មន្ត្រី​អាមេរិក​និយាយថា ភ្នាក់ងារ​មិនបាន​បាត់​ការ​តាមដាន​កុមារ​អន្តោប្រវេសន៍​ទេ

មន្ត្រី​សុខាភិបាល​និង​សេវា​មនុស្ស​របស់​សហរដ្ឋអាមេរិក​បាន​និយាយ​កាលពី​ថ្ងៃ​ចន្ទ​ថា កុមារ​អន្តោប្រវេសន៍​ជាង​១,៥០០​នាក់​ដែល​បាន​ចូល​សហរដ្ឋអាមេរិក​ដោយ​ពុំមាន​សាច់ញាតិ​គឺ​មិនបាន​បាត់​ខ្លួន​ទេ ​ខណៈដែល​កំហឹង​ចំពោះ​ការប្រព្រឹត្ត​ដាក់​ពួកគេ​បាន​បង្ក​ឲ្យ​មានការ​រិះគន់​ក្នុង​ប្រព័ន្ធ​ផ្សព្វផ្សាយ​សង្គម។

អនុរដ្ឋមន្ត្រី​ក្រសួងសុខាភិបាល​និង​សេវា​មនុស្ស (HHS) លោក Eric Hargan បានចេញ​សេចក្តីថ្លែងការណ៍​មួយ​កាលពី​យប់​ថ្ងៃ​ចន្ទ​ដោយ​និយាយថា ការិយាល័យ​តាំងទី​លំនៅ​ជនភៀសខ្លួន​របស់​ក្រសួង​បាន​ព្យាយាម​តាមដាន​ការដោះលែង​កុមារ​ដែល​មិនមាន​សាច់ញាតិ​ដោយ​ទាក់ទង​ទៅកាន់​គ្រួសារ​របស់​ពួកគេ​។​

បន្ទាប់ពី​មាន​ព័ត៌មាន​ថ្មីៗ​អំពី​កុមារ​ដែល​បាន​បាត់​ខ្លួន​ជា​ប្រព័ន្ធ​ក្រោយពេល​ឆ្លងកាត់​ព្រំដែន​ដោយ​ខុសច្បាប់​នោះ​, កំហឹង​បាន​ផ្ទុះឡើង​ក្នុង​ប្រព័ន្ធ​ផ្សព្វផ្សាយ​សង្គម​នា​រយៈពេល​ប៉ុន្មាន​ថ្ងៃ​ថ្មីៗ​នេះ​បន្ទាប់ពី​របាយការណ៍​បាន​លេចឡើង​ថា ក្នុង​រយៈពេល​បី​ខែ​ចុងក្រោយ​នៃ​ឆ្នាំ​២០១៧, HHS បាន​បាត់បង់​ការតាមដាន​កុមារ​ចំនួន​១,៤៧៥​នាក់​ដែល​បាន​ឆ្លងកាត់​ចូលទៅ​សហរដ្ឋអាមេរិក​មកពី​ម៉ិ​ក​ស៊ិ​កដោយ​ខ្លួនឯង​ហើយ​ត្រូវបាន​គេ​ដាក់​ជាមួយ​អ្នក​ឧបត្ថម្ភ​។​

តួលេខ​នេះ​ត្រូវបាន​លើកឡើង​ដោយ​មន្ត្រី HHS លោក Steven Wagner នៅក្នុង​ការផ្តល់​សក្ខីកម្ម​ក្នុង​ព្រឹទ្ធសភា​កាលពី​ចុងខែ​មេសា​។​

លោក Hargan បាន​និយាយ​នៅក្នុង​សេចក្តីថ្លែងការណ៍​មួយ​ថា “​កុមារ​ទាំងនេះ​មិនបាន​បាត់​ខ្លួន​ទេ​។ អ្នក​ឧបត្ថម្ភ​របស់​ពួកគេ​គ្រាន់តែ​មិនបាន​ឆ្លើយតប​ឬ​មិនអាច​ទាក់ទង​បាន​នៅពេល​ការហៅ​ទូរស័ព្ទ​ត្រូវបាន​ធ្វើឡើង​ប៉ុណ្ណោះ​”​។​

លោក Hargan បាន​និយាយថា បើទោះបី​ជាមាន​កិច្ចខិតខំ​ប្រឹងប្រែង​ដោយ​ស្ម័គ្រចិត្ត​របស់ HHS ដើម្បី​ពិនិត្យមើល​កន្លែង​ស្នាក់នៅ​របស់​ពួកគេ​ក៏ដោយ អ្នក​ឧបត្ថម្ភ​ជា​ញឹកញាប់​មិនបាន​ឆ្លើយតប​ការហៅ​ទូរស័ព្ទ​របស់​ពួកគេ​ទេ​ព្រោះ​ពួកគេ​ខ្លួនឯង​គឺជា​ជនអន្តោប្រវេសន៍​ខុសច្បាប់​ដែល​លោក​បាន​និយាយថា បានបង្ហាញ​ពី “​កំហុស​ជា​មូលដ្ឋាន​” នៅក្នុង​គោលនយោបាយ​អន្តោប្រវេសន៍​របស់​សហរដ្ឋអាមេរិក​។​

លោក​ប្រធានាធិបតី Donald Trump និង​មន្ត្រីរដ្ឋបាល​ជាន់ខ្ពស់​បានការ​ពារ​គោល​នយោបាយ​នៃ​ការ​បំបែក​កូនចៅ​អន្តោប្រវេសន៍​ពី​ឪពុកម្តាយ​របស់​ពួកគេ​ដែលជា​ផ្នែក​មួយ​នៃ​វិធានការ​ពង្រឹង​ព្រំដែន​តឹងរ៉ឹង​ដែល​បានចាប់ផ្តើម​នៅក្នុង​រយៈពេល​ប៉ុន្មាន​សប្តាហ៍​ថ្មីៗ​នេះ​។​

មេធាវី​តំណាង​ឲ្យ​ជនអន្តោប្រវេសន៍​បាន​ហៅ​គោលនយោបាយ​របស់​រដ្ឋ​បាល​ដែល​បែងចែក​កុមារ​ពី​ឪពុកម្ដាយ​នេះ​ថា “​ឃោរឃៅ​និង​អមនុស្សធម៌​”៕ REUTERS

​

[caption id="attachment_918007" align="aligncenter" width="960"]  [/caption]

Source: Kampuchea Thmey Daily