បាត់ដំបង ៖ ជនសង្ស័យម្នាក់ ដែលមានចេតនាប៉ុនប៉ងចាប់រំលោភលើនារីម្នាក់តែមិនបានសម្រេច ត្រូវប៉ូលិសចាប់ខ្លួនបាន ក្រោយពេលរត់គេចខ្លួនបានតែប៉ុន្មានម៉ោង បន្ទាប់ពីជនសង្ស័យរូបនេះ បានលបឡើងទៅលើផ្ទះនារីរងគ្រោះពេលយប់ស្ងាត់ និងបានច្របាច់ កប្រុងចាប់នាងរំលោភ តែត្រូវនាងរើបម្រះរួច។
ហេតុការណ៍នេះ បានកើតឡើងនៅវេលាម៉ោង០០និង៣០នាទី រំលងអធ្រាត្រ ឈានចូលយប់ថ្ងៃទី ២០ ខែឧសភា ឆ្នាំ២០១៨ នៅចំណុចភូមិតាព្រាត ឃុំមុខរាហ៍ ស្រុករុក្ខគិរី ខេត្តបាត់ដំបង គឺមានករណីប៉ុនប៉ងរំលោភសេពសន្ថវៈមួយ តែមិនបានសម្រេចដោយសារតែនារីរងគ្រោះរើរួចពីក្រញាំបិសាចតណ្ហា។
យោងតាមរបាយការណ៍របស់សមត្ថកិច្ច គឺករណីនេះដែរ បានបង្កឡើងដោយជនសង្ស័យឈ្មោះ នេត ឆេង ភេទប្រុស អាយុ៣៥ឆ្នាំ មានទីលំនៅមិនពិតប្រាកដ ដែលជននេះបានលបចូលទៅបើកមុង និង រាវស្ទាបលើរាងកាយនារីរងគ្រោះ ដែលដេកម្នាក់ឯង ដោយបម្រុង ចាប់រំលោភ ទៅលើឈ្មោះ លាន ចាន់ធឿន អាយុ២៩ឆ្នាំ ទីលំនៅក្នុងភូមិកើតហេតុខាងលើ។
នៅពេលនោះដែរ ជនរងគ្រោះបានដឹងខ្លួនទាន់ ទើប ជនល្មើស បានប្រើហិង្សាវាយ និងច្របាច់ កជនរងគ្រោះ រហូតដល់នាង ខំប្រឹងរើសបម្រាស់ទាល់តែរួច ទើបជនល្មើសបានរត់គេចខ្លួន បាត់ស្រមោល ប៉ុន្តែមិនបានប៉ុន្មានម៉ោងផង ក្រោយពីនាងបានប្តឹងទៅសមត្ថកិច្ច នៅទីបំផុតជនសង្ស័យក៏ត្រូវបានចាប់ខ្លួន ដើម្បីបញ្ជូនទៅកាន់តុលាការ ក្នុងការចាត់ការតាមផ្លូវច្បាប់៕
Source: Kampuchea Thmey Daily
0 Comments