រងរបួសស្រាល២នាក់ ក្នុងហេតុការណ៍អគ្គិភ័យឆាបឆេះហាងស៊ុបចង្កាក់ នៅក្រោយផ្សារសាមគ្គី

Cambodia News May 29, 2018

ភ្នំពេញ ៖ យ៉ាងហោចណាស់ក៏មានមនុស្ស២នាក់ បានរងរបួសស្រាល ដោយរលាកស្បែក ក្រោយពីមានហេតុការណ៍អគ្គិភ័យឆាបឆេះហាងស៊ុបចង្កាក់មួយកន្លែងនៅក្រោយផ្សារសាមគ្គី។ តែទោះបីជាយ៉ាងណាក្តី គ្រោះចង្រៃនេះ មិនបានធ្វើអោយខូចខាតទ្រព្យសម្បត្តិធ្ងន់ធ្ងរនោះទេ ដោយសារតែរថយន្តពន្លត់អគ្គិភ័យជាច្រើនគ្រឿងបានចូលទៅជួយអន្តរាគមន៍ទាន់ពេល។

ហេតុការណ៍នេះ បានបង្កការភ្ញាក់ផ្អើលឡើងកាលពីវេលាម៉ោង១០និង៣០នាទីព្រឹក ថ្ងៃទី២៩ ខែឧសភា ឆ្នាំ២០១៨ នៅចំណុច ហាងស៊ុប ចង្កាក់ (Volcano) ផ្លូវ១១២ សង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ។

ប្រភពព័ត៌មានពីបុគ្គលិកនៅហាងស៊ុបចង្កាក់(Volcano) ខាងលើនេះ បានប្រាប់ឲ្យដឹងថា នៅមុនពេលកើតហេតុគឺពួកគេកំពុងតែរំងាស់ទឹកស៊ុបសុខៗស្រាប់តែផ្ទុះធុងហ្គាស៍ កើតជាអគ្គិភ័យឆាបឆេះ បណ្ដាលឲ្យបុគ្គលិក២នាក់ បានរងរបួសស្រាល(សើស្បែក)។ ភ្លាមៗនោះ កម្លាំងសមត្ថកិច្ចមូលដ្ឋាន បានទាក់ទងទៅខាងរថយន្តពន្លត់អគ្គិភ័យមកដល់ចំណុចកើតហេតុជាបន្តបន្ទាប់ដើម្បីអន្តរាគមន៍បាញ់ពន្លត់ផងដែរ។

ករណីអគ្គិភ័យនេះដែរ មានឡានទឹកបានមកដល់កន្លែងកើតហេតុចំនួន៥គ្រឿង តែសមត្ថកិច្ចបានប្រើប្រាស់ឡានទឹកអស់៤គ្រឿង ទើបរលត់ទៅវិញជាស្ថាពរ។

ក្នុងករណីអគ្គិភ័យនេះដែរ លោកឯក ឃុនឌឿន អភិបាលនៃគណៈអភិបាលខណ្ឌទួលគោក ខណៈចុះទៅជួយអន្តរាគមន៍ដល់កន្លែងកើតហេតុ បានអំពាវនាវដល់បងប្អូន ប្រជាពលរដ្ឋទាំងអស់បង្កើនការប្រុងប្រយ័ត្នឲ្យបានខ្ពស់ និងសូមសំណូមពរដល់ ប្រជាពលរដ្ឋត្រូវមានបំពង់ពន្លត់អគ្គិភ័យនៅក្នុងផ្ទះ ដើម្បីងាយស្រួលក្នុងការបាញ់ពន្លត់ នៅពេលមានគ្រោះអគ្គិភ័យដោយយថាហេតុ៕