នៅសង្វៀនបាយ័នស្ទឹងមានជ័យ នាយប់ថ្ងៃសុក្រ ទី០១ មិថុនា ២០១៨ នេះ អ្នកផ្គូផ្គងបានផ្តល់ឱកាសអោយអ្នកប្រដាល់ជើងខ្លាំងកម្ពុជា ២ រូបគឺ ពេជ្រ សីហា ក្លិបកងចក្ររាជសីហ៍មានរិទ្ធ និង ចាន់ សាន់ ក្លិបនិរោធមានជ័យ ជួបប្រកួតជាមួយអ្នកប្រដាល់ថៃ។
ពេជ្រ សីហា ត្រូវគេផ្គូអោយជួបប្រកួតជាមួយអ្នកប្រដាល់ថៃឈ្មោះ Khamlaipetch Phakthung chai។ ពួកគេទាំងពីរនឹងជួបប្រកួតគ្នាក្នុងប្រភេទទម្ងន់ ៧០ គីឡូក្រាម។ Khamlaipetch អ្នកប្រដាល់ថៃរូបនេះ ធ្លាប់មកវាយនៅស្រុកខ្មែរច្រើនលើកហើយកន្លងមក។ យ៉ាងណា Khamlaipetch ជាជើងខ្លាំងមួយរូបដែរនៅស្រុកថៃ ហើយមកវ៉ៃនៅស្រុកខ្មែរ ក៏កម្រមានអ្នកយកឈ្នះបានដែរ។ គេធ្លាប់វាយឈ្នះ រឿង សោភ័ណ្ឌ ពីរលើក,ឈ្នះ ឡុង សុភី មួយលើក,ឈ្នះ ឡុង សុវណ្ណឌឿន មួយលើក និងឈ្នះ ផុន ផាន់ណា មួយលើក ហើយក៏ធ្លាប់ចាញ់ មឿន សុខហ៊ុច មួយលើក,ចាញ់ ព្រំ សំណាង ពីរលើកផងដែរ។ ដូច្នេះ ពេជ្រ សីហា មិនអាចធ្វេសប្រហែសបានឡើយ។ នេះបើតាមអ្នកដឹកនាំកីឡាករថៃមកប្រកួត។
ពេជ្រ សីហា ពិបាកសង្ឃឹមឈ្នះ Khamlaipetch ណាស់។ តែបើធៀបជាមួយប្រវត្តិប្រកួតរបស់ពួកគេទាំងពីរវិញ Khamlaipetch មានត្រឹម១០៨លើក ឈ្នះ៨៨លើក ចាញ់១៨លើក និង ស្មើ០២លើក ខណដែល ពេជ្រ សីហា មានកំនត់ត្រាប្រកួតចំនួន១៤២លើក ឈ្នះ១១២លើក ចាញ់២៥លើក ស្មើ៥លើក នោះ។ ទោះជាយ៉ាងនេះក្តី ពេជ្រ សីហា មិនអាចមើលងាយ Khamlaipetch បានឡើយ ព្រោះអ្នកប្រដាល់ថៃរូបនេះមិនសាមញ្ញនោះទេ ព្រោះគេធ្លាប់ឈ្នះជើងខ្លាំងរបស់កម្ពុជាច្រើនរូបហើយ គឺបញ្ជាក់ថាគេមិនអន់នោះទេ រឿងអីគេខ្លាចជួបជាមួយ ពេជ្រ សីហា នោះ?។ ចាំមើល ពេជ្រ សីហា អាចយកឈ្នះ Khamlaipetch នេះបានដែរឬអត់?។ សីហា គេប្រកួតជាមួយថៃចុងក្រោយនេះវាយចាញ់អ្នកប្រដាល់ថៃ Watcharalek ក្នុងទឹកទី២ កាលពីថ្ងៃទី១៣ ឧសភា កន្លងទៅនេះ។
