ពលរដ្ឋ​ហ្គា​ហ្សា​ពីរ​នាក់​ ត្រូវ​បាញ់សម្លាប់​ក្នុង​ការ​ប៉ះទង្គិច​គ្នា​នៅ​ព្រំដែន​អ៊ីស្រាអែល

ក្រសួងសុខាភិបាល​របស់​ទឹកដី​ ដែល​គ្រប់គ្រង​ដោយ​ក្រុម​ហា​ម៉ា​ស​ បាន​និយាយថា ទាហាន​អ៊ីស្រាអែល​បាន​បាញ់សម្លាប់​ជនជាតិ​ប៉ា​ឡេ​ស្ទី​ន​ចំនួន​ពីរ​នាក់​ក្នុងការ​ប៉ះទង្គិច​គ្នា​នៅ​ព្រំដែន​កាលពី​ថ្ងៃ​សុក្រ​នៅ​ភាគខាងត្បូង​តំបន់​ហ្គា​ហ្សា​ស្ទ្រី​ប។

អ្នកនាំពាក្យ​ក្រសួង​លោក Ashraf al-Qudra បាន​ប្រាប់ AFP ថា យុវជន​ប៉ា​ឡេ​ស្ទី​ន​ម្នាក់​អាយុ​ប្រហែល​១៣​ឆ្នាំ​ត្រូវបាន​បាញ់​ចំក្បាល​នៅក្បែរ​ទីប្រជុំជន Khan Yunis ក្នុង​តំបន់​ហ្គា​ហ្សា​ស្ទ្រី​ប​។ ទោះបីជា​យ៉ាងណាក៏ដោយ ឈ្មោះ​និង​អាយុ​ពិត​របស់គាត់​មិនត្រូវ​បាន​គេ​បញ្ជាក់​នោះទេ​។​
​
អ្នកនាំពាក្យ​ដដែល​បាន​បន្ថែមថា លោក Mohammed al-Hamayda អាយុ​២៤​ឆ្នាំ​បាន​ស្លាប់​ដោយសារ​របួស​ចំ​ត្រង់​ពោះ​បន្ទាប់ពី​ត្រូវ​បាញ់​ដោយ​អ៊ីស្រាអែល​នៅក្នុង​ហេតុការណ៍​ដាច់ដោយឡែក​មួយទៀត​នៅ​ភាគ​ខាងកើត​ទីក្រុង Rafah​។​
​
កងទ័ព​អ៊ីស្រាអែល​បាន​និយាយ​នៅពេល​រសៀល​ថា “​ជនជាតិ​ប៉ា​ឡេ​ស្ទី​ន​រាប់ពាន់នាក់​បាន​ចូលរួម​ក្នុង​កុបកម្ម​ហិង្សា​ខ្លាំងក្លា​ហើយ​បាន​ប្រព្រឹត្ត​អំពើ​ភេរវកម្ម​នៅក្នុង​តំបន់​ជាច្រើន​នៅតាម​របង​សន្តិសុខ​ហ្គា​ហ្សា​ស្ទ្រី​ប​”​។​
​
សេចក្តីថ្លែងការណ៍​ជា​ភាសា​អង់គ្លេស​បាន​និយាយថា គ្រាប់បែកដៃ​និង​ដុំថ្ម​ត្រូវបាន​គប់​ដាក់​ទាហាន​។ វា​បាន​និយាយថា កងកម្លាំង​អ៊ីស្រាអែល​បាន​ឆ្លើយតប​ទៅវិញ​ដោយ​គ្រាប់កាំភ្លើង​ពិត​។​
​
កងទ័ព​បាន​និយាយថា ការស្លាប់​របស់​ក្មេងប្រុស​ម្នាក់នេះ​នឹងត្រូវ​បាន​ពិនិត្យ​។​
​គួរ​បញ្ជាក់ថា ចាប់តាំងពី​បាតុកម្ម​បាន​ផ្ទុះឡើង​នៅតាម​បណ្តោយ​ព្រំដែន​ហ្គា​ហ្សា​កាលពី​ថ្ងៃទី ៣០​ខែមីនា​មក ជនជាតិ​ប៉ា​ឡេ​ស្ទី​ន​យ៉ាងតិច​១៣៧​នាក់​ត្រូវបាន​សម្លាប់​ដោយ​ការបាញ់​របស់​អ៊ីស្រាអែល​។​
​
ភាគច្រើន​គឺជា​អ្នក​ដែល​ចូលរួម​ក្នុង​ការតវ៉ា​ប៉ុន្តែ​អ្នក​ផ្សេងទៀត​គឺជា​អ្នក​ដែល​ព្យាយាម​រំលោភ​ឬ​បំផ្លាញ​របង​ព្រំដែន​។​
​គ្មាន​ជនជាតិ​អ៊ីស្រាអែល​ណា​ម្នាក់​ត្រូវបាន​សម្លាប់​ទេ​៕ AFP

​

[caption id="attachment_939157" align="aligncenter" width="960"]  [/caption]

Source: Kampuchea Thmey Daily