យេ​យេ ប្រកាស​រក​ជំនួយ​ជួយ​ដល់​ក្មេងស្រី​រងគ្រោះ​ ដែល​ត្រូវ​ថៅកែ​ចិត្តខ្មៅ​ប្រើ​ហិង្សា

ភ្នំពេញ ៖​ ​ស្រប​ពេល​ដែល​ផ្ទុះ​ព័ត៌មាន​លើ​ករណី​ថៅកែ​ស្រី​ជនជាតិ​វៀតណាម​កាត់​ចិន​ បាន​ប្រើ​ហិង្សាលើ​ក្មេងស្រី​អាយុ​ ១៦ ​ឆ្នាំ​ បង្ក​ការចាប់អារម្មណ៍​ និង​ភ្ញាក់ផ្អើល​ដល់​មហាជន​នោះ ​ពេលនេះតារា​កំប្លែង​ និង​សម្តែង យេ​យេ បាន​ចេញមុខ​ប្រកាស​ស្វែងរក​ជំនួយ​ជួយ​ដល់​ក្មេងស្រីរូបនេះ​ ខណៈ​មាន​មហាជន​មួយចំនួន​ ក៏បាន​ប្រកាស​ទទួលយក​ក្មេងស្រី​រូប​នោះ​ទៅ​ចិញ្ចឹម​ផងដែរ​។

​
កញ្ញា យេ​យេ បាន​ប្រកាស​បែបនេះ​ថា ​ខ្ញុំ​នឹង​ធ្វើការ ​Live ក្នុង​ Facebook ដើម្បី​រក​ជំនួយ​ជួយ​ដល់​គាត់។ បើ​បងប្អូន​មានចិត្ត​អាណិត​មេត្តា​ដល់​គាត់​អាច​ជួយ​ជា​ថវិកា​បន្តិចបន្តួច​ក្ដី​តាម​អ្វីដែល​អាចជួយបាន​ ហើយ​ខ្ញុំ​នឹងយក​ទៅ​ប្រគល់​ឲ្យ​គាត់ និង​អ្នក​ម្ដាយ​គាត់​ផ្ទាល់ដៃ ដើម្បី​យក​ប្រាក់​ទុក​ធ្វើជា​ដើមទុន​រកស៊ី​ សូម​បងប្អូន​មេត្តាជួយ​គាត់​ផង​។

​
តារា​កំប្លែង​នាង យេ​យេ បន្ថែម​ថា​ ដើម្បី​គាត់​បាន​យក​ទៅ​រកស៊ី​ចិញ្ចឹម​កូន ដើម្បី​កុំ​ឲ្យ​ពួកគាត់​លំបាក​រស់​នៅ​ឆ្ងាយ​ពី​ម្ដាយ​និង​កូន​ អាច​ទំនាក់ទំនង​តាមរយៈ​លេខ​ទូរស័ព្ទ​ខ្ញុំ​ផ្ទាល់ ​០៩៥/០៧០/០១៥ ៧៤ ៩៦ ៦៩ ​ឬ អាច​ឆាត​មក​បាន​តាមរយៈ​ Account Facebook Oun Yeye / Oun Yeye Yeye ប្រាក់​ដល់​ដៃ​គាត់​ខ្ញុំ​នឹង Live ប្រគល់​ជូន​គាត់​ម្ដងទៀត​។
​
សូម​បញ្ជាក់​ថា​ ថ្មីៗ​នេះ​មានការ​បែកធ្លាយ​ព័ត៌មាន​ដ៏​រសើប ​ពាក់ព័ន្ធ​ករណី​ថៅកែ​ស្រី​ជនជាតិ​វៀតណាមកាត់​ចិន ​ប្រើ​ហិង្សា​លើ​ក្មេងស្រី​រងគ្រោះ​អាយុ​ ១៦​ ឆ្នាំ​ម្នាក់ ​រហូត​មានការ​រិះគន់​ខ្លាំងៗ​ពី​ម​ហា​ជន​។ ចំពោះ​ករណីនេះ ​ក្រោយពេល​បែកធ្លាយ​ព័ត៌មាន​ភ្លាមៗ​នោះ ​ស្ត្រី​ដែលជាថៅកែ​ចិត្តកំណាច​មានឈ្មោះ ម៉េង រ័ត្ន​ពិសី ហៅ សុភា​ អាយុ​៣៣​ឆ្នាំ​ មុខរបរ​លក់​សម្លៀកបំពាក់ ត្រូវបាន​សមត្ថកិច្ច​ឃាត់​ចុះ​ខ្លួន​បញ្ចូនទៅ​តុលាការ​ផងដែរ​៕
​

Source: Kampuchea Thmey Daily