អគ្គីសនី​កម្ពុជា ប៉ះ​វិសាខា ហើយ​វេ​ស្ទើ​ន​ភ្នំពេញ ជួប​ប៉ូលីស និង​ទ័ព ទទួល​អង្គ​រថា​យ​ហ្គឺ​រ នៅ​ល្ងាច​ថ្ងៃអាទិត្យ​នេះ

ក្រុមបាល់ទាត់​អគ្គីសនី​កម្ពុជា ត្រូវ​ប៉ះ​ក្រុម​វិសាខា ហើយ​ក្រុម​វេ​ស្ទើ​ន​ភ្នំពេញ ជួប​ក្រុម​អគ្គស្នងការដ្ឋាន​នគរ​បាល​ជាតិ (​ប៉ូលីស​) និង​ក្រុម​អគ្គស្នងការដ្ឋាន​នគរ​បាល​ជាតិ (​ទ័ព​) ទទួល​ក្រុម​អង្គ​រថា​យ​ហ្គឺ​រ នៅ​ល្ងាច​ថ្ងៃអាទិត្យ ទី​១ ខែកក្កដា ឆ្នាំ​២០១៨ ប្រចាំ​សប្ដាហ៍​ទី​១២​នៃ​ពានរង្វាន់​លី​គ​កំពូល​កម្ពុជា Metfone Cambodian League 2018​។

*​អគ្គីសនី​កម្ពុជា ប៉ះ​វិសាខា
ក្រុមបាល់ទាត់​អគ្គីសនី​កម្ពុជា នឹងត្រូវ​ទទួល​ក្រុម​វិសាខា នៅវេលា​ម៉ោង​៣​រសៀល​លើ​ទីលាន​កីឡដ្ឋាន​អគ្គីសនី​កម្ពុជា របស់ខ្លួន ព្រមទាំង​មាន​ផ្សាយ​តាម​ទំព័រ​ហ្វេ​ស​ប៊ុ​ក​របស់​គណៈកម្មការ​ប្រកួត​បាល់ទាត់​ជាតិ (CNCC)​។ ក្រុម​អគ្គីសនី​កម្ពុជា មិនទាន់​គេចផុត​ពី​តំបន់​បាត​តារាង​នៅឡើយ​នោះទេ ក្រោយ​ប្រកួត​ឈ្នះ​បាន​១​លើក ស្មើគ្នា​២​លើក និង​ចាញ់​៨​លើក​ក្នុង​ប្រកួត​កន្លងមក​។ លោក ប្រាក់ វុទ្ធី គ្រូបង្វឹក​របស់​ក្រុម​នេះ​ធ្លាប់​លើកឡើង «​ឆ្នាំនេះ​ថ្នាក់ដឹកនាំ​ក្លិប ចង់​ឲ្យ​ក្រុម​ឡើង​យ៉ាងហោចណាស់​គឺ​ដល់​វគ្គ​ពាក់កណ្ដាល​ល​ផ្ដាច់ព្រ័ត្រ​ក្នុង​ពាន​សម្ដេច​តេ​ជោ ព្រោះ​លេង​តែ​កីឡាករ​ខ្មែរ​សុទ្ធ​ដូច​អ្វីដែល​ក្រុម​មាន​។ ចំណែក​ក្នុង​ពាន​លី​គ​វិញ គោលដៅ​របស់​យើង​គឺ​រក្សាខ្លួន​ឲ្យ​ល្អ និង ប្រឹង​ដើម្បី​បាន​ចំណាត់​ល្អ​ជាង​រដូវ​កាល​ចាស់​»​។



ចំពោះ​ក្រុម​វិសាខា វិញ​កំពុងតែ​ត្រូវការ​ពិន្ទុ​ជាខ្លាំង​ដើម្បី​ប្រជែង​នៅ​តំបន់​កំពូល​តារាង​ក្រោយ​ប្រកួត​បាន​១១​លើក​ឈ្នះ​បាន​៧​លើក ស្មើគ្នា​បាន​២​លើក​និង​ចាញ់​២​លើក​មាន​២៣​ពិន្ទុ និង​កំពុងតែ​ឈរ​ចំណាត់ថ្នាក់​លេខ​៣​បណ្តោះអាសន្ន​ក្នុងចំណោម​ក្លិប​ទាំង​១២​។ លោក ហុក សុ​ជី​វ័​ន្ត គ្រូបង្វឹក​របស់​វិសាខា បាន​រំពឹងថា​កូនក្រុម​អាច​បន្ត​ជ័យជម្នះ​ថែមទៀត​ដើម្បី​ដណ្តើម​កៅអី​កំពូល​តារាង​។​

