ភ្នំពេញ ៖ បុរសម្នាក់ ដែលជាអ្នកបើកបររថយន្ត ត្រូវបានគេប្រទះឃើញស្លាប់ក្នុងរថយន្តរបស់ខ្លួន ក្នុងស្ថានភាពកំពុងអង្គុយបើកបរ ដែលប៉ូលិសបានសន្និដ្ឋានថា គាត់ស្លាប់ដោយសារខ្យល់គរ (ឬហៅថាគាំងបេះដូង)។
ហេតុការណ៍នេះ បានបង្កការភ្ញាក់ផ្អើលនៅម៉ោង ១០ និង ៣០ នាទីព្រឹកថ្ងៃទី២៩ ខែឧសភា ឆ្នាំ២០១៨ នៅតាមផ្លូវក្នុងភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅទីនោះបានឲ្យដឹងថា មុនពេលកើតហេតុ គេបានឃើញជនរងគ្រោះ (សព) បើកបររថយន្តម៉ាកហ៊ីយ៉ាន់ដាយ ប្រភេទទេសចរណ៍ ពណ៌ស ពាក់ស្លាកលេខ ភ្នំពេញ 2AS 2766 ខាងលើ បើកបរតាមផ្លូវលេខ ១៩៥៨ ពីលិចទៅកើត លុះដល់ចំណុចកើតហេតុ ក៏បើកអែបខាងលើចិញ្ចើមផ្លូវ និងបានបើកកញ្ចក់សងខាងបញ្ឆេះម៉ាស៊ីនដេកទ្រោបឱបជាប់នឹងដៃចង្កូត តាំងពីវេលាម៉ោង ៨ និង ១៥ នាទីព្រឹកមកម្ល៉េះ រហូតដល់វេលាម៉ោង ១០ និង ២០ នាទីទៅហើយនៅតែឃើញដេកក្នុងរថយន្តដដែល ដោយមិនព្រមបើកចេញ ក៏មានការងឿងឆ្ងល់ ទើបនាំគ្នាដើរទៅអើតមើល ទើបដឹងថាគាត់ស្លាប់បាត់ទៅហើយ រួចបានរាយការណ៍មកប្រាប់សមត្ថកិច្ចមូលដ្ឋានតែម្តង។
សមត្ថកិច្ចនិយាយថា សពឈ្មោះ ហាន គុនម៉ានិត ភេទប្រុស អាយុ៤០ឆ្នាំ តាមការសន្និដ្ឋានជំហានដំបូង គឺស្លាប់ដោយសារខ្យល់គ ឬ គាំងបេះដូង៕
Source: Kampuchea Thmey Daily
0 Comments