បាត់ដំបង ៖ យុវជនម្នាក់បានស្លាប់ភ្លាមៗនៅនឹងកន្លែងកើតហេតុ បន្ទាប់ពីយុវជនរូបនេះបានធ្វើការបើកបរក្នុងល្បឿនយ៉ាងលឿន ថែមទាំងហ៊ានឡើងជែងដោយមិនបានមើលមុខ មើលក្រោយឲ្យបានច្បាស់លាស់ ទើបមានការប៉ះទង្គិចជាមួយនឹងរថយន្តធុនធ្ងន់ ដែលកំពុងបើកមកពីមុខ។
យោងតាមរបាយការណ៍របស់សមត្ថកិច្ចបានបញ្ជាក់ថា ករណីគ្រោះថ្នាក់ចរាចរណ៍នេះបានកើតឡើងនាថ្ងៃទី២៩ ខែមិថុនា ឆ្នាំ២០១៨ វេលាម៉ោង៨ និង ៣០នាទី ព្រឹក ត្រង់ចំណុចក្រុមទី១២ ភូមិអូរតាគី ឃុំអូរតាគី ស្រុកថ្មគោល ខេត្តបាត់ដំបង លើកំណាត់ផ្លូវជាតិលេខ ៥ រវាងរថយន្ត និងម៉ូតូ ។
បើយោងតាមសាក្សីមួយចំនួនបាននិយាយថា នៅមុនពេលកើតហេតុ គឺភាគីម៉ូតូបានបើកបរយ៉ាងលឿនក្នុងទិសដៅពីជើង ទៅត្បូង គឺនៅពេលនោះដែរដោយសារខាងមុខមានរថយន្តតូរីសកំពុងបើកបរស្របទិសគ្នា ទើបធ្វើឲ្យអ្នកបើកបរម៉ូតូបានឡើងជែងដោយគ្មានការប្រុងប្រយ័ត្នបន្តិចសោះឡើយ។
សាក្សីបានបន្តថា នៅពេលនោះហើយដែលម៉ូតូបានជួបនឹងឧបសគ្គ ដោយសារតែមានរថយន្តដឹកដីធុនធ្ងន់របស់ក្រុមហ៊ុនធ្វើផ្លូវ ពាក់ស្លាកលេខ ០៨២៧ ទើបធ្វើឲ្យភាគីម៉ូតូមិនអាចគេចទៅណាបាន ក៏បុកនឹងរថយន្តនោះតែម្តង បណ្តាលឲ្យស្លាប់ខ្លួនឯងយ៉ាងអាណោចអាធ័ម ដោយឡែកម៉ូតូបានរុលទៅនៅពីក្រោមរថយន្ត។
អ្នកបើកបររថយន្តដែលបានរត់គេចខ្លួនត្រូវបានគេស្គាល់ឈ្មោះ ផាន់ សាវឹង ភេទប្រុសអាយុ៥៥ឆ្នាំ រស់នៅក្រុងបាត់ដំបង ចំណែកអ្នកបើកបរម៉ូតូឈ្មោះ សេង វិបុល ភេទប្រុស អាយុ១៨ឆ្នាំ រស់នៅភូមិចារ ឃុំអន្លង់រុន ស្រុកថ្មគោល ខេត្តបាត់ដំបង ( ស្លាប់នៅនឹងកន្លែងកើតហេតុ )។
បច្ចុប្បន្នមធ្យោបាយទាំងអស់ ត្រូវបានកម្លាំងសមត្ថកិច្ចនាំយកទៅរក្សាទុកនៅអធិការដ្ឋានដើម្បីធ្វើការដោះស្រាយជាក្រោយ ចំណែកសពក៏ត្រូវបានកំលាំងប្រគល់ទៅឲ្យក្រុមគ្រួសារនាំយកទៅធ្វើបុណ្យតាមប្រពៃណីហើយដែរ៕
Source: Kampuchea Thmey Daily
0 Comments