ភ្នំពេញ ៖ មន្ត្រីនគរបាលខណ្ឌព្រែកព្នៅម្នាក់ ត្រូវបានចាប់បញ្ជូនខ្លួនមកសាលាដំបូងរាជធានីភ្នំពេញនាព្រឹកថ្ងៃទី ២៩ ខែឧសភា ឆ្នាំ២០១៨ ពាក់ព័ន្ធករណីប្រើប្រាស់អាវុធបាញ់គំរាមសន្តិសុខម្នាក់ដោយមិនមានមូលហេតុច្បាស់លាស់។
ជនដៃដល់ឈ្មោះ ផន សុផល ភេទប្រុស អាយុ៣៣ឆ្នាំ ជាមន្ត្រីនគរបាលខណ្ឌព្រែកព្នៅ ស្នាក់នៅផ្ទះលេខ១៤៤ AE1 ផ្លូវលេខ៥៩៨ ភូមិទួលគោក សង្កាត់ទួលសង្កែ២ ខណ្ឌឫស្សីកែវ។
ដើមបណ្ដឹងរឿងក្ដីនេះឈ្មោះ អន សារី ភេទប្រុស អាយុ៣០ឆ្នាំ ជាសន្តិសុខ ស្នាក់នៅតូបលេខ៤៥ ផ្លូវលេខ៤៥ ភូមិ១៧ សង្កាត់ស្រះចក ខណ្ឌដូនពេញ ជាសន្តិសុខផ្សារផ្លាហ្សា។ សំណុំរឿងព្រះរាជអាជ្ញាអមតុលាការកំពង់សាកសួរនៅឡើយ។
ទាក់ទិននឹងករណីប្រើកាំភ្លើងបាញ់គំរាមនេះ សមត្ថកិច្ចបានអោយដឹងថា កាលពីថ្ងៃទី ២៦ ខែឧសភា ឆ្នាំ២០១៨ វេលាម៉ោង១៦ល្ងាច ឈ្មោះអន សារី បានជិះម៉ូតូដឹកកូនស្រី អាយុ៣ឆ្នាំម្នាក់ ដើរមើលក្នុងផ្សារ លុះមកដល់មុខតូបលេខ៧១៩០ ក៏បានជួបឈ្មោះផន សុផល ជិះម៉ូតូពាក់ស្លាកលេខនគរបាល ហើយឈ្មោះផន សុផល បានដកកាំភ្លើងខ្លីម៉ាកK54 បាញ់តម្រង់ជើងខ្លួនមួយគ្រាប់ តែមិនផ្ទុះ បន្ទាប់មកក៏បាញ់មួយគ្រាប់ទៀតឡើងលើ ហើយក៏ជិះម៉ូតូគេចខ្លួនបាត់ទៅ។
ប្រភពបានឲ្យដឹងទៀតថា រហូតដល់ថ្ងៃទី២៧ ខែឧសភា នគរបាលខណ្ឌដូនពេញ សហការជាមួយនគរបាលខណ្ឌព្រែកព្នៅ បានចុះទៅនាំខ្លួនឈ្មោះផន សុផល ជាមួយនឹងកាំភ្លើងខ្លីម៉ាកK54 ខេ ៩១៩២ បញ្ជូនមកនគរបាលការិយាល័យព្រហ្មទណ្ឌកម្រិតស្រាលដើម្បីកសាងសំណុំរឿងបញ្ជូនមកសាលាដំបូងសម្រេចតាមច្បាប់៕
Source: Kampuchea Thmey Daily
0 Comments