កង ជាដើម នឹងត្រូវប្រលែងនៅក្នុងពិធីប្រារព្ធទិវាមច្ឆាជាតិ។ តំណាងដដែលបានឲ្យដឹងថា ការលែងកូនត្រីចូលកសិណទឹកអង្គរវត្តនេះ វាបានជួយរួមចំណែកសម្អាតទឹកតាមរយៈត្រីស៊ីស្លែ ឬសារាយដែលដុះនៅក្នុងផ្ទៃទឹកធ្វើឲ្យខូចសោភណភាពទឹក។
តាមគម្រោង ក្នុងពិធីប្រារព្ធទិវាមច្ឆជាតិនៅមុខប្រាង្គប្រាសាទអង្គវត្តនេះ នឹងមានអ្នកចូលរួមប្រមាណជាមួយម៉ឺននាក់ ប៉ុន្តែដោយសារទីតាំងនេះមិនអាចទទួលបាន ទើបគណៈកម្មការសម្រេចរៀបចំឲ្យមានអ្នកចូលរួមត្រឹមតែប្រមាណ ៧ ពាន់នាក់ប៉ុណ្ណោះ។
លោក យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកសន្តិសុខ បានមានប្រសាសន៍ថា ទីតាំងប្រារព្ធពិធីនេះ គឺមានលក្ខណៈល្អប្រសើរ។ ប៉ុន្តែលោកបានជំរុញឲ្យរដ្ឋបាលសាលាខេត្តសៀមរាប និងអាជ្ញាធរអប្សរា រៀបចំឲ្យបានម៉ត់ចត់ ធ្វើយ៉ាងណាកុំឲ្យប៉ះពាល់ដល់ការធ្វើចរាចរណ៍របស់ភ្ញៀវទេសចរ។
ជាការឆ្លើយតប លោក លី សំរិទ្ធ អភិបាលរងខេត្តសៀមរាប បានលើកឡើងថា រដ្ឋបាលសាលាខេត្តត្រៀមខ្លួនជានិច្ចសម្រាប់ការរៀបចំពិធីទិវាមច្ឆជាតិនេះ។ លោកថា ចំពោះការពង្វៀនចរាចរណ៍នៅថ្ងៃប្រារព្ធពិធី អាជ្ញាធរនឹងគិតគូរជាបន្ត៕
Source: Kampuchea Thmey Daily
0 Comments