ភ្នំពេញ ៖ នាយឧត្តមសេនីយ៍ហ៊ឹម យ៉ាន អគ្គស្នងការរងនគរបាលជាតិ ទទួលបន្ទុកផ្នែកចរាចរបានឲ្យលើកឡើងថា គ្រប់រាជធានីខេត្តទាំងអស់ ត្រូវតែត្រួតពិនិត្យឲ្យបានត្រឹមត្រូវចំពោះប័ណ្ណបើកបររបស់បរទេស ពីព្រោះមានបរទេសខ្លះ មានតែប័ណ្ណបើកបរប្រទេសគេហើយពុំមានឯកសារនិងប័ណ្ណបើកបរនៅស្រុកខ្មែរទេ។
ដូច្នេះ អគ្គស្នងការនគរបាលជាតិបានចាប់ផ្តើមរឹតបន្តឹងប័ណ្ណបើកបរអន្តរជាតិ ហើយខណៈមានជនបរទេសកាន់តែច្រើននៅប្រទេសកម្ពុជា ហើយពួកគេបានបើករថយន្តដោយខ្លួនឯងនិងជនបរទេសខ្លះមានតែប័ណ្ណបើកប្រទេសខ្លួន ហើយពុំមានប័ណ្ណបើកបរខ្មែរទេ។
លោកថ្លែងបែបនេះ នៅក្នុងវគ្គផ្សព្វផ្សាយ ស្តីពីការត្រួតពិនិត្យលើប័ណ្ណបើកបរអន្តរជាតិនៅថ្ងៃទី២៩ខែមិថុនា ឆ្នាំ២០១៨នេះ នៅអគ្គស្នងការនគរបាលជាតិ។
លោកបានបន្តថា ចាប់ពីពេលនេះតទៅ ជនបរទេសណាក៏ដោយ ដាច់ខាតត្រូវតែមាន ប័ណ្ណបើកបរប្រទេសខ្លួនលិខិតឆ្លងដែនផ្សំជាមួយ ហើយត្រូវមានប័ណ្ណបើកបរនៅស្រុកខ្មែរផងដែរ តែប្រសិនបើពួកគេមានតែរបស់ខ្លួន ហើយពុំមានរបស់ខ្មែរត្រូវចាត់វិធានការណ៍ទៅតាមច្បាប់ជាធរមាន។
លោកនាយឧត្តមសេនីយ៍បានបញ្ជាក់ទៀតថា «ការប្រើប្រាស់ប័ណ្ណបើកបរអន្តរជាតិ ត្រូវភ្ជាប់ជាមួយប័ណ្ណបើកបរជាតិរបស់ជនបរទេសនោះ ដោយហេតុថា ប័ណ្ណបើកបរអន្តរជាតិជាឯកសារចម្លងពីឯកសារដើមគឺប័ណ្ណបើកបរជាតិរបស់ជនបរទេសនោះ ហើយត្រូវពិនិត្យផ្ទៀងផ្ទាត់ តាមសៀវភៅគំរូប័ណ្ណបើកបររបស់ប្រទេសនីមួយៗ ហើយករណីមានការសង្ស័យស្នើសុំការសហការបញ្ជាក់ពីស្ថានទូតប្រទេសនោះ»។
យ៉ាងណាក៏ដោយនៅក្នុងកិច្ចប្រជុំនោះ លោកនាយឧត្តមសេនីយ៍ ហ៊ឹម យ៉ានពុំបាន បញ្ជាក់ថា រហូតមកដល់ពេលនេះគឺមានជនបរទេសប៉ុន្មាននាក់កំពុងមានប័ណ្ណបើកបរ នៅខ្មែរទេហើយលោកក៏មិនបានបញ្ជាក់ថា ប្រសិនបើពួកគេខ្វះនូវឯកសារណាមួយនឹងត្រូវពិន័យ យ៉ាងណានោះដែរ។
សូមបញ្ជាក់ថា គោលបំណងនៃការរៀបចំកិច្ចប្រជុំនេះ ដើម្បីលើកកម្ពស់សមត្ថភាព និងជំនាញដល់មន្ត្រីនគរបាលចរាចរណ៍ផ្លូវគោក ក្នុងការពិនិត្យឲ្យបានត្រឹមត្រូវលើប័ណ្ណបើកបរអន្តរជាតិ ព្រមទាំងស្វែងយល់បន្ថែមពីលិខិតបទដ្ឋានពាក់ព័ន្ធ ដូចជាអនុសញ្ញាអន្តរជាតិ ស្តីពីប័ណ្ណបើកបរអន្តរជាតិ និងកិច្ចព្រមព្រៀងទទួលស្គាល់ប័ណ្ណបើកបរទៅវិញទៅមកទ្វេភាគី ឬពហុភាគីជាមួយកម្ពុជាជាដើម។ កិច្ចប្រជុំនេះគឺមានការចូលរួមពីមន្ត្រីនគរបាលនាយកដ្ឋាននគរបាលចរាចរណ៍ ស្នងការរង ប្រធានការិយាល័យនគរបាលចរាចរណ៍ នៃស្នងការដ្ឋាន រាជធានីខេត្តទាំង២៥៕
Source: Kampuchea Thmey Daily
0 Comments