ភ្នំពេញ៖ រដ្ឋសភានឹងបើកសម័យប្រជុំរដ្ឋសភាលើកទី១០ នីតិកាលទី៥ នៅថ្ងៃព្រហស្បតិ៍ ទី៣១ ខែឧសភា ខាងមុខនេះ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា។
លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា បានប្រាប់ក្រុមអ្នកសារព័ត៌មានបន្ទាប់ពីបញ្ចប់កិច្ចប្រជុំគណៈកម្មាធិការអចិន្ត្រៃយ៍រដ្ឋសភា នាព្រឹកថ្ងៃទី២៩ ខែឧសភា នេះនៅវិមានរដ្ឋសភាថា របៀបវារៈដែលសម័យប្រជុំពេញអង្គរដ្ឋសភាលើកទី១០នេះ មានចំនួន ៤ គឺ១-ការពិភាក្សា និងអនុម័តសេចក្តីព្រាងច្បាប់ស្តីពីការរៀបចំ និងការប្រព្រឹត្តទៅរបស់គណៈរដ្ឋមន្ត្រី ២-ការពិភាក្សា និងអនុម័តសេចក្តីព្រាងច្បាប់ស្តីពីសញ្ជាតិ។ ៣-ការពិភាក្សា និងអនុម័តយល់ព្រមលើកិច្ចព្រមព្រៀងស្តីពីការបង្កើតអង្គការសហប្រតិបត្តិការព្រៃឈើអាស៊ី។ និង៤-ការពិភាក្សា និងអនុម័តសេចក្តីព្រាងច្បាប់ស្តីពីវិសោធនកម្មមាត្រា៣ មាត្រា២៣ មាត្រា៣០ មាត្រា៣៣ មាត្រា៣៤ មាត្រា៣៥ មាត្រា៣៥ មាត្រា៣៦ មាត្រា៣៧ មាត្រា៣៨ មាត្រា៣៩ និងមាត្រា៤០ នៃច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ ដែលត្រូវប្រកាសឲ្យប្រើដោយព្រះរាជក្រមលេខ នស/រកម ០៧០១/០៩ ចុះថ្ងៃទី១៣ ខែកក្កដា ឆ្នាំ២០០១។
ដោយឡែកសេចក្តីព្រាងច្បាប់ចំនួនបីទៀត ដែលរាជរដ្ឋាភិបាលទើបនឹងបញ្ជូនមកស្នើសុំការអនុម័តពីរដ្ឋសភា ដូចជាសេចក្តីព្រាងច្បាប់ស្តីពីប្រាក់ឈ្នួលអប្បបរមា កិច្ចប្រជុំគណៈកម្មាធិការអចិន្ត្រៃយ៍រដ្ឋសភា នៅព្រឹកថ្ងៃទី២៩ ខែឧសភា នេះដែរ បានសម្រេចបញ្ជូនសេចក្តីព្រាងច្បាប់នេះជូនទៅគណៈកម្មការនីតិកម្ម និងយុត្តិធម៌របស់រដ្ឋសភា ដោយសហការជាមួយគណៈកម្មការទី៨ នៃរដ្ឋសភា ដើម្បីពិនិត្យស្រាវជ្រាវ ហើយធ្វើរបាយការណ៍ជូនសម័យប្រជុំពេញអង្គរដ្ឋសភាវិញ។
ចំពោះសេចក្តីព្រាងច្បាប់ ស្តីពីវិសោធនកម្មមាត្រា៨៧ ចំណងជើងចំណុច (គ) ផ្នែកទី៣ នៃជំពូកទី៤ មាត្រា៨៩ មាត្រា៩០ មាត្រា៩១ មាត្រា៩៤ មាត្រា១១០ មាត្រា១២០ និងមាត្រា១២២ នៃច្បាប់ស្តីពីការងារ ដែលត្រូវប្រកាសឲ្យប្រើដោយព្រះរាជក្រមលេខ ជស/រកម/០៣៩៧/០១ ចុះថ្ងៃទី១៣ ខែមីនា ឆ្នាំ១៩៩៧ គណៈកម្មាធិការអចិន្ត្រៃយ៍រដ្ឋសភាបានបញ្ជូនទៅគណៈកម្មការទី៨ នៃរដ្ឋសភា ដើម្បីសិក្សាស្រាវជ្រាវ ហើយធ្វើរបាយការណ៍ជូនសម័យប្រជុំពេញអង្គវិញ និងសេចក្តីព្រាងច្បាប់ស្តីពីវិសោធនកម្មមាត្រា៣ មាត្រា៦ មាត្រា៧ មាត្រ៨ មាត្រា៩ មាត្រា១១ មាត្រា១២ ចំណងជើងជំពូកទី៤ មាត្រា១៦ មាត្រា១៩ មាត្រា២៦ មាត្រា៥០ មាត្រា៥១ មាត្រា៥២ មាត្រា៥៣ មាត្រា៥៤ មាត្រា៥៥ មាត្រា៥៦ មាត្រា៥៧ មាត្រា៥៨ មាត្រា៥៩ មាត្រា៦៥ មាត្រា៦៦ មាត្រា៦៧ និងមាត្រា៦៨ នៃច្បាប់ស្តីពីស្តង់ដាកម្ពុជា ដែលត្រូវប្រកាសឲ្យប្រើដោយព្រះរាជក្រមលេខ នស/រកម/០៦០៧/០១៣ ចុះថ្ងៃទី២៤ ខែមិថុនា ឆ្នាំ២០១៧ គឺគណៈកម្មាធិការអចិន្ត្រៃយ៍រដ្ឋសភា បានសម្រេចបញ្ជូនទៅគណៈកម្មការទី៩ នៃរដ្ឋសភា ដើម្បីសិក្សាស្រាវជ្រាវ ហើយធ្វើរបាយការណ៍ជូនសម័យប្រជុំពេញអង្គរដ្ឋសភាពិនិត្យ និងអនុម័ត៕
Source: Kampuchea Thmey Daily
0 Comments