ក្លិបបឹងកេតអែហ្វស៊ី ដែលកំពុងឈរកំពូលតារាងពានរង្វាន់លីគកំពូលកម្ពុជា Metfone Cambodian League 2018 បានប្រកាសចុះកិច្ចសន្យា នាំយកតារាចម្រៀងបែបយុវវ័យម្នាក់ចូលរួមជាសមាជិកក្រុម ខណៈក្រុមមួយនេះត្រូវការពិន្ទុបន្ថែមនៅជើងទី២ ដើម្បីការពារតំណែងជើងឯកផងដែរ។
យោងតាមសេចក្តីជូនដំណឹងរបស់ក្លិបនៅល្ងាចសុក្រ សប្ដាហ៍នេះបានបញ្ជាក់ថា៖«ក្លិបមានកិត្តិយសសូមជម្រាបជូនពីការចុះកិច្ចហត្ថលេខាជាមួយកីឡាករចំណូលថ្មី ចេន មកចូលរួមជាមួយយើង។ចេន ត្រូវបានមហាជនស្គាល់ថាជាតារាងចម្រៀងវ័យក្មេងដែលសំឡេងពីរោះគ្រប់បទចម្រៀងរបស់ ចេន សុទ្ធតែចាក់ចំបេះដូងយុវវ័យនាពេលបច្ចុប្បន្ន និងទទួលបានការគាំទ្រជានិច្ច។ ក្រៅពីអាជីពជាតារាចម្រៀងនៅក្រុមតន្ត្រី Mustache Band ចេន មានទេពកោសល្យនិងចំណូលចិត្តខ្លាំងលើវិស័យកីឡាជាពិសេសគឺកីឡាបាល់ទាត់តែម្ដង»។
ក្លិបបឹងកេត បានសំណូមពរដល់អ្នកគាំទ្រថា៖«ក្លិបសង្ឃឹមថាអ្នកគាំទ្រទាំងអស់នឹងផ្ដល់កម្លាំងចិត្តដល់រូបគេដើម្បីជំរុញឲ្យខ្លួនគេកាន់តែមានកម្លាំងចិត្តក្នុងការវិវឌ្ឍខ្លួនក្លាយជាកីឡាករអាជីពយ៉ាងពិតប្រាកដនាពេលដ៏ខ្លីខាងមុខ»។ ក្រុមតន្ត្រី Mustache Band មានសមាជិក៥នាក់ ខណៈ ចេន ជាសមាជិកម្នាក់ដែរ។ ក្រុមតន្ត្រីបែបយុវវ័យនេះធ្លាប់ចេញបទចម្រៀងពីរោះៗជាច្រើនបទដូចជា ពាក្យថាសង្សារចាស់, មិនអាចទៅរួច, ប្រុសម្នាក់នេះសំខាន់នៅពេលណា ជាដើម។
ក្រុមបឹងកេត មានកីឡាករចេញចូលច្រើន ដោយក្នុងនោះកីឡាករដែលសម្រេចចាកចេញពីក្លិបមានដូចជា រស់ សំអឿន ទៅកាន់វិសាខា ស៊ូ យ៉ាទី ទៅណាហ្គាវើល សុខ សុវណ្ណ ទៅវិសាខា ឃួន ឡាបូរ៉ាវី ទៅលីគលំដាប់ទី៣ប្រទេសថៃ។ ងាកមកមើលកីឡាករដែលសម្រេចចូលរួមជាមួយក្រុមមានដូចជា ចាន់ វឌ្ឍនាកា, យុគ្គ អៈអារី, កែ វណ្ណៈ, ពុំ បារាំង ជាដើម។
ឆ្លងកាត់១១ប្រកួតក្នុងជើងទី១នៃពានរង្វាន់លីគកំពូលកម្ពុជា កន្លងទៅក្រុមបឹងកេត ឈ្នះបាន៨លើក ស្មើគ្នា៣លើក និងមិនធ្លាប់ចាញ់នោះទេ ខណៈក្រុមនេះកំពុងឈរកំពូលតារាងបណ្តោះអាសន្ន។ ចំណែកប្រកួតបន្ទាប់នៅសប្ដាហ៍ទី១២ ចុងសប្ដាហ៍នេះក្រុមបឹងកេត ត្រូវប៉ះក្រុមអាស៊ីអឺរ៉ុប នៅវេលាម៉ោង៦ល្ងាចថ្ងៃសៅរ៍ ទី៣១ ខែមិថុនា ឆ្នាំ២០១៨ លើទីលានពហុកីឡដ្ឋានជាតិ។ ដូច្នេះកីឡាករថ្មីៗនៅក្នុងក្រមបឹងកេត បូកទាំងចេន ផងគឺសុទ្ធតែអាចបង្ហាញខ្លួននៅលើទីលានជាផ្លូវការបានចាប់ពីប្រកួតនេះតទៅ៕
Source: Kampuchea Thmey Daily
0 Comments