កំពង់ឆ្នាំង ៖ យោងតាមរបាយការណ៍របស់មន្ទីរពេទ្យបង្អែកខេត្តកំពង់ឆ្នាំង អោយដឹងថា នៅល្ងាចថ្ងៃទី២៨ និងព្រឹកថ្ងៃទី២៩ ខែឧសភា ឆ្នាំ២០១៨ មន្ទីរពេទ្យបង្អែកខេត្តបានទទួលអ្នកជំងឺចំនួន១៣ នាក់ ក្នុងនោះមានកុមារចំនួន៨ នាក់ ដែលបានពុលនំប៉័ងសម្លការីបណ្តាលអោយ រាក ក្អួត និងក្តៅខ្លាំង ពួកគាត់រស់នៅក្នុងភូមិស្រែរបង ដែលមណ្ឌលសុខភាពឃុំជៀប ស្រុកទឹកផុស បានបញ្ជូនមក និងមកដល់ពេលនេះគ្រូពេទ្យខេត្តកំពុងព្យាបាលយ៉ាងយកចិត្តទុកដាក់។
លោក ហ៊ន វង អាយុ៣២ឆ្នាំ ជាជនរងគ្រោះពុលរាកក្អួតខ្លាំងជាងគេ កំពុងសម្រាកក្នុងអគារសង្គ្រោះបន្ទាន់បានអោយដឹងថា នៅព្រឹកថ្ងៃទី២៧ ខែឧសភា នៅផ្ទះរបស់ឈ្មោះ ឌីម ប្រពន្ធឈ្មោះ នី នៅក្នុងភូមិស្រែរបង ឃុំជៀប បានធ្វើពិធីរៀបចង្ហាន់លោក និងជប់លៀងជូនដំណើរកូនទៅធ្វើការនៅប្រទេសកូរ៉េ ដោយនៅក្នុងពិធីនោះ គេបានធ្វើសម្លការីអត់មានបន្លែទេ និងនំបុ័ង អោយភ្ញៀវក្នុងភូមិហូបប្រមាណជាង ៥០ នាក់។ ក្រោយពីហូបរួចដល់ម៉ោង ៣ ទៀបភ្លឺ ថ្ងៃទី២៨ ខែឧសភា មានកុមារ និងមនុស្សចាស់ចំនួន ១៣ នាក់ បានពុល រាកផង ក្អួតផង និងក្តៅខ្លួនយ៉ាងខ្លាំងដល់ ៤០ អង្សា ហើយបាននាំគ្នាទៅព្យាបាលក្នុងមណ្ឌលសុខភាព ឃុំជៀប ស្រុកទឹកផុស។ ក្រោយពីព្យាបាលនៅក្នុងមណ្ឌលសុខភាពមិនបាត់រាក ក្អួត គ្រូពេទ្យក្នុងមណ្ឌលសុខភាពក៏បានបញ្ជូនមកកាន់មន្ទីរពេទ្យខេត្តដើម្បីជួយសង្គ្រោះបន្ត។
លោក ហ៊ង វង បានបញ្ជាក់ថា ចំពោះរូបលោកតាំងពីពុលមកដល់ពេលព្រឹកថ្ងៃទី២៩នេះ បានរាក និងក្អួតចំនួនជិត ៣០ ដង តែព្រឹកនេះមានអាការៈធូរស្រាលបន្តិចហើយ។ តែលោកក៏ឆ្ងល់ដែរថា សម្លការីនំបុ័ងដែលលោកបានហូបនោះតែមួយចានតូចហូបគ្នា ៤ នាក់ គឺគាត់ ប្រពន្ធគាត់ និងកូនគាត់ ២ នាក់ទៀត តែគេ ៣ នាក់អត់ពុលទេ បែរជាពុលតែលោកម្នាក់ឯងទៅវិញ ហើយអ្នកហូបទាំងអស់ប្រមាណជាង ៥០ នាក់ គឺពុលតែ ១៣ នាក់ប៉ុណ្ណោះ។
ចំណែកលោក សូរិន្ទ ទីរ៉ាវុឌ្ឍី ប្រធានមន្ទីរពេទ្យបង្អែកខេត្តកំពង់ឆ្នាំង បានបញ្ជាក់អោយដឹងនៅម៉ោង ៩ និង ៣០ នាទីព្រឹក ថ្ងៃទី២៩ ខែឧសភា នេះថា ជនរងគ្រោះពុលចំណីអាហារមកពីឃុំជៀប ស្រុកទឹកផុស សរុបមានចំនួន ១៣ នាក់ គឺមានកុមារ ៨ នាក់ និងមនុស្សចាស់ ៥ នាក់។ ដោយឡែកលោក ប្រាក់ វ៉ុន ប្រធានមន្ទីរសុខាភិបាលខេត្ត បានអោយដឹងថា ជុំវិញការពុលចំណីអាហារខាងលើនេះ តាមការវិភាគរបស់ក្រុមគ្រូពេទ្យបានវាយតម្លៃថា ការពុលនេះមកពីចំណីអាហារជូរផ្អូម ព្រោះលោកឮថាពួកគាត់បានហូបសម្លការីនំបុ័ងនោះវាល់ល្ងាច ដូច្នេះអ្នកពុលមកពីមានសុខភាពខ្សោយ និងហូបច្រើនដល់កម្រិតដែលត្រូវពុល បើសិនជាមានសារធាតុពុលវិញ គឺអ្នកហូបទាំងអស់ត្រូវពុលដូចៗគ្នាហើយ រឿងនេះមន្ទីរសុខាភិបាលខេត្តមិនបានយកសំណាកទៅធ្វើការពិសោធន៍នោះទេ គឺបានសម្រេចវាយតម្លៃថា ការពុលនេះមកពីហូបអាហារជូរផ្អូម៕ 
Source: Kampuchea Thmey Daily
0 Comments