កាសែត Washington Post បានរាយការណ៍កាលពីថ្ងៃសុក្រថា មន្ទីរបញ្ចកោណកំពុងវាយតម្លៃអំពីការចំណាយនៃការផ្ទេរ ឬដកកងទ័ពចេញពីប្រទេសអាល្លឺម៉ង់ ដែលនៅទីនោះ សហរដ្ឋអាមេរិកមានកម្លាំងទ័ពជំនួយធំបំផុតរបស់ខ្លួននៅក្រៅប្រទេស។
ប្រធានាធិបតីសហរដ្ឋអាមេរិក Donald Trump បានពិភាក្សាអំពីសំណើរនេះរួចទៅហើយជាមួយមន្ត្រីយោធា។សំណើនេះបានបង្កឲ្យមានការព្រួយបារម្ភពីសម្ព័ន្ធមិត្តអង្គការណាតូនៅអឺរ៉ុប។
កាសែតបានឲ្យដឹងថា ក្នុងចំណោមជម្រើសដែលកំពុងត្រូវបានពិចារណាគឺរួមមានការមាតុភូមិនិវត្តន៍នូវកងទ័ពជំនួយយ៉ាងច្រើនក្នុងចំណោមកងទ័ពបំពេញភារកិច្ចសកម្មប្រហែល៣៥,០០០នាក់ឬការដកកងទ័ពទាំងស្រុងឬមួយចំនួនចេញពីប្រទេសអាល្លឺម៉ង់ទៅប៉ូឡូញ។
ដោយលើកឡើងពីប្រភពអនាមិក, កាសែតនេះបានសង្កត់ធ្ងន់ថា ការសិក្សានេះគ្រាន់តែជាការពិនិត្យជម្រើសផ្ទៃក្នុងនៅដំណាក់កាលនេះប៉ុណ្ណោះ។
ទន្ទឹមនោះ អ្នកនាំពាក្យក្រុមប្រឹក្សាសន្តិសុខជាតិសេតវិមានបានបដិសេធការវិភាគបែបនេះ។
ស្របពេលជាមួយគ្នានោះ អ្នកនាំពាក្យមន្ទីរបញ្ចកោណលោក Eric Pahon ក៏បានបដិសេធផែនការណាមួយសម្រាប់ការដកទ័ពនេះផងដែរ។
លោកបានថ្លែងនៅក្នុងសេចក្តីថ្លែងការណ៍មួយថា “មន្ទីរបញ្ចកោណតែងតែពិនិត្យឡើងវិញអំពីកម្លាំងនិងអនុវត្តការវិភាគដែលមានតម្លៃនិងអត្ថប្រយោជន៍។ នេះមិនមែនជាអ្វីថ្មីទេ។ ប្រទេសអាល្លឺម៉ង់បានទទួលវត្តមានកងកម្លាំងអាមេរិកដ៏ធំបំផុតនៅទ្វីបអឺរ៉ុប។ យើងនៅតែមានការយកចិត្តទុកដាក់ខ្ពស់ចំពោះតម្លៃរួមនិងទំនាក់ទំនងរឹងមាំរវាងប្រទេសយើងទាំងពីរ។ យើងនៅតែប្តេជ្ញាចិត្តយ៉ាងពេញលេញចំពោះសម្ព័ន្ធមិត្តណាតូរបស់យើង”។
គួរបញ្ជាក់ថា ប្រធានាធិបតីអាមេរិកគ្រោងនឹងចូលរួមកិច្ចប្រជុំកំពូលរបស់ក្រុមប្រទេសនាយមហាសមុទ្រអាត្លង់ទិកនៅក្នុងទីក្រុង Brussels នៅថ្ងៃទី១១ដល់ថ្ងៃទី១២ខែកក្កដា។ នៅពេលនោះ គាត់នឹងដាក់សម្ពាធលើសម្ព័ន្ធមិត្តឲ្យចំណាយយ៉ាងហោចណាស់ពីរភាគរយនៃផលិតផលក្នុងស្រុកសរុបរបស់ពួកគេលើការការពារ៕ AFP
Source: Kampuchea Thmey Daily
0 Comments