ភ្នំពេញ ៖ បើទោះបីថ្ងៃមិនមែនជាថ្ងៃរដ្ឋបាលក៏ដោយ នោះចំពោះបញ្ហាសន្តិសុខសណ្តាប់គឺជាបញ្ហាចម្បងសម្រាប់រដ្ឋបាលខណ្ឌដូនពេញ ដែលត្រូវធ្វើជាប្រចាំ ជាក់ស្តែងនៅព្រឹក ថ្ងៃសៅរ៍ ៣រោច ខែបឋមាសាឍ ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី៣០ ខែមិថុនា ឆ្នាំ២០១៨នេះលោក សុខ ពេញវុធ អភិបាលនៃគណៈអភិបាលខណ្ឌដូនពេញបានបញ្ជាឲ្យកម្លាំងគណៈបញ្ជាការឯកភាពរដ្ឋបាលខណ្ឌដូនពេញ បានបន្តចុះរៀបចំសណ្តាប់ធ្នាប់អនាម័យសាធារណៈក្នុងមូលដ្ឋានខណ្ឌដូនពេញបន្តទៀត។
ប្រតិបត្តិការចុះរៀបចំសណ្តាប់ធ្នាប់ជាប្រចាំនោះ គឺផ្តោតសំខាន់លើកផ្លូវសំខាន់ៗទាំង០៩ខ្សែ ជាគោលការណ៍របស់រដ្ឋបាលរាជធានីភ្នំពេញ ដាក់ឲ្យរដ្ឋបាលខណ្ឌចុះអនុវត្តន៍។ ក្នុងនោះកម្លាំងគណៈបញ្ជាការឯកភាពរដ្ឋបាលខណ្ឌ បានបន្តចុះរៀបចំសណ្តាប់ធ្នាប់របៀបរៀបរយសាធារណៈនៅតីរវិថីព្រះស៊ីសុវត្ថិ(មុខព្រះបរមរាជវាំង) មហាវិថីព្រះមុនីវង្ស មហាវិថីព្រះនរោត្តម មហាវិថីសហព័ន្ធរុស្ស៊ី ផ្លូវលេខ៤៧មុខមន្ទីរពេទ្យព្រះកេតុមាលា ផ្លូវលេខ៩០មុខមន្ទីរពេទ្យកុមារគន្ធបុប្ផាទី៤ រាជាយស្ម័យយានកម្ពុជា ផ្លូវលេខ១០៦-១០៨ សួនច្បារអតីតទីលានប្រជាធិបតេយ្យចាស់ ផ្លូវលេខ៩៣ ផ្សារតូច ជុំវិញអតីតទ្រីមលែន សួនច្បារមុខសណ្ឋាគារណាហ្គាវើល មហាវិថីព្រះសុរាម្រិត និង មហាវិថីព្រះសម្តេចសុធារស។
ក្នុងការរៀបចំនេះ កម្លាំងគណៈបញ្ជាឯកភាពខណ្ឌរដ្ឋបាលដូនពេញ បានប្រកាសសេចក្តីជូនដំណឹង ឲ្យបងប្អូនប្រជាពលរដ្ឋត្រូវប្រកបអាជីវកម្មតាមគំនូស ដែលរដ្ឋបាលខណ្ឌបានកំណត់ កម្លាំងយើងក៏បានធ្វើការស្ទូចរថយន្តដែលចតនៅផ្លូវហាមឃាត់បានចំនួន០១គ្រឿង ម៉ូតូកង់បីចំនួន១៤គ្រឿង និង រទះលក់ដូរបានចំនួន៣គ្រឿង យកមករក្សាទុកនៅសាលាខណ្ឌដូនពេញ ដើម្បីធ្វើការអប់រំណែនាំ។
ចំពោះការងារបរិស្ថាន អនាម័យ និងសោភ័ណភាពទីក្រុង វិញ លោក អភិបាលខណ្ឌ បានបញ្ជាឲ្យគ្រប់គោលដៅប្រជាការពារធ្វើការសំអាតសំរាម ដោយបានយកម៉ាស៊ីនបាញ់លាងចល័ត ធ្វើការសំអាតតាមដេប៉ូសំរាម, ធ្វើការប្រមូលសំរាមក្រោយពីក្រុមហ៊ុនស៊ីនទ្រីប្រមូលរួច ប៉ុន្តែមានបងប្អូនប្រជាពលរដ្ឋមួយចំនួនបញ្ចេញសំរាមខុសម៉ោងពេលកំណត់ ដូចជា ផ្លូវលេខ៤៧ ផ្លូវលេខ១០៦-១០៨ និងផ្លូវព្រះស៊ីសុវត្ថិ ជាពិសេស លោក អភិបាលខណ្ឌ បានដឹកនាំកម្លាំងប្រជាការពារយកម៉ូតូកង់បី ធ្វើការបូមបាញ់លាងសំអាតតាមសួនច្បារ-ច្រាំងទន្លេ ចាប់ពីខាងមុខផ្សាររាត្រីរហូតដល់កំពង់ចម្លងអរិយក្សត្រ, លាងសំអាតថ្នល់-ការ៉ូឡាសួនសម្តេចតេជោហ៊ុនសែន, សួនច្បារព្រះបរមរតនៈរូប សួនច្បារមុខវិទ្យាស្ថានជាតិអប់រំ មហាវិថីព្រះសីហនុ និងមហាវិថីព្រះនរោត្តម ដើម្បីឲ្យមានបរិស្ថានអនាម័យល្អ ជូនបងប្អូនប្រជាពលរដ្ឋមកលេងកម្សាន្ត និងហាត់ប្រាណជាដើម-ល-៕
Source: Kampuchea Thmey Daily
0 Comments