ភ្នំពេញ ៖ បុរសម្នាក់ដែលបានជិះកង់មកលោតទឹកនៅលើស្ពានជ្រោយចង្វារកាលពី៥ថ្ងៃមុននោះ ត្រូវបានក្រុមគ្រួសារសាច់ញាតិរកឃើញសពហើយ កាលពីវេលាម៉ោង ១៧និង៣០នាទីល្ងាច ថ្ងៃទី២៩ ខែមិថុនា ឆ្នាំ២០១៨ នៅចំណុចខាងក្រោមស្ពានជ្រោយចង្វារ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា សពជនរងគ្រោះមានឈ្មោះ យ៉ង់ ចន្ថា ភេទប្រុស អាយុ ២៩ឆ្នាំ មុខរបរ ជានិស្សិតឆ្នាំទី៣ មានទីលំនៅក្នុងសង្កាត់បឹងកេងកង៣ ខណ្ឌចំការមន រាជធានីភ្នំពេញ។
ប្រភពព័ត៌មានពីប្រជាពលរដ្ឋបានឲ្យដឹងថា នៅមុនពេលកើតហេតុ ថ្ងៃទី២៥ ខែមិថុនា ឆ្នាំ២០១៨ គេបានឃើញជនរងគ្រោះ បានជិះកង់ មួយគ្រឿងឡើងមកលើស្ពានជ្រោយចង្វារ ដោយជិះក្នុងទិសដៅពីលិចមកកើត ខណៈពេលជិះមកដល់ចំណុចពាក់កណ្តាលស្ពាន ស្រាប់តែជនរងគ្រោះបានផ្តួលកង់ចោល ហើយបានដើរឡើងលើបង្កាន់ដៃស្ពានជ្រោយចង្វារ ក៏លោតទឹកបាត់តែម្តង។
ក្រោយពេលកើតហេតុ ក្រុមគ្រួសារសាច់ញាតិរបស់ជនរងគ្រោះបានដើរស្វែងរកជនរងគ្រោះរហូត និងបានដាក់ពាក្យបណ្តឹងនៅប៉ុស្តិ៍នគរបាលជ្រោយចង្វារ ដើម្បីឲ្យអោយសមត្ថកិច្ចជួយអន្តរាគមន៍ស្វែងរកជនរងគ្រោះ។
ក្រុមគ្រួសារជនរងគ្រោះបានឲ្យដឹងថា រហូតមកដល់វេលាម៉ោង១៤និង០០នាទីរសៀល ថ្ងៃទី២៩ ខែមិថុនា ឆ្នាំ២០១៨នេះ ក្រុមគ្រួសាររបស់ជនរងគ្រោះ បានជួលទូកអ្នកនេសាទជនជាតិខ្មែរឥស្លាម ដើម្បីជួយស្វែងរកសាកសពរបស់ជនរងគ្រោះ ដែលបានលោតទឹកលើស្ពានជ្រោយចង្វារ ខណៈនោះ ក៏បានប្រទះឃើញសពជនរងគ្រោះជាប់នៅនឹងសសរស្ពានខាងក្រោម។ ភ្លាមៗនោះ អ្នកនេសាទបាននាំគ្នាស្រង់សាកសពរបស់ជនរងគ្រោះនោះឡើងមកលើគោក ដើម្បីឲ្យសមត្ថកិច្ចធ្វើការត្រួតពិនិត្យកោសល្យវិច័យ។
ក្រោយពីសមត្ថកិច្ចជំនាញ បានធ្វើការត្រួតពិនិត្យសាកសពរួចមក បានបញ្ជាក់ប្រាប់ថា ជនរងគ្រោះខាងលើ ពិតជាស្លាប់ដោយសារតែលង់ទឹកពិតប្រាកដមែន។ ចំណែកឯសាកសពជនរងគ្រោះខាងលើ ត្រូវបានសមត្ថកិច្ចប្រគល់ឲ្យទៅក្រុមគ្រួសារ ដើម្បីយកទៅធ្វើបុណ្យតាមប្រពៃណីនៅឯវត្តសន្សំកុសល៕
Source: Kampuchea Thmey Daily
0 Comments