មួកសុវត្ថិភាពចំនួន៨៩៤ ត្រូវបានចែកជូនដល់សិស្សសាលាបឋមសិក្សាកុលាបទី១

ភ្នំពេញ ៖ ដោយមានកិច្ចសហការគ្នារវាងក្រុមហ៊ុនហ៊ីយ៉ាន់ដាយ ,ទីភ្នាក់ងារសហប្រតិបត្តិការអន្តរជាតិកូរ៉េ (កយកា) និងក្រសួងសាធារណការនិងដឹកជញ្ជូនបានរួមគ្នាបើកយុទ្ធនាការសុវត្ថិភាពចរាចរណ៍ផ្លូវគោកសម្រាប់កុមារកម្ពុជាក្នុងគោលបំណងដើម្បីផ្សព្វផ្សាយនិងអប់រំអំពីការចូលរួមគោរពច្បាប់ចរាចរណ៍ក្នុងន័យបញ្ចៀសនូវគ្រោះថ្នាក់។

យុទ្ធនាការសុវត្ថិភាពចរាចរណ៍ផ្លូវគោកសម្រាប់កុមារកម្ពុជានេះគឺបានប្រព្រឹត្តធ្វើឡើងកាលពីព្រឹកថ្ងៃទី២៩ ខែមិថុនា ឆ្នាំ២០១៨ ស្ថិតនៅបរិវេណសាលាបឋមសិក្សាកុលាបទី១ក្រោមវត្តមានលោកជំទាវ មិន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក,លោក ចុង យុនហ្គីន ប្រធានតំណាងអង្គការKOICAនិងលោក Brian Ko នាយកប្រតិបត្តិក្រុមហ៊ុនហ៊ីយ៉ាន់ដាយកាំកូម៉ូទ័រប្រចាំកម្ពុជា។

ព្រឹត្តិការណ៍នេះ ត្រូវបានរៀបចំឡើង ដើម្បីគាំទ្រដល់រាជរដ្ឋាភិបាលកម្ពុជា និងដើម្បីលើកកម្ពស់ការយល់ដឹងអំពីសុវត្ថិភាព ចរាចរណ៍ផ្លូវគោកក្នុងចំណោមកុមារដែលជាអ្នកប្រើប្រាស់ផ្លូវ និងជាជនងាយរងគ្រោះដោយគ្រោះថ្នាក់ចរាចរណ៍និង ដើម្បីកាត់បន្ថយការស្លាប់និងរបួសដោយសារគ្រោះថ្នាក់ចរាចរណ៍។

មិនតែប៉ុណ្ណោះសម្រាប់គោលបំណងសំខាន់គឺកាត់បន្ថយការស្លាប់និងរបួសដោយគ្រោះថ្នាក់ចរាចរណ៍ផ្លូវគោក ក្នុងចំណោមកុមារទាំងឡាយតាមរយៈការយល់ដឹងនិងយុទ្ធនាការ សុវត្ថិភាពចរាចរណ៍ផ្លូវគោក។ គោលដៅផ្សេងទៀតរួមមាន ៖ កែលំអអាកប្បកិរិយារបស់អ្នកប្រើប្រាស់ផ្លូវគោកដើម្បីកែលំអកន្លែងសម្រាប់ថ្មើរជើងឆ្លងកាត់សម្រាប់កុមារនិងដើម្បីលើកកម្ពស់ចំណេះដឹងក្នុងចំណោមកុមារនៅពេលធ្វើដំណើរតាមផ្លូវ។

បើតាមការថ្លែងឲ្យដឹងពីសំណាក់លោកជំទាវ មិន មាណវី បានលើកឡើងថា ការផ្តល់មួកសុវត្ថិភាពសម្រាប់កុមារនិងឯកសារអប់រំដើម្បីលើកកម្ពស់សុវត្ថិភាពចរាចរណ៍ជូនដល់សិស្សសាលាបឋមសិក្សាកុលាបទី១នៅពេលនេះ គឺជាការឆ្លើយតបយ៉ាងស័ក្តិសិទ្ធិចំពោះហានិភ័យបណ្តាលមកពីគ្រោះថ្នាក់ចរាចរណ៍នៅកម្ពុជាជាពិសេសចំពោះកុមារដែលជាគោលដៅងាយរងគ្រោះនិងជាទំពាំងស្នងឫស្សីដែលនឹងត្រូវក្លាយជាយុវជននិងជាធនធានមនុស្សដ៏មានសក្ដានុពលសម្រាប់ការអភិវឌ្ឍន៍ និងការរក្សាការពារសុខសន្តិភាព និងអធិបតេយ្យភាពទឹកដីរបស់សង្គមជាតិកម្ពុជា។

សូមបញ្ជាក់ថា ជាផ្នែកមួយនៃយុទ្ធនាការក្រុមហ៊ុនHyundai Camko Motor និង KOICAក៏បានផ្តល់មួកសុវត្ថិភាពចំនួន៨៩៤មួកស្លាកចំណាំងផ្លាតសម្រាប់កង់និងម៉ូតូចំនួន១០០០០ផ្ទាំងនិងផ្លិតសុវត្ថិភាពចរាចរណ៍ចំនួន២១៦០០ផ្លិតទៅក្រសួងសាធារណការនិងដឹកជញ្ជូន។ រាល់សម្ភារៈសុវត្ថិភាពចរាចរណ៍ទាំងអស់ក្រុមហ៊ុន Hyundai Camko Motor,KOICAនិងក្រសួងសាធារណការនិងដឹកជញ្ជូនបានផ្តល់ដល់សិស្សនៅសាលាបឋមសិក្សាកុលាបទី១។ ចំណែកឯសម្ភារៈសុវត្ថិភាពចរាចរណ៍ ដែលនៅសេសសល់នឹងត្រូវបានចែកចាយទៅតាមបណ្តាខេត្តមួយចំនួនរហូតដល់ចុងខែធ្នូ ឆ្នាំ ២០១៨៕