ចំពោះអ្នកប្រដាល់ជើងខ្លាំងស្រករក្រោយ ចាន់ សាន់ ក្លិបនិរោធមានជ័យ ត្រូវគេផ្គូឲ្យជួបជាមួយអ្នកប្រដាល់ថៃឈ្មោះ Petchshunthorn Singhamarsnussak ដោយប្រកួតគ្នាក្នុងទម្ងន់ ៥៤ គីឡូក្រាម។ Petchshunthorn គេមិនធ្លាប់មកប្រកួតនៅកម្ពុជាទេកន្លងមក។ អ្នកប្រដាល់ថៃរូបនេះ បើប្រៀបជាមួយ ចាន់ សាន់ គឺមិនដឹងថាយ៉ាងណានោះទេ ព្រោះថា ចាន់ សាន់ គេជាអ្នកប្រដាល់ស្រករក្រោយ។ យ៉ាងណា Petchshunthorn ប៉ះជាមួយ ចាន់ សាន់ ក៏ប្រហែលជាជួបការលំបាកដែរ ព្រោះថា ចាន់ សាន់ ថ្វីត្បិតតែមានប្រវត្តិប្រកួតមិនជាច្រើនក្តី តែគេមានស្នៀតប្រដាល់ល្អ និងស្គាល់ចាញ់តិចបំផុត។
ជាលើកទី៣ ប៉ុណ្ណោះដែល ចាន់ សាន់ បានជួបប្រកួតជាមួយថៃនេះ។ ក្នុងការប្រកួតពីរលើកកន្លងមកនោះ គេវាយឈ្នះម្តង និងចាញ់ម្តង។ តែយ៉ាងណា ចាន់ សាន់ ក៏ត្រូវប្រយ័ត្នដែរសម្រាប់ការប្រកួតលើកនេះ។ ដូច្នេះចាំមើល តើនរណាឈ្នះរវាង ចាន់ សាន់ និង Petchshunthorn នេះ?។ គេមានកំណត់ត្រាប្រកួតចំនួន៦២លើក ឈ្នះ៥២លើក ចាញ់តែ០៧លើកប៉ុណ្ណោះ និង ស្មើ០៣លើក។ ចំណែក Petchshunthorn វិញគេមានកំណត់ត្រាប្រកួតចំនួន៦៥លើក ឈ្នះ៤២លើក ចាញ់២១លើក និងស្មើ០២លើក។
ចំពោះការប្រកួតរវាងអ្នកប្រដាល់រួមជាតិវិញ ហូ សុធា អ្នកប្រដាល់ក្លិបឃ្លាំងមឿងកីឡា ខេត្តពោធិសាត់ នឹងត្រូវជួបប្រកួតជាមួយ អេ សារ័ត្ន អ្នកប្រដាល់ក្លិបអេភូថងកីឡា ដោយប្រកួតក្នុងទម្ងន់ ៥៤ គីឡូក្រាម។ ពួកគេទាំងពីរមិនបានប៉ះគ្នាទេកន្លងមក។ ហូ សុធា ជាអ្នកប្រដាល់ស្រករក្រោយ គេមានស្នៀតប្រដាល់ល្អ ចិត្តប្រដាល់ធំ។ ទោះជាយ៉ាងណា សុធា មិនដឹងថាអាចយកឈ្នះ អេ សារ័ត្ន បានឬអត់នោះឡើយ ព្រោះថា អេ សារ័ត្ន ជាអ្នកប្រដាល់ជើងចាស់ដែលវាយខ្លាំង និងវាយមិនបណ្តាក់ដៃឡើយ។
អ្នកប្រដាល់ ឡេង ម៉ៅ ក្លិបម៉ៃទីក្រាំងយ៉ូវ នឹងជួបប្រកួតជាមួយអ្នកប្រដាល់ សំ ភក្តី ក្លិបរ៉ាហាប់ស្វាយប៉ាក ដោយប្រកួតក្នុងទម្ងន់ ៦៣,៥០០ គីឡូក្រាម។ ពីរនាក់នេះជាអ្នកប្រដាល់ថ្មីស្រករក្រោយដូចគ្នា៕
Source: Kampuchea Thmey Daily
0 Comments