អាជ្ញាធរបាននិយាយកាលពីថ្ងៃសុក្រថា ខ្មាន់កាំភ្លើងអាយុ៣៨ឆ្នាំម្នាក់ ដែលបើកការវាយប្រហារទៅលើការិយាល័យកាសែតមួយនៅទីក្រុង Annapolis បានបិទទ្វារក្រោយជាមួយនឹងក្តីសង្ឃឹមថានឹងសម្លាប់មនុស្សឲ្យបានច្រើនតាមដែលគាត់អាចធ្វើបាន។
ប៉ូលិសបាននិយាយថា ជនសង្ស័យដែលត្រូវបានគេស្គាល់អត្តសញ្ញាណថាជាអ្នករស់នៅក្នុងរដ្ឋ Maryland ឈ្មោះ Jarrod Ramos បានប្រើប្រាស់កាំភ្លើងដែលទិញដោយស្របច្បាប់នៅក្នុងការវាយប្រហារនោះ ដែលធ្វើឲ្យបុគ្គលិកចំនួន៥នាក់របស់កាសែត Capital Gazette ស្លាប់ហើយពីរនាក់ទៀតរងរបួសកាលពីថ្ងៃព្រហស្បតិ៍។
ចៅក្រម Wes Adams បានប្រាប់សន្និសីទកាសែតថា ចៅក្រមម្នាក់បានបង្គាប់ឲ្យលោក Ramos ត្រូវឃុំខ្លួនដោយគ្មានការធានាឲ្យនៅក្រៅឃុំលើករណីឃាតកម្មកម្រិតទីមួយចំនួនប្រាំករណី។
លោក Adams បាននិយាយថា ការសម្រេចចិត្តនេះគឺផ្អែកលើភស្តុតាងដែលបង្ហាញពី “ការវាយប្រហារសម្របសម្រួល” លើកាសែតនេះនៅក្នុងរដ្ឋធានីប្រវត្តិសាស្ត្ររបស់រដ្ឋ Maryland ដែលរួមមាន “ការបិទទ្វារក្រោយនិងការប្រើយុទ្ធសាស្ត្រក្នុងការប្រមាញ់និងបាញ់ជនរងគ្រោះដែលគ្មានកំហុស”។
មេប៉ូលិសឈ្មោះ Timothy Altomare នៃតំបន់ Anne Arundel បាននិយាយថា “គាត់នៅទីនោះដើម្បីសម្លាប់មនុស្សជាច្រើនតាមដែលគាត់អាចសម្លាប់បាន”។
ប៉ូលិសបានបញ្ជាក់ថា លោក Ramos មានការខឹងសម្បាជាយូរមកហើយប្រឆាំងនឹងកាសែតនេះដោយសារតែអត្ថបទកាលពីឆ្នាំ២០១១អំពីករណីយាយីព្រហ្មទណ្ឌមួយដែលត្រូវបានចោទប្រកាន់ប្រឆាំងគាត់ដោយអតីតមិត្តរួមថ្នាក់វិទ្យាល័យម្នាក់។
អតីតនិពន្ធនាយកឈ្មោះ Thomas Marquardt បានប្រាប់ MSNBC ថា លោក Ramos បានបន្តធ្វើការគំរាមកំហែងចំពោះអ្នកយកព័ត៌មាននិងកាសែតនេះដូច្នេះបុគ្គលិកទាំងអស់ត្រូវបានគេប្រាប់ឲ្យហៅទូរស័ព្ទទៅលេខបន្ទាន់៩១១ប្រសិនបើ Ramos ចូលការិយាល័យ។
លោកបានបញ្ជាក់ថា លោក Ramos បានបដិសេធសហការជាមួយក្រុមស៊ើបអង្កេតហើយបានឈរស្ងៀមខណៈពេលដែលគាត់បង្ហាញខ្លួននៅក្នុងតុលាការតាមរយៈ videolink កាលពីថ្ងៃសុក្រ៕ AFP
[caption id="attachment_939349" align="aligncenter" width="960"]
[/caption]Source: Kampuchea Thmey Daily
0 Comments