ក្រុមបាល់ទាត់អាស៊ីអឺរ៉ុប សមាជិកពានរង្វាន់លីគកំពូលកម្ពុជា Metfone Cambodian League 2018 បានបន្ថែមសមាជិកចំនួន៤នាក់ ពោលគឺកីឡាករខ្មែរ២នាក់និងកីឡាករបរទេស២នាក់ ដើម្បីត្រៀមប្រកួតនៅក្នុងជើងទី២ នេះស្របពេលដែលមានកីឡាករសំខាន់ៗមួយចំនួនបានចាកចេញកាលពីពេលថ្មីៗ។
លោក សុក វាសនា គ្រូបង្វឹករបស់ក្រុមអាស៊ីអឺរ៉ុប ថាកីឡាករថ្មីដែលមកចូលរួមក្នុងក្រុមរបស់លោកមាន ឡាយ រស្មី និង ម៉ម កក្កដា ដែលខ្ចីជើងមកពីក្រុមព្រះខ័នរាជស្វាយរៀង ចំណែកកីឡាករបរទេសគឺGeorge Kelchi Stanley ជនជាតិ នីហ្សេរីយ៉ា និងកីឡាករChigozie Nwaokorie ជនជាតិនីហ្សេរីយ៉ា ជាខ្សែប្រយុទ្ធដូចគ្នា។
ចំណែកកីឡាករដែលបានចាកចេញពីក្លិបនាពេលកន្លងទៅមានខ្សែប្រយុទ្ធអ៊ីរ៉ង់ Hedayati Mohamad ដែលក្លិបបានសម្រេចបញ្ចប់កិច្ចសន្យាមុនកាលកំណត់ក្រោយបង្ហាញខ្លួនមិនបានសូវល្អកាលពីជើងទី១។ ចំណែកកីឡាករដែលចាកចេញ១រូបទៀតគឺខ្សែប្រយុទ្ធនីហ្សេរីយ៉ា Okereke Timothy ដែលសម្រេចទៅលេងនៅលីគលំដាប់ទី២ប្រទេសម៉ាឡេស៊ី កាលពីប៉ុន្មានសប្តាហ៍មុន។
ចំណែកទីផ្សាដោះដូរជើងទី២សម្រាប់លីគកំពូលកម្ពុជា នឹងចាប់ផ្តើមបើកទ្វាចាប់ពីថ្ងៃទី១៥ ដល់៣០ ខែមិថុនា។ គណៈកម្មការប្រកួតកីឡាបាល់ទាត់កម្ពុជា (CNCC) បានកំណត់ថាក្លិបជាសមាជិកពានរង្វាន់លីគកំពូលកម្ពុជា អាចដោះដូរកីឡាករបានចំនួន៦នាក់ដោយក្នុងនោះមានកីឡាករខ្មែរ៣នាក់និងកីឡាករបរទេសចំនួន៣នាក់ដែរ។
ក្រុមអាស៊ីអឺរ៉ុប កំពុងដឹកនាំដោយលោក សុក វាសនា ពេលនេះកំពុងឈរចំណាត់ថ្នាក់លេខ៥បណ្ដោះអាសន្នក្នុងតារាងរួមដែលមានក្រុមចំនួន១២ ក្រោយប្រកួតបាន១១លើក ឈ្នះបាន៥លើក ស្មើគ្នា៣លើក និងចាញ់៣លើក មាន១២ពិន្ទុក្នុងដៃ។ កាលពីរដូវកាលចាស់ក្រុមអាស៊ីអឺរ៉ុប បានបញ្ចប់រដូវកាលរបស់ខ្លួនដោយឈរចំណាត់ថ្នាក់លេខ១០ ក្នុងចំណោមសមាជិកទាំង១២ ក្នុងលីគកំពូលកម្ពុជា ក្រោយប្រកួតបាន២២លើក ឈ្នះ៥លើក ស្មើ៣លើកនិងចាញ់១៤លើកមាន១៨ពិន្ទុក្នុងដៃ។ ពានរង្វាន់សំខាន់ៗដែលអាស៊ីអឺរ៉ុប ត្រូវចូលរួមប្រកួតនៅរដូវកាលនេះមានពានរង្វាន់ជើងឯកលីគកំពូលកម្ពុជា ពានរង្វាន់សម្តេចតេជោ ហ៊ុន សែន និងពានរង្វាន់ជើងឯកសាកលវិទ្យាល័យថ្នាក់ជាតិ ផងដែរ៕
Source: Kampuchea Thmey Daily
0 Comments