*​វេ​ស្ទើ​ន​ភ្នំពេញ ទទួល​អគ្គស្នងការដ្ឋាន​នគរបាលជាតិ
ក្រុម​វេ​ស្ទើ​ន​ភ្នំពេញ ត្រូវ​ប៉ះ​ក្រុម​អគ្គស្នងការដ្ឋាន​នគរ​បាល​ជាតិ នៅវេលា​ម៉ោង​៣​រសៀល លើ​ទីលាន​កីឡដ្ឋាន​វេ​ស្ទើ​ន ហើយ​ប្រកួត​នេះ​មាន​ផ្សាយ​ផ្ទាល់​លើ​ប៉ុស្តិ៍ BTV News​។ ម្ចាស់ផ្ទះ​វេ​ស្ទើ​ន នៅ​មិនទាន់​ស្គាល់​រស់ជាតិ​ជ័យជម្នះ ឬ​ស្មើគ្នា​នៅឡើយ​នោះទេ​នាពេល​១១​ប្រកួត​កន្លងមកនេះ ពោលគឺ​ចាញ់​រហូត ឈរ​បាត​តារាង​។ ក្រុម​នេះ​កំពុង​ដឹកនាំ​ដោយ​គ្រូបង្វឹក​ជនជាតិ​ម៉ាឡេស៊ី លោក FIZOL BIN A.RAZAK​។ ឆ្លងកាត់​ការប្រកួត​មួយរយៈ​ពេលនេះ​មក​លោក​បាន​មើលឃើញ​ពី​កម្រិត​ប្រកួតប្រជែង​និង​តម្រូវការ​ទាមទារ​នៅក្នុង​លី​គ​កម្ពុជា ដែលជា​បទពិសោធ​ល្អ​សម្រាប់​កីឡាករ​ក្មេងៗ​របស់លោក​ក៏ដូចជា​សម្រាប់​លោក​ផ្ទាល់​ផងដែរ​។



​ចំណែក​ក្រុម​ប៉ូលីស វិញ​កំពុង​ឈរ​លេខ​៧ ក្នុងចំណោម​ក្លិប​ទាំង​១២ បន្ទាប់ពី​ឈ្នះ​បាន​៥​លើក ស្មើគ្នា​២​លើក​និង​ចាញ់​៤​លើក​។ លោក នុត សូ​នី គ្រូបង្វឹក​ក្រុម​នេះ​រំពឹងថា​កូនក្រុម​នឹងធ្វើ​បានល្អ​បន្ថែមទៀត​ក្នុង​ប្រកួត​នៅពេល​ខាងមុខៗ ស្របពេល​មាន​កីឡាករ​ស្ទើរតែ​ពាក់កណ្ដាល​ក្រុម ទើបតែ​បញ្ចប់​បំពេញ​កាតព្វកិច្ច​នៅ​សាលា​បណ្ឌិតសភា​នគរបាល​ជាតិ​។ ម្យ៉ាងទៀត​ក្លិប​មាន​កីឡាករ​សំខាន់​ម្នាក់​បាន​ផ្ទេរចេញ គឺ ទិ​ត្យ ឌី​ណា ទៅ​ចូលរួម​វិសាខា ខណៈ​ក្លិប​បាន​បន្ថែម​កម្លាំង​ចំនួន​២​នាក់​វិញ​គឺ សុះ ប្រុស ហ៊ីម និង​កីឡាករ​កូរ៉េខាងត្បូង No Dae-ho​។​

*​ក្រសួងការពារជាតិ ប៉ះ​អង្គ​រថា​យ​ហ្គឺ​រ​
​ក្រុម​ក្រសួងការពារជាតិ ត្រូវ​ទទួល​ក្រុម​អង្គ​រថា​យ​ហ្គឺ​រ នៅវេលា​ម៉ោង​៦​ល្ងាច​លើ​ទីលាន​កីឡដ្ឋាន​កងយោធពល​ខេមរភូមិន្ទ របស់ខ្លួន ហើយ​ប្រកួត​នេះ​មាន​ផ្សាយ​ផ្ទាល់​តាម​ប៉ុស្តិ៍ BTV News ផងដែរ​។ លោក ភា សុភ​ត្រា គ្រូបង្វឹក​របស់​ក្រុម​ក្រសួងការពារជាតិ បាន​ត្រឡប់​ចូល​ទីលាន​វិញ​ហើយ​ក្រោយ​ផុត​ពិន័យ​មិន​ឲ្យ​ដឹកនាំ​ក្រុម​លើ​ទីលាន​ប្រកួត​ចំនួន​៤​ប្រកួត​។ កីឡាករ​របួស​និង​កីឡាករ​មួយចំនួន​ចាកចេញ​ជា​បញ្ហា​ប្រឈម​របស់​ក្រុម​ក្រសួងការពារជាតិ នាពេល​បច្ចុប្បន្ន​។ ងាក​ទៅ​មើល​១១​ប្រកួត​មកនេះ​ក្រុម​ក្រសួងការពារជាតិ ឈ្នះ​បាន​៧​លើក និង​ចាញ់​៤​លើក ឈរ​លេខ​៤ បណ្តោះអាសន្ន​។



ដោយឡែក​ក្រុម​អង្គ​រថា​យ​ហ្គឺ​រ វិញ​ឆ្លងកាត់​ប្រកួត​១១​លើក​មកនេះ​ឈ្នះ​បាន​៣ លើក​ស្មើគ្នា​បាន​២​លើក និង​ចាញ់​៦​លើក​មាន​១១​ពិន្ទុ​។ ក្រុម​នេះ​កំពុងតែ​ដឹកនាំ​ដោយ​លោក Oriol Mahedano ដែលជា​គ្រូបង្វឹក​សញ្ជាតិ​អេ​ស្ប៉ា​ញ កាន់​អាជ្ញាប័ណ្ណ​គ្រូបង្វឹក​កម្រិត UEFA A licence ដែលមាន​សមាជិក​២៥​នាក់​។ លោក Akihiro Kato ដែលជា​ប្រធាន​ក្លិប​បានដាក់​គោលដៅ​យក​កៅអី​នៅ​តំបន់​ក្រុម​ខ្លាំង​ទាំង​៤​ប្រចាំ​រដូវ​កាល (Top4) នៅ​ឆ្នាំនេះ ខណៈ​នៅ​ឆ្នាំ​២០២០ ក្លិប​ចង់​ប្រជែង​យក​ជើងឯក​៕

    

Source: Kampuchea Thmey Daily