កំពង់ចាម៖ បុរសជាបងថ្លៃ ត្រូវប្អូនថ្លៃកាប់បណ្តាលអោយរបួសជាទម្ងន់ ត្រូវបញ្ជូនទៅសង្គ្រោះនៅមន្ទីរពេទ្យ ចំណែកជនបង្កបានរត់គេចខ្លួនបាត់។
ប្រភពព័ត៌មាននៅកន្លែងកើតហេតុបានអោយដឹងថា នៅថ្ងៃទី២៨ ខែឧសភា ឆ្នាំ២០១៨ វេលាម៉ោង ១៧ និង ៣០ នាទី នៅចំណុចភូមិក្តីបឹង ឃុំវិហារធំ ស្រុកកំពង់សៀម ខេត្តកំពង់ចាម មានករណីហិង្សាដោយចេតនា កើតឡើងលើជនរងគ្រោះឈ្មោះ ម៉េត វ៉ាង ភេទប្រុស អាយុ៣២ឆ្នាំ នៅភូមិក្តីបឹង ឃុំវិហារធំ ស្រុកកំពង់សៀម ខេត្តកំពង់ចាម។
ជនបង្កឈ្មោះ អឿន សៅ ភេទប្រុស អាយុ២៧ឆ្នាំ ជនជាតិខ្មែរ មានទីលំនៅភូមិឃុំកើតហេតុខាងលើ ត្រូវជាប្អូនថ្លៃរបស់ជនរងគ្រោះ បានធ្វើសកម្មភាពយកកាំបិតផ្គាក់កាប់ទៅលើជនរងគ្រោះជាបងថ្លៃចំនួនពីរកាំបិត ត្រូវចំស្លាបប្រជៀវក្រោយផ្នែកខាងឆ្វេងមួយកន្លែង និងត្រូវចំកែងដៃផ្នែកខាងឆ្វេងមួយកន្លែង បណ្តាលឲ្យរងរបួស។
ប៉ូលិសបានអោយដឹងថា មុនពេលកើតហេតុអ្នកទាំងពីរមានជម្លោះពាក្យសំដីជាមួយគ្នារហូតតឹងសរសៃករៀងៗខ្លួន ហើយបន្ទាប់មកប្អូនថ្លៃបានយកកាំបិតផ្គាក់កាប់បងថ្លៃបណ្តាលអោយរងរបួសធ្ងន់។ ក្រោយធ្វើសកម្មភាពរួចជនសង្ស័យបានរត់គេចខ្លួនបាត់ ចំណែកជនរងគ្រោះត្រូវបានក្រុមគ្រួសារសាច់ញាតិបញ្ជូនទៅព្យាបាលនៅមន្ទីរពេទ្យខេត្តកំពង់ចាម។ ករណីនេះសមត្ថកិច្ចនគរបាលជំនាញកំពុងសហការជាមួយកម្លាំងសមត្ថកិច្ចនគរបាលប៉ុស្តិ៍វិហារធំ ចុះធ្វើការស្រាវជ្រាវរុករកជនសង្ស័យ៕
Source: Kampuchea Thmey Daily
0 Comments